OoEmbundangele nayo oya tameka osikola

0
185

Ku Maria Namupala

 

ONDANGWA – Opwa piti owala omasiku omashona sho osikola ya tameke sha kwatela mo woo nuunona mboka opo wa tameke oskola lwotango wayi mootundi.

Owundji owa li wa nyanyukwa noonkondo molwa eyo lyawo kosikola.

Onanguwo Kindergarten yimwe yomiikunino mono  hamu nongekwa uunona elongo lyopetameko omanga inaa wu ya poondondo dhopevi lela. Okinda ndjino oyili momukunda Ongenga mOshikandjohogololo Okatyali.

Osikola ndjino oya totwapo mo 1993 mewiliko lya Lylie Shangula ngono oye eli omulongi pokinda oyo tuu ndjika sigo ongashingeyi. Elalakano okwa tala onkalo yopomukunda gwawo nokwa kambadhala a totepo okinda, ye a vule a putudhe oshigwana shokomongula.

Aanona yethike lwopo20 ohaya  hiti okinda mpaka nuuna nee wa piti ohawu ka tsikila ondondo ya landulako pudhimwe dhoosikola  dhili mOshikandjohogololo shika.  Shangula okwa ti kuye kashishi nande oshidhigu okulonga nuunona oshoka oshinima ha longo nasho esiku kehe na okuna ohokwe a putudhe uunona wu ka kale sha moshigwana oshoka oshigwana inaashi longwa kashina onakuyiwa.

Okwa holola kutya wumwe womuunona mboka a longa poshikunino she owa ninga aalongi, aapangi shono e wete shili etumba kuye na oshe mutsu omukumo a longe nuudhiginini ye a yambulepo oonkalamwenyo dhuunona mbuka okuza kepipi eshona lela noku mona woo esimano lyelongo.

Kombinga yofuto pokinda mpaka aavali oyo yene haya futu naashoka yenapo. Okinda ndjino oya pelwe omakwathelo oku ziilila kUuministry  wuukashike ko okantu mono mwa kwatelwa iipeleki oshowo omitenge na oya tungu ehala lyawo na ngashingeyi ohaya longele mongulu ya tungwa nawa.  Shangula ta gwedhako kutya okwa pandula Kansela gwawo, Joseph Mupetami oshoka natango otaya mono omakwatho okupitila mOmbelewa ye ngaashi ali eya pa iipundi  mbyono haya longitha.

Pehala mpano opena olusheno nomeya, omulongi pokinda mpano okwa ti mongashingeyi oya pumbwa owala omakwilika niidhanitho yopondje opo uunona wu kale woo tawu inyanyudha uuna waya pefudho. Ta pandula woo aakuluntu sho haya sile nawa oshimpwiyu uunona ngele ta wu ya kosikola oshoka ohawu ya wa longekidhilwa nawa uubaki nuundini wawo woontaku onkee ihawu mupe nando uudhigu washa. Okwa ti ota tsikile okulonga uunona ngaashi tashi vulika oshoka owo oongudhi dhokomongula. “Elongo olyo oshipatululo shonkalamwenyo yomuntu kehe, o te kambadhala ndiitulamo ndi  yambulepo oonkalamwenyo dhuunona wetweni,’’ ta ti ngaaka.

LEAVE A REPLY

Please enter your comment!
Please enter your name here