Aahikingalo yomusiki Damara/Nama Punch taya ka lundulula omusiki

0
257

Ku Clemence Tashaya

 

EENHANA – Omathimbo gamwe monkalamwenyo  moshitopolwa shomusiki oha mu holokele iipala iipe nenge oongundu dhaa yimbi oompe.

Moompito odhindji aayimbi mbaka oha ya lundulula onkalelo yoshikondo shoondjimbo sho haya ningitha ethigathano li kale enene nolya kindja.

Aahikingalo aakadhona aakwanambwiyu Donsy na Daisy oyo yamwe aaimbi yomusiki aape  mboka taya ka papudhula oludhi lwomusiki yo Damara punch moomposi dhayo oondhigu.

Aakwanambwiyu mbaka aagundjuka okwa tegelelwa ya  hwameke oshitopolwa shomusiki unene tuu ndjoka yoludhi lwo Damara punch moshilongo, sho ya tseyitha oalubuma yawo yoongalo omu 11 kohi yoshipalanyolo “Ta’ Tsuba Mi”.

Oya ti yo ina ya pumbwa okuyelekwa naaimbi yomusika ndjika ye li po nale. Moonkundathana na Kundana, omuwiliki gwaaimbi mbaka  okwa ti efaathano pokati kaambaka naaimbi yalwe moshilongo oondyoka ashike kutya oha ya imbi omusiki yoludhi lwoDamara/Nama punch.

Ihe mbaka ohaya ndanisa noku longa yilwe kostage nenwethemo lyaahikingalo ya tseyika nawa yokoSouth Africa ngaashi nakusa Brenda Fassie, PJ Powers, Yvonne Chaka Chaka, omanga moNamibia mbaka oya nwethwamo kaaimbi ngaashi Patricia Ochurus na Erna Chimu.

“Nonando aantu otaye tu yelekanitha naahikingalo yalwe yoludhi lwo Damara punch tse otatu iyuvikila mokwiimba kwetu ngaashi sho twali twe shi ningi pomauliko poKatima Mulilo noshowo poRundu omasiku ga pitipo, oshoka tse otwa hololapo omukalo gulwe omupe gwokwiimba,” osho omuwiliki  gwaambaka , Lucky Gariseb a popi kombinga ya Donsy na Daisy.

Oomvalele dha Venduka ndhika  ohadhi imbi neitulemo naashika osha li sha thigi aayambidhidhi yawo yaana nando iitya okushi hokolola, oshoka euliko lyawo nokwiimba kwawo okwa li okwaanawa noonkondo adhihe. Shoka sha yoolola mbaka kaayimbi yo Damara Punch yoshito oshoka kutya mbaka oyena esimaneko, yena eitulemo nohokwe yomusiki yawo, pahapu dha Gariseb ngoka oye eli omuwiliki  gwawo.

Aahikingalo mbaka otaku hokololwa kutya oya tameke nale okwiimba  omanga ya li komanongelo  gopevi, sho aalongi yawo omathimbo gamwe ye ya pula opo ya imbileko osikola omanga ye li powandaha yongula. Konima oya ka dhimbulula kutya oyena oshipewa shomusika naashika oya li ye shi hole na osho ya li ya hala okulandula ongo eithano.

Onkene shika oshe ya fala mpoka opo ya kwatithe omaimbilo gawo gamwe kohi yaa kwati yomusiki yedhina Khomasdal Music Production (KMP) kohi yomulongekidhi nomuwiliki gwawo , Lucky Gariseb

Aakaluntu yawo naakwawo oyuuvite ombili mwaashoka  yaadha po sigo oompaka okuza tuu sho oalubuma yawo ya tseyithwa.

Oalubuma ndjika oyina uungalo ngaashi  //Gau/Goras, Ware Liefde nokangalo oka 11 oka ningululwa kedhina Gau/Goras mbuka ohawu pulakenwa mooradio dhoNBC dhomalaka ngaashi oSilozi , Damara/Nama noshiTswana.Oongalo dhilwe ongaashi  Mati/ta ni di, Ida Gera ra, Ne Uib, Mama, Ta tsu tsuba. Mi, Ma/Gaisa, /Hohab and Stop violence.

Senvonia Donsy Ironga na  Simonia Daisy Ironga oya valwa konima yomimvo 20.  Daisy oti ilongele elelo lyoongeshefa pounivesiti ya Namibia.

Donsy oha longo moshikondo shUundjolowele.

Gariseb okwa ti omusiki yaa imbi mbaka oyina etumwalaka komupulakeni gwayo kehe, oshoka oya hala aapulakeni yuuve elaka ndyoka yo taya gandja opo ndika ye li longithe moonkalamwenyo dhawo.

Donsy na Daisy oya thaneka oku enda oshilongo ashihe taya tseyitha oalubuma yawo ndjika unene tuu pethimbo lyokudhimbulukwa esiku lyemanguluko lya Namibia oshikando oshiti 24 nuumvo.

Mbaka yaali oyo aalongwa yoseko ya Cornelius Goreseb moshitopolwa shaKunene.

LEAVE A REPLY

Please enter your comment!
Please enter your name here