WHERE OTHERS WAVERED – Omaindilo kIigwana Hangano ga tsikila

0
232

Omukwaniilwa Kutako, Kaukuetu nangame otwa dhengele ooyakwetu, Kozonguizi, Kerina nomusitagongalo Michael Scott mboka ya li ko UN no ya indile, Amushangandjayi gwo UN a tume Okommissi yomakonakono oku konakona osheeti shokuumba aantu noshowo edhipago lyaantu yaa na ondjo yomoSouth West Africa.

Momasiku 22 December 1959 ongo omuperesidende gw OPO, onda shaina ombapila pamwe na Hosea Kutako noshowo Samuel Witbooi twa lopota elombwelo lyokutidhwa moWindhoek meni lyootundi omilongo 72 kwa Kuhangua, Mbaeva, Barthlomeus Shimbamba nangame. Ombinga yimwe yontumwafo yetu oya ti einekelo lyetu moUN olya li tali shongwa kiiningwanima mbyoka.

“Otatu indile oUN opo yi lombwele epangelo lyoUniona opo li hulithepo iilonga yalyo yethindilo kongudhi mbyoka noshowo okutidha aantu oku ya shuna komikunda hoka ya za.Otu na uudhigu oku mona aapopiliko yopaveta oku tu popila moohofa dho mo South West Africa molwashoka aatseyiveta ayehe moshilongo oya li aatiligane yo mbaka ka ya li ye na ehalo okutu popila ongo aavelelwamo.

Omolwa etompelo ndika otwa pula omunaveta omuluudhe gwoko South Africa, Oliver Tambo opo eye etu popile. Ndele nguka sho a thiki moSouth West Africa ina pewa epitikilo oku ya moshilongo muka. Oliver Tambo okwa ka thigapo South Africa oshilongo shaandjawo omumvo gwa landula nokonima okwa ka ninga Omuperesidende gwo ANC. Otwa tsikile twa nyola kutya mo South West Africa, aavalelwamo aAfrica ka ya li ye  na aapopiliko yopaveta oku ya popila miihokolola mohofa. Otwa tsikile oku tseyithila oUN kutya oWindhoek oya ninga ehala lyiita. Olukanda otalu tonatelwa nokupatololwa  uusiku nomutenya kiihauto yaakwiita ya homata oshowo kooJeepa dhaapolisi ya homatekwa oondjembo dhomashina.

Ota tu indile twa manamo opo UN a pule epangelo lyoUniona opo li kuthe mo  aapolisi naakwiita yalyo moSouth West Africa.

Epangelo lyo Uniona olya ulike Omupanguli Hall ngoka a li Omupanguli Peresidende gwa South West Africa opo a konakone shoka sheeta opo pu tukuke okwaana ombili niikolokosha mOld Location moWindhoek. Ndele sho twa li twaa na einekelo mepangelo lyoUniona ka twa li tu na woo einekelo mOkommissi yuulikwa kulyo. Otu na uumbanda kutya Okommissi ya tya ngaaka ota yi ka kala ya gama ombinga momakonakono ga yo kombinga yedhipago lyaavalelwamo mOlukanda olukulu moWindhoek komatanga gaakwiita gEpangelo lyoUniona.

Onkene osha pumbiwa lela  kutya Okommissi yIigwana Hangano yi   talelepo South West Africa mbala, molwaashoka okwaa kalamo kwa yo moshilongo shika okwa itaalitha aanambelewa yepangelo moSouth West Africa noshowo moUniona kutya UN oku li kokule koNew York no kena esiku na lyata moshilongo muka opo a kwathele aavalelwamo yaa hepekwe nooveta dhokatongotongo.”

Otwa li twi itaala kutya oompata noonkundathana kombinga ya South West Africa ndhoka dha kala uule womimvo 14 odha li tadhi vulu oku kala dha tompoka andola ngele UN okwa li a tumu Okommissi ye pethimbo ndyoka.

Tango otwa tumu ombapila ndjoka ya ti “ Ota tu indile twa manamo kutya oshinima sha South West Africa na shi tuminwe kOhofa yoPaigwana, pwaana emanepo lyethimbo opo shi ka pulakenwe.’ Konima yoshiwike shimwe otwa tumu ishewe ontumwafo onkwawo ta yi lopota kutya aapolisi oya hadha omagumbo gaantu omulongo 11, mwa kwatelwa egumbo lya Hosea Kutako, Louis Nelengani, Nathaniel Mbaeva, ngoka aadhika a tidhilwa nenge a shunithwa nale kEpukiro  nosho wo nee egumbo lya Bernhardt Gutsche ngoka a li omumwahe gwa Kerina. Opolisi oya li woo ya hadha omagumbo lya Hailwa Ya Toivo noshowo lyomusitagongalo Hamutumbangela mOwambo. Otwa li woo twa lopota omaso gaAfrica yatatu , mboka ya li ya yahwa kaatiligane yaashiwike mondjila yoku ya kOkahandja oshowo elando lyoondjembo omathele 2  noombisitoli dha landelwa aatiligane yomoWindhoek, ongo elongekidho lyepangelo lya  South Africa oku etapo uutondwe pokati kaaluudhe naatiligane. Otatu indile Iigwana Hangano yi tale onkalo ndjika ongo ndjoka ya nika oshiponga.

Oonkambadhala oku kwata aanandjungu no ku ya tidhila komikunda dhawo

Konima yiikolokosha yomomasiku 10 Desemba 1959 aapolisi yo CID aatiligane yaali ya homata oya li ya pewa iilonga oku landula ndje. Elalakano lyawo olya li oku adha ndje ongame awike, opo ando ya pule ndje nokonima ota ya yaha ndje, netompelo lyiifundja kutya ngame onda li tandi ya fadhukapo. Iilyo ya OPO oyi iyamba opo yi langele ndje ootundi 24 esiku kehe, ye shi ningi woo nomeni lyegumbo lyandje. Egameno lyawo ndika olya hupitha ndje moonkandja dhaakolonyeki mboka.

Otwa li woo tuuvu komuniilonga ngoka a li ha longele pongeleka ya Lutheri, kutya opwa li oshigongi maandja Pastori Diel  sha kalwa komukuluntu gwopolisi yo CID, ku komanda gwopolisi , ku Komufala gwaavalelwamo nokaanambelewa yalwe. Oshigongi osha li sha ithanwa opamwe niilyo iigandjimayele moRaata yokugandja Omayele yililepo Old Location.Iilyo mbyoka ya li yiithanwa oombyoka ya li iilongithwa kaatiligane, mokati kayo mwa li Ananias  Shipena. Elalakano lyasho olya li oku tala nkene ta pa longwa nonkalo mOld Location.

Shipena okwa lombwele aahona ye sho a ti ngele oya hala opolitika mo South West Africa yi hule , nena oye na oku kutha po tango omugundjuka ngoka, Sam Nujoma, oshoka ‘Oku li apehe, na oha unganeke aantu nawa noonkondo. Oku na oku kuthwamo’. Onda li ishewe muudhigu woku shunithwa kOwambo, hoka ooyakwetu ngaashi Ya Toivo ya ningwa, nongele onda tidhilwa hoka ando onda ka tulwa meti kuuwa wOmukwaniilwa Kambonde pOkaloko. Lago enene onda mono omupopiliko gwopaveta ngoka a popile ndje nongeyi aatiligane oya ndopa oku kwata ndje, ngaashi ya kala ashike ta ya nyengwa oomwedhi dha piti po.

Momasiku 15 December 1959 onda li nda tseyithilwa pamwe na Barthlomeus Shimbama kutya ota tu tidhilwa hoka twa za. Oshoka aniwa otwa li ta tu hongakanitha aantu  oku ya tonditha aatiligane, oshowo otwa li aantu inaatu pumbiwa mehala  muushimba nenge mehala lili kohi yewiliko lyopolisi.

Aagandji yiilonga oya li ya tseyithilwa opo yaa pe ndje iilonga oshoka onda li nda nika oshiponga konaku yiwa yaatiligane moshilongo shika. Omutseyiveta gwandje, Lucian Goldblatt gwofeema yoohahende ya Block nayakwawo okwa lombwele ndje kutya ita vulu oku ninga sha moku popila ndje ongo omuntu omuluudhe oshoka oveta yoshilongo ina yi yalula omuluudhe ongo omuntu. Onkene omuluudhe ita vulu okupulakenwa mohofa ndjika.Ndele nando ongawo okwa kalele ndje po mohofa momasiku 30 December 1959, moka Mangestrata  a ti oshipotha shandje osha  kuthwapo. Onda thigipo ohofa ndele sho ashike te thiki pondje ngame otandi kwatwa ishewe molwa omatamaneko ga  fa ngoka ga li ga etitha ndje mohofa. Onda falwa kosasiona yopolisi na onda li ndina okufuta oombeila yiiponda omulongo. Onda ka holoka ishewe mOhofa momasiku 10 January 1960, ishewe oshipotha shoka osha ethiwa, onda li ishewe nda pewa elombwelo kutya otandi tidhilwa konooli.

Okuza momasiku 27 sigo 30 December 1959 egumbo lya Hosea Kutako, lyandje nomagumbo goohailwa yalwe  oga li ga kondekwa kopolisi noku hadhwa kopolisi ta yi kongo omishangwa. Tango oye ya pegumbo lyandje koongulasha ye tu pendutha noku halutha aanona yetu aashona. Omwayinakadhona gwomukulukadhi gwandje  ngoka a li a kala putse okwa ningi a fa ta ka teka omeya popomba yaayehe pondje, okwa faalele omikanda adhihe dhandje kaandja Aaron Hamutenya oku kedhi holeka. Omanga komagumbo gamwe omishangwa ndhoka dha nyolelwa kIigwana Hangano nosho tuu odha kuthwa ko kaapolisi, naandhika oye ke dhi longitha mOmakonakono gopahofa ngoka ga tamekele momasiku 11 January 1960. Ngame ogumwe gwaamboka ya li ya kwatwa po noku lundilwa kutya otse twa li twa  longekidha iikolokosha yomoWindhoek. OPO okwa kongo omupopiliko gwopaveta omuluudhe a za kehangano lyaatseyiveta, Lya Tambo na Mandela. Ngaashi twa lombwele oUN kutya Oliver Tambo ina pewa epitikilo okuya mo South West Africa molwashoka Mangestrata  ka li ena omukumo oku patanekwa komutseyiveta omuluudhe onkene Tambo okwa shunithwa onkolonkolo koSouth Africa.Konima omutseyiveta Van Niekerk okwa tumwa okuza koJohannesburgh etu popile. Okwa li ohahende yi shi iilonga nawa. Iihokolola okwe yi teya konima yethimbo ele  ta yi pulakenwa.

Etokolo okuthigapo South West Africa

Momwedhi February 1960 iihokolola mbika oye tu pula iiponda 125 omwaalu omunene gwoshimaliwa pethimbo ndiyaka. Otwa mono kutya otwa li ta  tu longitha oshindji ndele ka twa li ta tu humu komeho nawa miihokolola mbika .Onkene okwa tokolwa kutya ondina okuthigapo oshilongo oku ka joina Kozonguizi, Kerina nomusitagongalo, Michael Scott oku popya no UN kombinga ya South West Africa. Etokolo olya ningwa ku OPO opamwe newiliko lyaaHerero na OPO okwa pendje iiponda omathele gatano omolwa olweendo lwa ndje oku ya ko New York. Onda tameke olweendo pethimbo natango nda li miihokolola mohofa moWindhoek, oshi kwawo onda yi mela lyondjila ndaana omukanda gwokweenda nagwo.

Onda yi ko New York neikelo kutya Iigwana Hangano otayi ke tu kwathela mbala opo tu adhe epotokonono lyomukundu gwa South West Africa muule wethimbo ehupi ndele shika osha ka kwata omimvo odhindji oku ninga shoshili.

Onda laleke omukulukadhi gwandje naamwandje, mboka OPO a uvaneke ta ka sila oshimpwiyu, pethimbo ngame ndili pondje , na otwa li twa dhiladhila kutya ethimbo ota li ka kala ashike ngiika ngele ele oomvula mbali adhike. Lwa hugunina onda ka tsakanena nOmukwaniilwa Hosea Kutako ngoka a lombwele ndje kutya nandi kale ndi ilongekidha oku kala pondje yoshilongo uule wethimbo, nongele osha pumbiwa inandi galuka omanga South West Africa inaa manguluka.

Omukwaniilwa Hosea Kutako okwa li mondjila oshoka oomvula ndhoka mbali nda li nda dhiladhila tandi ka kala pondje yoshilongo odha ka shituka omimvo 29 omanga inaandi galukila koshilongo ndi kuthe oshinakugwanithwa shandje sho ku wilika no ku fala Namibia memanguluko.

LEAVE A REPLY

Please enter your comment!
Please enter your name here