Otwa yuka peni?

0
212

Oshivike sha djako, osho shimwe shomoivike oyo idjuu nokudimbiwa koikundaneki, noshoyo kOvanamibia vahapu, omolwa omahokololo oo a holoka mo.

Moshiningwanima osho shipe osheshi sha ningilwe kongeleka kOkahao, omo ovakwaneongalo vomeongalo olo va taataa omubishofi mongeleka, ile va anya eva ningile Elongelokalunga. Oshiningwanima shi halula, noshi udifa nai.

Umwe ote li pula kutya oshike sha enda mongava? Oshike sha enda meemwenyo detu, fye ovaAfrika, fye ava twa tekulilwa efimaneko lovakulunhu, no mweemwenyo dovaKriste, ovo va tekuliwa oshipango shitine? Mbela oshike sha enda kOkahao, nomOngerki ya ELCIN?

Ovanamibia, otu na oku kendabala oku yandja oshiholelwa shiwa koshiwana shokomongula, tu shi tekulile efimaneko, eenghundwa noku lihonga okuhanga etwokumwe. Ngeenge nee hatu lengaifa nokutumbulila ovakulunhu ile ovakomesho vetu oitya ii, otwa yandja nee efano lili ngahelipi kounona ovo yoo navo vali mongeleka yaKahao efiku olo mOsoondaxa?

Osho twa, hala va kale tava kandula po omikundu ngaho monakuiwa?

Kakele kwaasho, ovaleli, ngee nee vopamifyuululwakalo, ile vo pamhepo, navo ina va longifa oveta unene, nomukalo ou tau findile ovalanduli vavo kongudi. Oveta opo i li shili ashike na i longifwe pauyuki. Mofikola youtoolinghundana omuna oshinima ta shiti oveta haalushe ina ouyuki, nouyuki haalushe ha uli moveta. Eshi inashi kala nande shili mongeleka yaELCIN.

Naku dimbulukiwe Omuingilisha ou a tile, apa pena ovanhu vewete va findilwa kongudi, kapa kala ngoo ina pa holoka oikolokosha. Naku dimbulukiwe vali kutya Ongerki ya Elcin noya Anglican oda totelwe po shaashi Martin Luther nokonima King Henry VII novalanduli vavo, va li inaa va twa kumwe noveta yaKatoolika. Ngeno mbela hasho osho, ngeno ongeleka yaKatoolika ka Rooma ngeno oifike peni?

Oveta oshinima shiwa, na i longifwe alushe ashike oveta yongerki nai longifwe okuhanganifa, okukalekapo ombili, etwokumwe nouyuki. Ovaleli, nava pwilikine, ndele tava kandula po omikundu pefimbo. Nena omOkahao, mongula kushi apa vali ta shi ka ningwa, ohandje imwe va ti oya xwika ofuka, loo edina lokambwa oha li udikila kukamukweni. Pamwe opena ovo ve wete Ovakahao va ninga nawa.

Ovakahao ova ningile ehololo madilaadilo odula ya djako. Sha hala kutya ongerki oya kala nefimbo lodula aishe oku kandula po oupyakadi oo. Paunhu, nge to tale opa li pena omhito omananafano oo a kala pokati komubiishofi neongalo olo, ngeno a kandulwa po nale omangha nokuli oshiningwanima shomOsoondaxa ina shi ningwa.

Sha longwa oshapwa ngoo nee, ashike monakuiwa ovaleli vetu, ngee vopamifyuululwakalo, ngee ovo pa mhepo, ove na okudimbuluka kutya omakuyunguto oita  (hayeeyi nee yomauta), iha i holoka ashike mopolitika, ashike keshe pamwe otaa dulu oku holoka, ashike oshinima shiwa okukendabala oku kandula po oupyakadi omanga ina u kolonda.

Keongalo laKahao nokomubishofi a yuka moshipundi shetulumuko, kape na oshinima shiwa shidule ediminopo -ombili na i pangele.

Nehalelo oleli kutya Elelongerki laElcin, olo li dane onghandangala, moshikumungu eshi, nokukala oshiholelwa keengerki adishe moshilongo.

LEAVE A REPLY

Please enter your comment!
Please enter your name here