Uudhano wochess otau ka dhanwa nawa nuumvo

0
195

WINDHOEK- Ehangano lyuudhano woChess moNamibia NCF otali ka tameka oliha yuudhano mbuka omwedhi nguka.Elalakano lyoliha ndjika olyo okuyeluthapo oludhi luudhano mbuka moshilongo. Omuperesidende gwa NCF, Otto Nakapunda okwa indile oospana adhihe dhochess moshilongo dhiishangithe mbala ngaashi tashi vulika.

Etseyitho lyetameko lyoliha yuudhano mbuka olya ningilwe pethimbo lyoshigongiilonga kombinga yochess shoka sha ningilwe moWindhoek  omwedhi gwayi.

Poshigongi shoka opwa ndhindhilikwa kutya nuumvo okwa tegelelwa uudhano mbuka wu hume komeho, unene tuu sho aadhani naawiliki yuudhano mboka ya li ya longwa kombinga lyewiliko lyawo.

Oshigongiilonga shesiku limwe osha li sha kwashilipalekwa kehangano lya Hanns Seidel Foundation, na osha li sha ningilwa moWindhoek mokati komwedhi gwaziko.

Elalakano ekwawo enene lyoshigongiilonga shoka  olyo okulonga oshigwana, okutulapo, okuwilika noshowo  okuwilika nawa nesindano okluba yuudhano wochess mboka wa pendutha ohokwe onene maakwashigwana pethimbo ndika.

Oshigongi shomauyelele shika osha li mewiliko lyomukwateli komeho nale gwa Hanns Seidel Foundation moNamibia, Wolfgang Kleine. Nguka okwa dhimbulutha aakalelipo yomahangano guudhano mbuka kutya etsikilo lyawo noshowo eyo lyawo komeho, otali ikwatelele keitulemo lyaawiliki.

Okwa lombwele aakwashigongi kutya ookluba dhawo otadhi ka huma komeho ngele otadhi landula omakankameno ngoka gopetamako mokuwilika ookluba esiku kehe.

Oshigongiilonga shika okwa li sha tangwa  kutya otashi ka kwathela nawa unene tuu mboka ya li ya holoka musho. Ndele nando ongeyi aakali moshigongi shika ye shi popile muuwanawa.

Omuperesidende gwaNCF, Otto Nakapunda okwa ulike okwaanambili kwe sho poshigongi pwa li ashike iilyo yehangano iishona unene.

Nakapunda okwa ti mboka inaaya holoka oya kanitha oshindji,unene tuu sho oompito dholudhi nduka dha nuninwa oku ya longa noshowo oku ya nongopeka kombinga yoku humitha komeho uudhano mbuka moshigwana.

Onkene okwa ti oompito ngaandjika odha pumbwa okulongithwa nawa kwaayehe.

Nakapunda okwa tseyithile aakwashigongi kutya ehangano otali ka ninga iigongiilonga miitopolwa yoshilongo, okulonga aantu kombinga yomikanka dhuudhano wochess noshowo nkene taya toto po oongundu dhuudhano mbuka miitopolwa yawo.

Ochess uudhano mboka hawu pula omudhani a longithe omutse gwe neitulemo enene opo a vule okusinda omukondjithi gwe.

 

 

Komukundaneki 

LEAVE A REPLY

Please enter your comment!
Please enter your name here