Ya Toivo a kumike aanasikola posekoyEtosha

0
263

Tsumeb- Aalongwa yomoseko yEtosha moshitopolwa  Oshikoto oya talelwapo koshilyo nale shOmegumbo lyopashigwana noshowo onkwatwa yopapolitika kontuntu ya Robben Omusamane Andimba  Toivo Ya Toivo.

Ya Toivo ngoka a li tokolelwa omimvo omilongo 20 kontuntu ya Robben , hoka a li a edhililwa omvula yimwe itaa mono aantu kakele kwaamboka ye mu edhilila okwa ka tulwa moshitopolwa sha B moka a kala naawiliki yopapolitika aaSouth Africa ngaashi nakusa Omuperesidende gwotango gwoshilongo shoka Nelson Mandela noshowo nakusa Walter Sisulu.

Ya Toivo okwa kumike aalongwa poseko yEtosha eya dhimbulutha kutya yo aanelago oshoka, “Ne otamu vulu okwiilonga nokuninga shoka mwa hala okwaadha, pethimbo lyetu  opwa li iinima yimwe nando owa hala oku shininga ito pitikwa’ Ya Toivo teya dhimbulutha.

Omutotimpango nale nguka okwa lombwele aalongwa kutya elongo olya simana  oshoka aawiliki yoshilongo shika monakuyiwa ota ya ka za moongundu dhawo.

“Omulongi mosikola yeni okwa dhengele ndje ongodhi nokwa lombwele ndje kutya omwa hala okuuva ngele oko ndili ndina omwenyo, ngame onde mu yamukula ndati eeno, ondina omwenyo natango tandi li iithima nonyama,’ Ya Toivo a ti.

Pahapu dhomulongi  Elia Irimani, ngoka ha longo Ondjokonona mograde 8 sigo onti 10 pEtosha okwa ti mokutala oomvula adhihe ndhoka a kala omulongi okwa ndhindhilike kutya aanona mboka ya za moonkalo dholuhepo nodha nika uunkundi oyo yena omaupyakadhi meilongo lyawo.

“Oto adha kutya oyendji yomuyo kaye shi okulesha, okushanga nenge woo aanona yetu kayeshi okulesha omadhina gawo.Oshikwawo aalongwa yamwe kayeshi okushanga nawa momambo noopena, yo ishewe ihaya vulu oku yoolola pokati komambo giilongwa naangoka goku shanga iilonga yesiku nenge giithigilwalonga,’ Irimani a ti.

Okwa ti ngele oonzo odha tulwa petameko lyelongo nena aalongwa otaya kala yena omukanka gwa kola meuveko lyiilongwa.Omuthindo onkene inagu pumbwa oku tulwa kaalongwa mboka ye li mograde 10 no 12, oshoka, opo mbaka ya vule okwiilonga nawa oya li yena oku kala ya dheulwa nawa okuza poograde dhopetameko lyomusindalongo.

Omuthindo inagu tulwa kaalongwa yomograde 10 no 12 ndele nagu pewe aalongwa yopoondondo dhetameko lyelongo, opo shika shi kuthepo eshongo lyoku tula omutenge omudhigu komapepe gaalongwa mbaka uuna ya thiki pograde dhopombanda.

Okwa ti eitaalo lyoku tala unene kaalongwa yograde 10 no 12 itali longo. Elongo olya fa omuti, pehala lyoku tala komidhi oshafa ayehe ya tala ashike kiitayi naashika itashi uvikako.,’ Irimani ati.

 

Ku John Travolter Matali

LEAVE A REPLY

Please enter your comment!
Please enter your name here