Ovakwanedimo vomufekelwa medipao lyaMirjam ovahaluka

0
350

EPOKO –  “Paife vati oha kala ashike eli oko ta kuu, ta kuu vati oufiku aushe ta ufana Mirjam. Mirjam ote mu ufana, oku mu hole, ye okwe mu dipaa? Na kale oko eli oko, na kale ashike oko [kodolongo]…. Fye otwa tila, fye otwa kumwa”.

Oluhodi, onghumwe, oumbada, nepiyaano oyo oimwe yomoitya oyo ta i dulu oku longifwa oku hokolola omaliudo ooinakulu va Ananias Nailenge eshi eva lombwela kutya okwa dipaa omukainhu muninie lela Mirjam Tuyakula Nandjato.

Nailenge okwa li eli hokolola ye mwene kutya okwa dipaa Mirjam momukalo u nyanyalifa, eshi emu twa tete nombele  oyo ya pita momutima waye noku mu teta omutwe.

Oshiningwanima eshi shinyanyalifa, sha ningwa etivali la djako mOshakati, moshitukulwa shaShana, Nailenge okwe shi hokolela yoo pauxupi inakulu ou a dala ina meekulu Klaudia Nhinda (91) na Mukwamhalanga waHaufiku, mumwaina wa waNhinda.

“Omolwashike eshi ningila? Oshike sha enda po? Fye katu shi uditeko, katushi kutya omhepo oyo, yii ya ya mokaana ketu oya shike. Fye katuna oitya nomatumbulo a wana oku ulika eshi tu uditile kombinga yoshinima eshi. Ihatu kotha vali oufiku,”

“Fye ohatu lili okaana kovanhu kanini, opamwe novakwapata vako, nonande inatu ka shakeneka palutu. Onghalamwenyo yetu paife oya piyaanekwa fiyo alushe koshiningwanima eshi shihe shi shoupanhu, oshidjuu oku diladila. Onda dala ounona vahapu veli omugoyi ndele kape na nande umwe womuvo a longa oilonga yomulaulu ngaashi okaana aka,” Nhinda ta ti, ye ta hekumuna.

Mokudimbulukwa  Etivali, Febuluali 4, 2014, efiku olo Nailenge eva etela onghundana inyayalifa, meekulu waNhinda otati okwali e li momuti u li mepya, omo vali ve li omutumba nomukulupe mukwao wopoushiinda.

“Okwe ya ndee ta xulile kokule nomuti, ta ifana waNhinda shaashi okwa fa a li ina hala ava tu li momuti tu ude eshi ta popi. Eshi waNhinda a ya popepi naye okwa didilika odalate i li mofingo. Eshi a pulwa kutya odalate oyashike okwati okwa ti okwa li ta kendabala okuninga oshinima shimwe ndele inashi longa. Okwa ti ‘…onda li nda hala ngoo okuninga okaima kamwee ngoo, nda hala okulimangeleka nde mboli Kalunga ine shi hala…’” Mukwamhalanga  waHaufiku.

Ovakulupe ava tava hokolola kutya moku uda odo va lombwelwa komutekulu okwali va haluka no vatameke oku kakama shaashi ove shishi kutya ka li ta ningi omashendjo shaashi oshinima eshi a li ta popi osha kula neenghono.

Ovakulupe tava hokola kutya omutekulu okwe va hokololela kutya okwa li ngeno ta kendabala oku li diapela mokamuve ke li mepya, ashike okwa piyaanekwa kounona ovo va li ta va ende po. Opo nee okwa ya meumbo eke li mangelekele ngeno monduda yaye ashike odalate oyo a li te li mangelekifa oya tokoka.

“Eshi a mana ehokololo laye okwe tu lombwela kutya ota i kopolifi kOutapi eke li yandje. Opo twe mu lixula opo. Otwa tondokela mondunda omo a ti okwa li te limangelekele, noku ifana ovashiinda.

“Monduda otwa hanga mo ondalate ya mangelwa moshiti meembuli donduda noshoyo oumbapila voimbodi, oyo inatu mona nande onale, ashike otwa lombwelwa kutya oshinima osho epangwe. Otwa ya vali komuti oko a li ta kendabala oku limangelekela notwa hanga ko eedalate… Meme okaana! Eedalate odo oko di li natango, katushi kutya ohatu di ningi ngahelipi, fye otwa tila oku di kuma,” Nhinda ta ti.

Pahokololo la inakulu, Nailenge okwa kala puye momukunda Epoko, oshinano oshixupi okudja kOkalongo konima ashike eshi a tova. Okwa dalwa komukainhu ou wonghelo ya waNhinda, Julia Mathias oo emufiya po nokukahombolwa komulumenhu umwe kOngandjera, konima ashike yokutovifa.

Kundja nghee Mathias a fiile po Nailenge ohanana ina monika vali, ye vali xe oo haku hokololwa ashike kutya ombwiti yokoKapa, keshivike.

“Omumati oo okwa kala pwaame okudja kounona waye, okudja tuu efiku ina emu hukulila apa, opo a ka hombolwe no ina tala vali konima. Okwe (Mathias) tu lombwela kutya he yokaana oku li koKapa, fye shidalelwe tu mu mone,” inakulu  ya Nailenge ta ti.

Ovakulupe ova  ota va ti Nailenge okwa putuka onga okaana ke na omikalo naashi ka djemo meumbo ka ka kale kOshakati, okwa kala nokutalela po inakulu efimbo nefimbo. Okwa kala puvo fiyo efimbo eli elikonda mofikola younona a ka kale kOshakati.

“Eshi a dja apa a ya kOshakati, ka twa li tu shishi kutya oha di peni, fye ka twa li tu shi kutya oha kala na lye, okwe tu lombwele ashike kutya oku li kOshakati. Ohe uya okutalelapo inakulu, shaashi ina ke mu shii. Paife opo tu udite kutya okwa kala ha kwafelwa kokakadona oko a dipaa,” osho waHaufiku a hokolola.

 

KuKakunawe Shinana

LEAVE A REPLY

Please enter your comment!
Please enter your name here