Oshikondo shUundjolowele sha dhike okomittee oku kondjitha eidhipago mOshana

0
258

ONGWEDIVA – Oshikondo shUundjolowele osha dhikepo Okakommitte kokukondjitha eidhipago moshitopolwa Oshana oshiwike sha yi. Okakommittee haka oka dhikwapo mekwatelokomeho lyomunambelewa gwonkalonawa , Betsy du Plessis.

Pethimbo ndyoka a dhike okangundu haka okwa indile oshigwana opo shi kwathele oshikondo she mokukondjitha eidhipago ndyoka lilipo tali londo pombanda moshigwana.

Okwa gandja omiyalu dhaamboka yiidhipaga pokati ka January 2013 na January nuumvo ati aantu o480 oyi ikutha omwenyo yoyene, omanga omwaalu gwa yalwe gwa pangwa miipangelo molwashoka oonkambahdala dhawo dhokwiidhipaga dha li dha ndopa.

Oshitopolwa Oshana osho shi li ponomola yotango momwaalu gwaamboka yi idhipaga yeli 93 ethimbo lya popiwa pombanda, shika osha landulwa koshitopolwa Omusati shina aantu 59 mboka yi ikutha omwenyo, mOhangwena 58 na yo oyi idhipaga yoyene.Moshitopolwa sha Khomas aantu 56 oyi idhipaga,  Otjozondjupa aantu 38 oya kanitha oomwenyo molweidhipago, mOshikoto aantu 37 moKavango oyeli 37 , Oshikoto 27 nOmaheke 25.

Iitopolwa moka eidhipago lili pevi omo Karas moka aantu 16 yiidhipaga naZambezi moka 14 yiidhipaga, noKunene moka 9 yiikutha omwenyo, oshitopolwa sha Hardap ina mu lopotwa eidhipago nando limwe. Omunambelewa Omukuluntu gwonkalonawa mOshikondo shUundjolowele, Betsy du Plessis okwa ti eidhipago olyo uudhigu wopamadhiladhilo noshowo oshinima shopamuthigululwakalo, okwa gwedhako ati onkalo yeziyalalo inaa yi pangwa oyo omweeti gwotango gweidhipago.

Okwa ti Uuministeli we otawu longele kumwe niikondo ya yooloka yepangelo ngaashi , Shuukashike kOokantu nOnkalonawa yaanona, opolisi ya Namibia, omagongalo opo omwaalu ngoka tagu londo gweidhipago gu shunithwe pevi. Opo shika shi longe nuupu oshikondo she otashi dhike uukomitee wokukondjitha eidhipago miitopolwa, opo ya koleke elongelokumwe lyomalutu ga yooloka moku keelela omaidhipago nokunkondopeka oonzo dhilipo mepangelo lyeidhipago.

Okommittee yokukondjitha eidhipago oya dhikilwepo mo 2013 miitopolwa Erongo nOmaheke, ngashingeyi okwa gwedhwa oshitopolwa shaShana moka woo mwa dhikwa ongundu ndjika. Okwa ti nonando oongundu ndhoka odha dhikwapo natango eidhipago ota li londo pombanda. “Opwa pumbwa okulonga noshinima shika taku ziilile koombinga adhihe opo pu kale omathaneko gopandunge oku palamena eidhipago moshilongo.

Oshilanduli sheidhipago shoka hashi hepeke mboka ya thigwapo  unene tuu aanona  osha pumbwa oku longwa nasho. Onkalo noshowo omatompelo gokwiidhipaga ogena oku monika noku ungaungwa nago,” Du Plessis a ti.

“Aantu oyendji oha yi idhipaga omolwa eziyalalo, ndyoka lyeetwa konkalo yaanambili , olundji mbaka iha ya mono ekwatho lyepango nenge lye hungomwenyo omolwa eziyalalo.

Okwaa nombili kumwe ohaku zi meso lyaaholike, ehengathano, etopoko, nenge etekepo lyomakwatathano.

Ekanitho enene ngashi lyiilonga , egumbo nenge iimaliwa, uuvu uudhigu tawu fala meso noshowo uuwehame ihaa wu hulu oyo yimwe yiinima mbyoka ha yi thiminike aantu yiidhipage,” Du Plessis a ti.

 

 

Ku Kakunawe Shinana

LEAVE A REPLY

Please enter your comment!
Please enter your name here