Onda a udifwa nai kOvakahao

1
299

“Fye inatu hala oku udifilwa komuwiliki e na outondwe nafye. Omubisofi oku na omhepo yokufininika ovanhu”, ovakwaneongalo ta vati.

OKAHAO – Omubisofi  wongeleki yaELCIN koshikandjongeleki  shokouninginino Josaphat Shanghala, ota ti okwa udila onghenda eongalo laKahao eshi la tameka oshivike shipe  inali uda Elongelokalunga  Osoondaxa ya dja ko.

Meenghundafana noshifo eshi, Shanghala okwa ti, Osoondaxa ya dja ko eongalo laKahao, ola tauluka  Onhokolwa  5(27,a) yOngeleki ya Elcin oyo ya ufa opo ku kale ElongeloKalunga Osoondaxa keshe, olo la ufwa opo li ningwe moipafi yeongalo.

Ashike ovakwaneongalo ovo va popya naKundana, ova holola kutya Osoondaha yadjako ova anya oku ningilwa ElongeloKalunga kuShanghala shaashi oku na oita navo.

“Fye inatu hala oku udifilwa komuwiliki e na outondwe nafye.

Omubisofi oku na omhepo yokufininika ovanhu, eshi a hala osho ashike ha kala a hala shiningwe, iha tambula ko omadilaadilo nomaliudo ovakwaneongalo,” umwe womovakwaneongalo ta ti.

Eshi a talela po eongalo laKahao moshikandjongeleki shokouninginino moshitukulwa shaMusati moSoondaxa onhivali yaFebuluali, Shanghala ka li a pitikwa ku ninga ElongeloKalunga meongalo, ngaashi vati a li e shi pula monhumwafo oyo eva tumina oivike ya djako.

Shanghala okwa holola kutya elalakano laye okwa li okutula omaongalo moshikandjongeleki shaye pamwe, eshi a mona eleloongalo laKahao le li kufila eenghono di li omhinge nokatongotongo.

Ta weda po kutya, pexulilo laJanuali okwa shangela eongalo laKahao opo ngeno va kundafane mexuliloshivike sla djako, ashike eongalo ola alula ombapila tai anye efaneko eli.

Otaku hokololwa kutya mOsoondaxa yoikolokosha, Shanghala nahamushanga waye omufita Paulus Heita, ova ya kOkahao oko tete va popya neleloongalo moshinyanga, tava pula opo ngeno omubiisofi a ninge omambo, ashike eleloongalo ole shi anya.

Omukulunhu weongalo pamwe nahamushanga tava i  keongalo va ude edilaadilo lalo, ashike neongalo ole shi anya.

“Konima yefimbo onda ka yamo mongeleka, ame mwene handi pula eongalo ngee ola hala ndi li ningile ElongeloKalunga, tali ula nge moipafi  tali ti inda, inda,” Shanghala ta hokolola nenyeme.

Omubisofi Shanghala  ta ti, okwali a hala a shakene  neongalo opo, li tameke  ondjila ipe. Ta ti eleloongalo le mu lombwela kutya eongalo oli na ombili, osheshi ashike ombapila ei a shanga opo ya leshelwa eongalo efimbo ve li nale moshinyanga.

Shanghala ou ta i moshipundi shetulumuko pexulilo laFebuluali, okwa longa moshikandjongeleki  shokouninginino oule weedula 26,  a lela eongalo laKahao, nomaongalo makwao monooli.

Okwa holola kutya, oku udite eongalo laKahao, olo le li teekelwe nokufiwa po kuNakambale [Martti Rautanen] oule weedula 30, ola pumbwa oku udifwa ko kutya ola fa omaongalo makwao. Netalele po laye, ola li tali lalakanene oukumwe.

Lwopefimbo eli odula ya dja ko, ovaKahao ova ningile omunyanyo fiyo keembelewa dongeleki yaElcin kOniipa moshitukulwa shaShikoto oko va twalele omukandakemo wavo kOmubisofi Omuwiliki Dr. Vaino.V. Nambala.

Eongalo okwa li ta li nyenyeta kutya inali panda ewiliko laShanghala molwaasho a hala oku lundulula omufita waKahao Hulda Shau-Iitana kOkambembe moshikandjongeleki shokouninginino.

Nande va twala omukandakemo komubisofi omukulunhu, oupyakadi inau kanduka po.

 

 

Komutoolinghundana

1 COMMENT

  1. Egongalo eholike, Tseni olutu lumwe muKristus, Oku ninga enkanka oku uvithilwa komumati gwaKalunga okwo okugeyitha ombepo ondjapiki. lesheni Aaefeso 4:1-32. Dhindhilika Okashona 27 no 30. lesheni ishewe Aaefeso 6: 1-20. Ondi wete Eitaalo lyeni olya yelulwa po koohapu dhika. omishangwa dhomombimbeli ota dhi popi kutya kaleni mwiilongekidha oshoka ethimbo notundi kamu li shi esiku ndyoka Omuwa teya, osha vulika ethimbo mwafadhuka po euvitho olyo Omuwa gweni ali eya. Kambadhaleni mwaageyeke ombepo ondjapuki opo egeelo lyOmuwa lyaa gwile kombanda yeni. Omuwa nalundulule okukala kweni ongomilonga dhomvula kevi lyokuumbugantu, medhina lya Jesus gwa Nasareth nda galikana, Amen.

LEAVE A REPLY

Please enter your comment!
Please enter your name here