WHERE OTHERS WAVERED – Oshiningwanima shomo10 December 1959

0
276

Ongula yomasiku 10 ga December 1959, de Wet ngoka ali omuwiliki gwOld Location okwa ithana oshigongi niilyo yOraata Ogandjimayele yolukanda lwOld Location. Poshigongi shoka opwa li Komufala Omukuluntu gwaavalelwamo, Blignaut, omukuluntu gwoPolisi, Majora Lombard, Meya gwa Windhoek, Snyman, naanambelewa yalwe yaandja muni noshowo yepangelo. Majora Lombard okwa kambadhala oku tu tilitha a ti”Yantu nee, onda hala oku mu hokololela ehokololo. Ngele opena onkoshi yeehamekwa inamu yi landula nenge inamu hedha popepi nayo,oshoka ngele omwe  shi ningi otaya yi mu ponokele”. Tse otwe mu shongo opo a fatulule shoka a hala okutya. Opo Blignaut okwa yamukula a ti” Tse inatu ya mpaka tu kundathane nane, ndele otumu londodhe opo mu ethepo okwiiteka nenge okuboikota omayakulo gamuni”. Konima yefatululo ndyoka ye opamwe naapolisi yaatiligane oya zimo moshigongi shoka. Meya Snyman okwa li omupolisi noshowo okwa li omudhani gwompindi ngoka a li ena ositola yoku landitha omalovu, nokwa li a tseyika nawa sho ha ulike ena uutondwe naaluudhe. Nguka okwa hingi noku shuna kondoolopa aka tale ondjembo yoludhi lwo Sten, ndjika oya ka longithwa oku yaha mboka ya li ya gongala inaa ya hala omayakulo ga muni.Snyman okwa etelele woo ondjembo yombistoli ndjoka a li a humbata yemwene.

Uusiku wesiku eti 10 lya December 1959 onda yile ko komboni yaPokkiesdraai pehala mpoka pwa tungwa oKatutura ngashingeyi.Otwa yi hoka nosheenditho tashi hingwa ku Gezemba kuume kandje,opamwe na Kurundiro omukadhona omumwayinagona gwa Clemens Kapuuo, nguka okwa li ena ohokwe yokulandula opolitika na okwa li a hala okumona ndje tandi popitha oshigongi shaaniilonga.

Elago enene oondika kutya inatu longitha ondjila ndjoka hayi endwa kwaayehe oku ya kokomboni ya Pokkiessdraai. Otwa yi nondjila onene ndjoka yuuka koKahandja opo ihe otwa goyokele mokomboni. Moka otwa tsakanekwa kaayambidhidhi yetu, yetu yakeleko kutya omuna aapolisi yaali ya holama moondunda meni lyokomboni, yiilongekidha oku yaha ndje.Pethimbo olyo tuu ndyoka ongundu onene yaakwiita ya homata oya li tayi ende konima yoshikulundundu mpoka ondjila yolutenda hayi piti uuna eshina lyuuka koKahandja.

Ookomanda dhaakwiita mbaka odha li dha lesha keplakata ndyoka lya li lya tseyitha kutya ota ku ka kala oshigongi shoka ngame tandi ka popitha. Onda li ndi ilongekidha oku ka popitha aaniilonga nonando onda li ndiwete kutya osha nika oshiponga tashi vulika ndi ponokelwe. Ndele nee konima otwa tala kegameno lya Kurundiro omugundjuka gwomukadhona ngoka twa li naye , ngoka pethimbo ndyoka ali ashike ena omimvo 19. Onkene otwa hingi nokushuna kOld Location opo ye kaa kwatelwe miikolokosha, nongeyi oshipopiwa shandje shoka ndali ndina okupopya moshigongi naaniilonga inandi shi popya wee.Otwa yi kegumbo lya Kapuuo mpoka twaadha Zedekia Ngavirue[ ngoka konima aka ninga Omuwiliki Ndjayi gwotango gwoKommissi yoPashigwana yomathaneko mepangelo lyandje] oya li pamwe na Levi Nganjone ngoka a li omulongisikola mbaka yaali oya li woo oshitopolwa shehwahwameko lyaakalimo oku kondjitha oshinima shaantu taya thiminikilwa okutembukila kolukanda lwa Katutura. Otwa ningipo okathimbo tatu kundathana onkatu ndjoka ya landulako tatu katuka. Kapuuo nangame otwa tokola opo tu thindikile Ngavirue kegumbo lye lili poombelewa dha Muni. Omanga ndali pokomboni ya Pokkiesdraii ando tandi popitha aaniilonga , opolisi oya li ya kwata omuntu gwontumba ye shi ningile owina. Nguka okwa li a kwatelwa pehala mpoka pwa li pwa gongala aantu poombelewa dha muni. Nguka aniwa okwa kwatwa molwaashoka okwa li ta keelele aantu kaaya ka nwe omalovu ko saala yomalovu ya muni. Omuntu nguka okwa  li ashike omukeenandjo ngoka ali a thikama mpoka.Onkene aantu mboka ya li ye shi omulumentu nguka oya tameke oku gongala mpoka  noku pula kutya nguka a mangululwe oshoka kena ondjo. Eindilo lyaakalimo mbaka kutya ngoka na mangululwe oshoka kena ondjo , olyo lya fala miikolokosha nomedhipago lyomwaalu  gwaantu 12 naantu omilongo 50 yeehamekwa kaapolisi yokatongotongo esiku ndyoka.

Pethimbo ndyoka omuwiliki gwolukanda naanambelewa yamuni naamboka yepangelo oya lombwele opolisi opo yi kale yiilongekidha, okuponokela aantu mboka ya li gongala poombelewa dhaandja Muni mOld Location.Aantu mbaka oya tsikile noku indila opo omulumentu ngoka a li a kwatwa ethiwe. Majora Lombard okwa yamukula nokulombwela aakwashigwna opo ya halakane konima yominute ntano.Kaukuetu okwa yimo nokupula Lombard naapolisi ye opo ya thigepo ehala ndyoka.Lombard okwa tindi oku shininga , na okwa lombwele aapolisi ye pamwe naakwiita opo a umbe ooholo dhina iikuti yuukitha maantu mboka ya li ya gongala mpoka.

Shoka mbaka ya yahwa ya li taya vulu oku ninga osho owala okugongela omamanya noku ga umba koombelewa dha muni mpoka opolisi opamwe na de Wet ya li ya holama.

Pethimbo mpono Kapuuo na ngame otwa thiki pegumbo lya Ngavirue. Sho owala twa piti tu ye megumbo oondjembo odha tameke tadhi  topa, onkene tse otwa mbete okuholama twa toolwe kooholo oshoka egumbo ndyoka olya li popepi noombelewa dhaandja muni.

Konima yoondjembo sho dha mwena Kapuuo na Ngame kehe gumwe okwa yi koyaandjawo. Onda yi kegumbo lyandje ndyoka lya li konyala oometa omathele gatano okuza poombelewa dha muni, mpoka opo pwa ningilwa omaumbathano.Iikuti yimwe yaambyoka oya dhenge kiipeleki yegumbo lyandje. Ngavirue konima yaashika okwa ka tidhwamo miilonga yaandja muni.

Esiku eti 10 lya Desember 1959, esiku ndyoka Iigwana Ya Hangana yuutha likale esiku lyopaigwana lyUuthemba womuntu, oshoka eigidho lyuuthemba womuntu lyakwaalukehe olya li lya igidhwa moshigongi shIigwana Ya Hangana mesiku ndyoka omumvo 1948.

Nandi gwedhepo kutya South Africa kohi yepangelo lyokakombo noludhi oye oshilongo shimwe shaambyoka yali inaa yi koleka nenge yi shaine eigidho ndika lyUuthemba womuntu pethimbo lya tulwa miilonga.

Esiku lya landula, David Meroro gumwe gwomaanandjungu mehwahwameko[ ngoka a ka ninga omunashipundi gwopashigwana gwo SWAPO] pamwe na Aaron Kapere nayalwe oye ya oku tala ngele ondi nomwenyo.Onda li nda geyekwa koshinima shoka shedhipago lyaantu yetu. Onda li nda kutha ongalona yimwe yopetololi opo ndika fikepo oositola dhimwe dhaatiligane ndhoka dha li popepi nOld Location ndele omukulukadhi gwandje noshowo omwamememati oya gunu ndje opo ndaa longe oshinima shoka.Otwa li twa adhikilila moshinima shoka oombulu dha yaha aantu yetu.Andola okwa li twa adhikile twi ilongekidha andola ngiika iilyo yetu iigundjuka oya ka kondjitha oombulu ndhika.Ongula ndjoka Ewiliko lyaakwaniilwa yaaHerero opwame na OPO oya yi kopolisi  okuyalula omidhimba dhaamboka ya dhipagwa .Poombelelwa dhopolisi mpoka ngame onda mbandamekwa komupolisi ati okwa li a hala andola ndi kale mokaki komidhimba dhaamboka yasa.Okwa popi ehalo lye lyo kutya andola onda silile miikolokosha mbyoka, oshoka aniwa ngame onda li tandi eta omakuyunguto. Pethimbo ndika ngame onda li te popi naye omanga iikaha yandje nde yi tula moondjato dhombulukweya yandje  . Okwa ti “Hey kuthamo iikaha yoye moondjato ngele hasho otandi  ku yaha. Ngame onde mu lombwele opo kaa mbandameke ndje. Pethimbo ndyoka osho shali oshikando shotango okumona ondjembo yoludhi lwo Sten. Onda tala omilungu dhayo  odhindji no ndi ipula ngele ondjembo ndjoka oyuumbwa nena kehe momulungu otamu ka za oshikuti.?.Konima onda ka igilila oludhi lwondjembo ndjika unene tuu pethimbo lyiita yemanguluko.Edhiladhilo oku kondja noondjembo opo oshilongo shi manguluke olya valwa esiku eti 10 Desember 1959, sho twa ndhindhilike kutya Epangelo lyokatongo  ota li vulu ashike oku pulakena ke tumwalaka lyiikondjitho.Pethimbo lyedhipago lyaantu mbaka, aantu yetu oya longo nuupenda  nonando oya li ya yakelwa. Mboka ya dhipagwa esiko ndyoka oya kwatelamo Bernhardt Gutsche omwahegona gwa Kerina. Okwa li omulongisikola noshowo omuntu gwaantu , egumbo lye olya li popepi naampoka pwa ningilwa iikolokosha. Ndele aapolisi woo oya li ya tokola oku mu dhipaga oshoka oya li ye tonde omumwahe Kerina , ngoka a li ha shangele kIigwana ya Hangana ta nyenyeta omahepeko taga ningilwa aantu yo moSouth West Africa kepangelo lyokatongo.Aapolisi oya yaha Gutsche lwaali momutse konima sho oshikuti shotango inaashi mu dhipaga. Gumwe ishewe a sile miikolokosha mbyoka  oAnna Mungunda ngoka a tseyika nawa Kakurukaze Mungunda. Pethimbo lyopolisi tayi umbu aantu , ye okwa li a kambadhala okutomeka ohauto yOmuwiliki gwolukanda omulilo, onkene okwa yahwa omanga a li ta kambadhala oku hwameka ohauto ndjoka. Mungunda okwa li omukiintu omwaanawa.Sho twa mono omidhimba dhaantu mboka ya dhipagwa yaana ondjo otwa tseya kutya otuna okumona ondjila ndjoka tuna okulandula oku kondjitha oonalunanga.Shika osho sha hwameke ndje pamwe nooyakwetu opo tu thigepo oshilongo oku kiilongekidhila ekondjelomanguluko ndyoka lya li ele.

Omuwiliki gwoshilongo ngoka a langekwa muka kepangelo lyokakombo noludhi lya South Africa, Daan Viljoen okwa li a gandja elombwelo kutya Aafrica ayehe mboka ya li yeehamekelwa miikolokosha mbyoka ina ya pewa epango lyopaunamiti.Otandi dhimbulukwa omukulukadhi gwa Ndohotola Kiwi ngoka a li Omuperesidende gwehangano lyOmushigakano Omutiligane okwa li a tindi oku gandja ombinzi kwaamboka ya li yeehamekwa moshinima shopOld Location. Oondohotola woo dhiilumbu poshipangelo shaavalelwamo sha Windhoek odha li dha tindi okupanga aantu mboka yeehamekelwa mOld Location.Meekulu Putuse Appolus ngoka a li omupangi moshipangelo shoka naapangi yalwe yaaluudhe oya panga noku yakula aavu mboka momilema na ngaaka oya hupitha oomwenyo dhawo. Meekulu Appolus okwa ka tidhilwa ko South Africa, konima sho aatiligane ya ka mona kutya ye pamwe nooyakwawo oya gandja epango kwaamboka ya li ya yahwa pOld Location.

Opwa li pwa tulwa onkalo yoshiponga noshowo eindiko opo aantu yaa ende uusiku, omahauto ga homatekwa naapolisi ya tya oondjembo dhomashina oya li taya patolola omapandaanda noshowo  omudhingoloko aguhe gwOld Location. Ndele nando okwa li shiindikwa opo twa ende uusiku otwe shi pondola natango oku gongala moshitopolwa shaaHerero, otwa kala hatu ende koohandimwe pethimbo lyomilema uuna tatu ka gongala. Konima yiikolokosha yomo 10 December 1959, aantu mboka ya li ya pitikwa okuya mOld Location oomboka ashike ya li ta yeya kelongeloKalunga noshowo aakwanezimo mboka ya li yeya oku kala pefumviko lyaakwawo mboka ya dhipagelwa momakuyunguto gomo 10 ga December 1959. Oshifonkundana shoko South Africa shedhina Fighting Talk osheshi pondola oku tuma omutoolinkundana omuluudhe ,ngoka a thaneke noshowo twa kundathana naye, ngame na Nathaniel Mbaeva. Kakele kuye, kapena we aatoolinkundana yalwe ya li ya pitikwa.

Ekondjo oku tinda oku tembudhilwa koKatutura olya tsikile konyala uule womimvo heyali okuza momasiku 10 ga December 1959. Naamboka yahugunina ya kala noku tinda ya tembudhilwe koKatutura oya li ya yi sho Old Location kwa igidhwa kutya ehala lyolukanda lwiilumbu, naashika osha ningitha mboka ya tindilapo ya kale ye li mpoka shaali paveta.Omukulukadhi gwandje oye gumwe gwomongundu yaamboka ya kala pOld Location  sigo otaya tidhwapo koonkondo. Omagumbo gawo oga ka teyagulwapo nehala eta li opalekwa. Onda li ndi uvite uuntsa oku talelapo ehalo ndika omumvo 1990 ongo Omuperesidende gwoRepublika yamanguluka ya Namibia, oku siikulula emanya ndyoka lya tulwa kombila yaamboka ya kanithile oomwenyo dhawo molwa edhipago lyaantu oyendji kopolisi yepangelo lyokakombo noludhi lya South Africa momasiku 10 December 1959.

 

 

LEAVE A REPLY

Please enter your comment!
Please enter your name here