Uudhano pokati ka Black Africa na Kaizer Chiefs

0
468

WINDHOEK – Otashi ka yelekwa ngaashi olugodhi pokati ka David na Goliath, uuna enyakwa metanga lyokoompadhi lya Namibia, Black Africa taya tsakanene nenyakwa lyo Prima Liha ya South Africa Kaizer Chiefs muudhano wawo wotango  womanyakwa goospana dha CAF mo Johannesburg oshiwike tu uka .

Enyakwa lyaNamibia olya ti otali ka yelula epandela lyaNamibia pombanda moshilongo shoka unene tuu sho yamwe yomaadhani mospana ndjika ya dhanena ospana yomoSoweto omimvo dha ka pita.

Mboka ya dhana moKaizer Chiefs pomimvo dhomilongo heyali oya kwatelamo, Hermann “Pele” Blaschke na Pius “Garrincha” Eigowab, mbaka oya li yena omadhina pethimbo lyawo no ya li ya tseyika nawa mondjokona yetanga lyokoompadhi moSouth Africa.

Osipana yo Chiefs oyina ondjokonona itaayi dhimbiwa netanga lyokoompadhi lyaNamibia, oshoka aadhani yahamano aaNamibia  oye li momambo  gospana ndjoka, mbaka oya kwatelamo, Oscar “Silver Fox” Mengo, Ishmael “Lemmy” Narib, Mohammed “Slice” Ouseb na Robert Nauseb mboka ya dhanena ospana ndjika omathimbo ga yooloka.

Omanyakwa gaNamibia oga hwama omanga inaa gaya molweendo lwAfrica, oshoka otaga tsakanene  nospana yoTura Magic muudhano woPremier Liha yoMTC pokapale ka Sam Nujoma metitano ndika. Uudhano mbuka Black Africa okwe wu tala ongo uudhano woku ilongekidhila etsakaneno lye no Chiefs mo Johannesburg.

Oku popya oshili aaNamibia mbaka ota ya yi muudhano mbuka ongo aadhinwa nokwa tegelelwa kutya otashi vulika ya ka dhengwe kenyakwa lya South Africa, ndele  aamati ya Brian Isaacs oye na oonkondo oku dhana naadhani yo Chiefs pomuthika kehe.

Aadhani yane yopokati kokapale yoo Awilo Stephanus, Klaas Blom, Bryan Bantam na  Marko van Wyk oyena iitalendi nontseyo ya pumbiwa oku keelela oshiponga kehe paudhano shoka tashi vulu okweetwa kaadhani yo Chiefs ngaashi Simpiwe Tshabalala, Yeye Letsholonyane, Willard Katsande na George Lebese.

Aadhani yaBA mokati kokapale oye na konyala omukalo gwoku dhana gwa fa gwaadhani yoChiefs. Otashi vulika nookuli  mbaka ya ka kale oyo yena etanga mokati kokapale.

Black Africa okuna oku dhana nuukeka nonekoto opo kaa itule moshiponga shoku tulwa ookola molwashoka aagameni yokoola oya li ya ya mokati kokapale.Okuna woo okudhana a kotoka opo a keelele okutulwa okoola komudhani gwokomeho gwa Chiefs Bernard Parker. Aanamibia otashi vulika ya dhane shithike pamwe nenge ya dhengwe nookola ooshona ndhoka yena eitaalo kutya otaya ka vula oku dhi galulako muudhano  womegumbo mboka tawu ka dhanenwa pokapale ka Sam Nujoma medhingoloko etiyali.

 

Ku Carlos Kambaekwa

LEAVE A REPLY

Please enter your comment!
Please enter your name here