Olugodhi lwaShihepo lwa undulilwa ku Maalitsa nuumvo

0
284

WINDHOEK – Olugodhi  oku kondjela epapa lyondjundo yo Silver Light Heavyweight, yehangano lyo World Boxing Council (WBC) pokati ka Wilberforce ‘Black Mamba’ Shihepo nomukondjithi gwe omuSouth Africa, Johnny Muller, olwa undulilwa mesiku 1 lya Maalitsa nuumvo. 

Olugodhi nduka lwa popiwa ethimbo ngashingeyi olwa li luna oku kalako momasiku 15 February omvula ndjika.

Omitoto odha uvika kutya aniwa olugodhi nduka olwa undulilwa komeho molwashoka Shihepo oku na iihokolola ya zi sho a li kwatwa sho ta lundilwa kutya okwa nwetha omahooli mohauto yopaumwene a longitha okakalata komahooli kosheenditho shepangelo.

Shihepo oku li pondje yondholongo iifutilemo oodola 3000-00. Okwa pewa woo iinakugwanithwa shi na sha nombeila ye.

Ndele Nestor Tobias omudheuli gwe okwa ekelehi omitoto ndhoka a ti kadhina oshili yasha.

Okwa ti olugodhi olwa undulilwa komeho molwashoka ehala mpoka lwali talu ka kondjelwa olya mono oshiponga komvula, naashika osho sha thiminike aalongekidhi moSouth Africa ya undulile ethimbo lyolugodhi nduka komeho sigo omesiku 1 Maalitsa nuumvo.

Iinakugwanithwa mbyoka ena oku ninga opo a kale pondje yondholongo , konima yoku tamanekelwa ekengelelo nuulingilingi, mohofa ya Mangestrata moWindhoek  ,oombika kutya ke na oku idhopa monkalo yoombangi, na ishewe oku na oku tseyithila aakonakoni yoshipotha she poKommissi yOkukondjitha Uulingilingi uuna a hala oku ya pondje yoongamba dha Namibia.

Palopota yo ACC na ku dhenga  oongonyo dha kukuta nguka ye enyakwa lyo WBO African Super Middleweight okwa adhikilila ta nwetha ohauto ye yopaumwene nokakalata komahooli kepangelo.

Ndele ngashingeyi  Shihepo ota ka kondjitha Muller mesiku 1 March molugodhi ndoka kwa tegelelwa lu kuulikwe ko tiivii yoSuperSport pethimbo talu kondjwa.

Olugodhi lwe ngashingeyi ota lu ka kalako esiku limwe naandoka lwa Paulus ‘The Hitman’ Moses’ mOutapi.

Tobias okwa ti omalugodhi gaamati ye mbaka yaali taga ningwa esiku limwe ka ge shi eshongo kuye.

‘Tse ospana onene yi na uunongo owindji momalugodhi goongonyo.Ishewe oshinima shika oshipu oshoka otu na MTC ena ospana ya pyokoka moku longekidha iinima ngaashi mbika, onkene shika osha fa ashike oshipambu sho shi kuki,” Tobias a ti.

Olugodhi lwa Shihepo ota lu kondjelwa moSouth Africa, moJohannesburg poEmperors Palace, omanga ndoka lwa ‘The Hitman’ Moses’ ota lu ka kondjelwa mOlufuko Centre mondoolopa Outapi moshitopolwa sha Musati.Tobias okwa ti aadhengingonyo ye mbaka yaali ayehe oye li monkalo ombwaanawa kokutya oyi idheula nawa nawa.

 

 

Ku Otniel Hembapu 

LEAVE A REPLY

Please enter your comment!
Please enter your name here