Etseyitho lyeso lya geyitha aakwanezimo

0
507

ONGWEDIVA –Aakwanezimo noshowo aakwashigwana oya ulike okwaa na ombili kwawo komukalo ngoka Oradio yOshiwambo yoNBC aniwa ya tseyitha eso li nyanyalitha lyomukiintu omugundjuka etiyali oshiwike shika. Oshiningwanima shika osha ningilwa mOshakati .

Pahapu dhaakwanezimo yamwe aniwa oya kundana onkundana ndjika yoluhodhi yeso lya nakudhipagwa Mirjam Tuyakula Nandjato oku pitila momatumwalaka gomoocellphona noshowo moku dhengelwa oongodhi, sho mboka aniwa yuuvu onkundana ndjika ya tseyithwa moNBC yoshiwambo.

Ota ku tiwa oNbc oya li tayi tumu omawi mombepo ethimbo ndyoka okuza pehala mpoka pwa ningilwa oshiponga shoka.

“Tse inatu panda nando sho twa kala tatu dhengelwa noku tuminwa osms kaantu taye tu lombwele edhipago lyomumwetu.

Shoka oshinima shaana onge sha longwa koNBC.

Oshoka naanona yetu oya uvu kutya omwayinakadhona okwa dhipagwa, okuziilila kaashiinda mboka ye shi uvu mOradio, oshinima sha fa peni shono,” omukwanezimo gumwe ta pula ngaaka.

“Onkundana yoshiningwanima shika oya taandele ya fa epeya moshitopolwa nopondje yasho, nehala mpoka pwa ningilwa oshiponga nomuyonena nguka ka lya li lya gamenwa nando, eso lyombaadhilila lyolyene onkundana ishewe yi halutha, gwedhako ihe onkundana ta yi tseyithwa ethimbo ndyoka mombepo ngoye omuntu wa li inoo yi lombwelwa otashi halutha noonkondo unene tuu ehokololo nkene omuntu nguka a dhipagwa shinyanyaleka,’ omukwanezimo gumwe a ti.

Ndele Maria Nahenda ngoka a kala na Nandjato megumbo lyawo mOngwediva okwa ti okwa li uuvite oluhodhi koshinima shoka ndele ngashingeyi shoka sha ningwa osha pwa ina hala okutya ko we sha kusho.

“Oshaningwa nale, oshi li hwepo inandi hala okupopya ko we sha kusho, oshoka shoka shaningwa oshaningwa nale,’ Nahenda tati.

Sho a pulwa a gandje okomenda ye koohapu ndhoka omuwiliki gwiilonga yOshiwambo moNBC, Helen Shiimbi okwa ti ita vulu oku koleka enyenyeto ndyoka oshoka ine li pewa pamanyolo.

“Kombinga yetu tse ohatu longo pamuthika gwopaithano, na otwa lopota olundji kombinga yiiponga ngaashi shoka mwa kwatelwa naambyoka yiihauto, moka mwa sila aantu ndele katu na esiku limwe twa popya edhina lyanakusa nenge tu popye omaukwatya gawo.

Aaniilonga yetu itaya vulu okulonga nuuhasha ngaaka, onkene otandi dhiladhila kutya mboka taya popi ngaaka oya hala ashike okunyateka edhina lyo NBC,” Shiimbi a ti.

Omugundjuka Nandjato gwomimvo (24) okwa li ha longele ehangano lyoku konakona omavu lyepangelo lya  Namibian Institute of Pathology (NIP) okwa dhipagwa komumati gwe aniwa Ananias Nailenge naye gwomimvo (24) momukalo gu nyanyalitha mEtiyali oshiwike shika potundi 14 yomutenya gwesiku ndyoka, omanga omudhimba gwe gwa tetwa omutse ogwe kiitsuwa kongulohi yesiku olyo tuu ndyoka.

Ota ku hokololwa kutya Nandjato okwa li a kala maandja hekulu ngoka woo ha longo molabora ya NIP , oya li haya zi moValombola mOngwediva. “Ongula kehe okwa li ha yi na  hekulu kiilonga noshowo ha galuka pamwe naye konima yiilonga osho omushiinda gumwe ngoka ina itumbula kedhina  ati.

Okwa li eshiwike ongo omukadhona omuvuliki ngoka a li ihaa langelele inee shi ninga nando olumwe, omukwanezimo a ti.

Ndele metiyali ndyoka Nandjato ngoka nani a kala ena ekwatathano lyopahole meholamo nomumati gwe Nailenge ina thika kegumbo nenge a shune kegumbo na hekulu oku zimbuka kiilonga ngaashi shito.

Hekulu okwe mu tegelele sigo ontano ta yi pititha, okwa li woo a dhenge kongodhi ye ndele shika inashi kwatha sha.

Okuza mpoka hekulu okwa hingi eta yi koHakweenyanga ina hinga oku ya kegumbo ngaashi shito.

Aantu kegumbo mOngwediva oya dhiladhila kutya ngiika sho Nandjato inaa thika oye li na hekulu.

“Nailenge ngoka ta fekelelwa edhipago ndyoka ka li ha longo sha na okwa li a kala mondunda pegumbo lyonomola Erf 0353 mOshakati West, ondunda ndjoka oya li ha yi futilwa ku Nandjato mpoka opo ya li haya tsakanene naNailenge pethimbo lyomwiha omasiku ogendji.

Okwa li woo a ka talelapo Nailenge esiku lyedhipago lya ningwa,’ omushiinda sha Nailenge a ti.

Eso lya Nandjato olya halutha oshilongo ashihe nookuume ke otaya popi eso ndika li nyanyalitha komapandja goFacebook noku tuma omalaka gomahekeleko kepandja lye.

Yamwe oya tula po ethano lye taya ulike okuuva nayi kwawo molwa edhipago ndika li nyanyaleka nolyuukatalume.

 

 

Ku Kakunawe Shinana

LEAVE A REPLY

Please enter your comment!
Please enter your name here