Omiyonena dha londa pombanda mOmusati

0
243

Ku  Kakunawe Shinana

 

OTAMANZI –Oshitopolwa Omusati  osha mona edhina ewinayi omolwa omiyonena  ndhoka hadhi longwa kaakalimo yamwe yaamoka. Shika osha popiwa kOminista yOmauyelele nOmakwatathano Joel Kaapanda.

Kaapanda okwa popi oohapu ndhika pethimbo a egulula endiki lyakwalaukuhe pOtamanzi mOshitopolwa shOmusati oshiwike shayi. Kaapanda okwa popi ndhika sha landula koolopota ndhoka dha zi miikundaneki omasiku ngaka tadhi popi aantu ya sa, molwashoka ya dhipagwa  kaantu yeli popepi nayo nenge kaaholike yawo nookuli. Okwa ti iilonga mbika yuudhudhu oya pumbwa oku hulithwapo tashi pitile melongelokumwe lyopolisi, aawiliki yopahedhi noshowo mboka yopambepo.

“Oshike tashi inyenge mOmusati yakwetu? Otwa fa twa mangulula oshilongo shetu opo tu tameke oku idhipaga nenge oku ikondjitha. Otwa fa twa manguluka opo aalumentu ya tse ondumbo naakiintu, yo aakiintu taya kondjo naakiintu ooyakwawo oshowo aakiintu taya kondjitha aalumentu. Otashi etitha omahuilili okuuva kutya oshitopolwa shaMusati oshimwe moka hamu longelwa omiyonena itaadhi vulu oku tumbulwa. Oolopota odhindji dhomiiningwanima mbyoka otadhi popi aalumentu oyo ya dhipaga aakiintu.

“Omusati ngashingeyi ogwa simana, ihe hamolwa uwana hawu longwamo ndele ogwa tseyika nawa nokokadhila  omolwa iilonga yomuyonena mbyoka hayi  longwa kaakalimo yamwe. Omadhipago oga ninga ogendji unene noonkondo. Oshikwawo aalumentu aaagundjuka  oyi ininga aayugi, taya yugu ooyinakulu iimaliwa yopenzela. Mbaka aamwetu tandi popi,” Kaapanda ta ti.

Kaapanda okwa pe aakuluntu oombedhi molwonkalo ndjika, a ti mbaka oya ndopa okulonga oyana ohole nesimaneko, oshoka olwindji aakuluntu yonena oye li poondingosho taya nu omalovu, omanga oyana taya koko yaana omupukululi onkene ohaya longo iilonga yomiyonena. Okwa ti monakuziwa oohapu dhomanyenyeto odha li hadhi pongololwa mewiliko lyaawiliki yopamuthigululwakalo mboka ha ya indilwa opo ya kwathele oku pulakena oohapu ndhoka, ndele ha ku pitila moku longitha oonkondo ngaashi pethimbo ndika lyonena.

“Otwa kanitha shili omithigululwakalo dhetu naantu oyena okulonga aanona mbaka omikalo dhopahedhi yawo, ndele nee shika ita ye shi ningi oshoka ethimbo kalipo, molwashoka oyendji oye li poondingosho taya dhengelemo otombo nomakende galwe. Okunwa konena haku tameke ongula ndele na ku ka ziguka okongulohi. Pethimbo aakuluntu yaa mo megumbo aanona otaya kala oyo ayeke nokwiilonga iinima yaafele. Ohaya  mono aakuluntu noshowo yalwe ye ya vule taya galukile komagumbo ya kolwa nopoompito dhimwe mbaka oha ya kondjithathana omolwa uukolwe, naashika ohashi kuthwapo kaanona. Onkene aanona otaya putuka yaana esimaneko lyaantu noshowo lyomaliko gaantu yalwe. Okwa ti ngele aanona inaya putudhwa monkalo yili nawa ota ya ka koka ongo aakuluntu yaana omikalo.  Aamwetu otaya putudhwa monkalo yevundakano, moka to adha aakuluntu taya nu omalovu, taya tukathana noku kondjithathana,” Kaapanda a ti.

“Otuli shili monkalo ondhigu, aakiintu yetu otaya hepekwa nokudhipagwa, molwashoka aamwetu oya ninga ya fa aasamane naakulukadhi omanga yo inaa ya hokana. Ndhika kadhi shi oohedhi dhetu, otwa kanitha omithigululwakalo dhetu, monakuziwa omumati ngele okwa hala omukadhona opo a hokane, oha popi naakuluntu yomukadhona ngoka oku ya tseyithila elalakano lye kombinga  yomunona gwawo. Pethimbo ndika shika ihashi ningwa, shila oto uvu owala omukadhona a nyengwa kograde 10 oto mu uvile kOshakati hoka iihokanitha komulumentu ngoka he mu futile ondunda moka hazi. Omathimbo gamwe okuna aalumentu ye vule gumwe, molwashoka ookuume ke mboka oha ye mu gwanithilepo kehe gumwe iinima mbyoka a pumbwa. Uuna nee gumwe gwawo taka dhimbulula kutya ha ye awike shikwetepo pomukadhona ngoka, oshilanduli otashi kala oshiwinayi ngaashi shoka sho ku dhipagwa. Moompito oonkwawo aanona yaamati otaya zi megumbo uule womasiku gontumba ihe sho  taya galuka okweetelela ohauto, aakuluntu ohaya ligola ashike, kapena ngo ta pula kutya ohauto oya zi peni. Unene tuu sho tashi vulika omumati ngoka nokulonga iha longo. Otashi vulika ngiini omuntu a mone iimaliwa yokulanda ohauto muule womasiku omashona? Aakuluntu otwa pumbwa okupula omapulo,” Kaapanda ta ti.

Okwa ti ooveta dhoshilongo odha yela, onkene kehe gumwe okuna okutseya kutya kapena gumwe ena uuthemba oku kutha omuntu omukwawo omwenyo.

Ta ti inashi pitikwa opo omuntu nenge aantu yiikuthile oveta yo yene, oshoka moshilongo omu na omulandu noshikondo shuuyuki sha tulwapo okutokola iihokolola mbyoka itaa yi vulu okupotokononwa kaantu yoyene.

“Otwa hala moshilongo shetu mu kale oveta nelandulathano, onkene otuna oku landula oompango. Otatu ningiipo shike opo tu kandulepo omadhipago ngaka moshilongo? Ngiika otwa pumbwa okutulapo elongo tali dhengele lyooveta unene moshitopolwa Omusati, molwashoka omo muna unene iiningwanima oyindji yomadhipago,” Kaapanda a  ti.

LEAVE A REPLY

Please enter your comment!
Please enter your name here