Nestor ’Sunshine’ Tobias Boxing Academy oyuuka komeho

0
235

Ku Otniel Hembapu

 

WINDHOEK – Osikola yokudheula aadhengingonyo ya Nestor Sunshine Tobias ota yi humu komeho nawa na oya tegelelwa yi ka ninge yimwe yomookluba dhomoAfrica ya tseyika nawa paigwana hayi dheula aadhengingonyo.

Okluba ndjika oya za puushona ya tameke ashike tango hayi longitha ongulu yimwe ndjoka ya hehela pokapale ketanga lyokoompadhi. Ishewe kaya li yi na aadhengingonyo aanamadhina ando pethimbo ya tamekele.

Okluba oya tamekwa ku Nestor Tobias omudhengingonyo gwa Namibia eshiwike nawa momumvo 2000. Okwa tameke ndjika konima yoku thigapo uudhano mboka mo 1999 ongo omudhengingonyo paithano omolwa uuwehame mepepe mboka wa li wa tinda okutyapo hwepo. Mbuka owa li we mu imbi opo a tsikile eithano lye lyuudhengingonyo opo a vule okwaadha iishani yomuuyuni. Tobias oye omudhengingonyo okuudha ngoka a longitha ontseyo ye , nuunongo we wokudhenga oongonyo oshowo ohole ye yuudhano mbuka okutotapo enongelo ndika . Ohole ye yuudhano mbuka otayi monika esiku kehe miilonga ye.

Okluba ndjika oya totelwe pethimbo aaNamibia oyendji ya li yiipula ngele okudhenga oongonyo okwo uudhano ngaa. Enongelo ndika ngaashi ashike galwe opo taga tameke nalyo olya tsakaneke omashongo molweendo lwalyo. Gamwe ongaashi ngoka gompumbwe yaakwashilipaleki  nekwawo oondyoka lyoku hila aakondjithi yalwe opo ya vule oku kondja naadhengingonyo ye aashona.

Nonando okwa li a fa ta gwililwapo komashongo ngoka Tobias ina sholola, nopethimbo limwe okwa li a longitha iimaliwa yemwene, oku mona kutya omaudhano ngoka ga longekidhwa oga dhanwa , noshikwawo aadhengingonyo ayehe oya pewa iipambu yawo yofuto ngaashi sha tegelelwa.Okwa li a longo ayihe mbika omanga keena nando omuyambidhidhi pashimaliwa.

Petameko Tobias ka li omudheuli noshowo omufalikomeho guudhano woongonyo moNamibia ihe okwa li ashike omudheuli nomuwiliki gwaadhengingonyo menongelo lye. Mboka ya tamekele enongelo ndika na Tobias oyo Rambo Hantindi, Paulus ‘The Hitman’ Moses, Siegfried ‘SBK’ Kaperu na Edison Kandukwa. Okwa li woo ashike a soshimpwiyu kutya mbaka oyi ilongekidha nawa omolwa omalugodhi ngoka taya ka kondja.

Okwa ti edhiladhilo lyoku ninga omuhumithikomeho guudhano wokudhenga oongonyo olye mu adha, sho a ndhindhilike kutya oyendji yaamboka ya li taya humitha komeho uudhano mbuka kaya li yena uunongo okushininga. Kaya li yena ontseyo okulongekidha uudhano mbuka pamuthika gwopaigwana, onkene okwa ningi eindilo omumvo 2001 opo a pewe olisensa yokuhumitha komeho uudhano mbuka.

Konima yokumona olisensa ye ndjika omumvo 2001, Tobias okwa longekidha olugodhi olunene moka mwa li Rambo Hantindi oye omubokisi omunene,uusiku mboka a sindana oshishani mondjundo yo WBO Africa Welterweight.

Konima yesindano lya Hantindi aayambidhidhi yamwe ngaashi  Nampower na Telecom oya tameke okupulakena noku yambidhidha sho NamPower a pe oacademy ndjoka eyambidhidho lyoodola N$ 1000,00. Aayambidhidhi  ngaashi Telecom, Trans Cargo na yalwe oya kala haya kwathele omalupita mpoka taya vulu.

Omumvo 2007, enongelo ndika olya ningi Omukokoliperesidende  Sam Nujoma ongo opeitrona yalyo, shika Tobias okwa ti osha li sha nuninwa oku opaleka omutalelo gwenongelo ndika mokati kaakwashigwana neinekelo oku hila aakwatheli oyendji pashimaliwa, ndele nando ongeyi , ina ya mona omakwatho ogendji ta ge ya kuyo oku za moshigwana.

Omumvo 2009 sho Paulus Moses a sindana oshishani shondjundo yoWBO Lightweight mekwathelo lyomuunganeki a simana omwAmerica, Don King sho, Moses a mono ompito oku kondjela oshishani shuuyuni  olweendo olwa fa lwa pupala kashona naayambidhidhi oya mono iilonga yenongelo lye.

Tobias okwa ti ondjila kaya li ompu opo Moses aadhe oshishani shika shoka she mu ningi oye omuNamibia omutiyali enyakwa lyuuyuni a landula Harry Simon. Pethimbo ndyoka oya li ya taalela omashongo gopashimaliwa noshowo ngoka gaambokisi yalwe woo taya pula ya pewe ompito oku kondjela woo iishani yuuyuni.

Tobias otati oku tala ayihe mbyoka ya pitapo, elalakano lye oku humitha komeho uudhengingonyo mo Namibia nawa, okweetapo aadhengingonyo aape mboka taya ka ninga omanyakwa , kakele kaamboka ya adha onkatu ndjoka ngaashi  Paulus ‘The Rock’ Ambunda ngoka a sindanene oshishani shika megumbo mosaala ya Ramatex nokuninga enyakwa etitatu lyuuyuni lya Namibia nenyakwa etiyali lya dheulwa kenongelo lya Nestor Sunshine Tobias  Academy.

Pethimbo ndika enongelo ndika olina aadhengingonyo yethike lwope 120 yopaithano noshowo  opo taya ilongekidhile eithano lyokudhenga oongonyo. Tobias otati oye li popepi noku dheula enyakwa lyopayuni etitatu netine mbala.

“ Otuna ospana yaadheuli yena ontseyo okudheula aadhengingonyo nawa. Aadheuli yetu oyiitulamo okudheula aadhengingonyo nawa opo mbaka ya holole iitalendi yawo nawa pamithika dhawo,’ osho Tobias a ti. Okwa pandula MTC molwa eyambidhidho lye, emu yelekanitha nomuyengeli a tumwa okuza megulu. Oshoka neyambidhidho ndika iilonga yewiliko lyenongelo ndika esiku kehe oya pepaIa nenge oya ningi iipu.

LEAVE A REPLY

Please enter your comment!
Please enter your name here