WHERE OTHERS WAVERED – Olweendo okuza mo South West Africa nondjila okuza moVenduka oku ya koFrancistown

0
227

Onda tameke olweendo lwandje okuya pondje yoshilongo momasiku 29 Febuluali 1960. Otwa zi moVenduka molukanda olukulu na Johannes Karuaihe okuya ko Gobabis. Karuaihe okwa li uuka kOtjinene noshowo kEpukiro. Okuza moGobabis otwa tsikile ondjila yetu mokati kuusiku sigo opoongamba dha Botswana nena, na South West Africa, pethimbo ndyoka oshilongo shoka osha li oshigamenwalongo shaBritania hashi ithanwa British Bechuanaland Protectorate. Onda li ndapewa olefa mehauto lya Stanley, ngoka a za mo South West Africa ihe pethimbo ndyoka okwa adhika a kala mo Bechuanaland. Konyala lwopokati kuusiku, Stanley okwa helula ndje popepi na Kanaindo oshinano shookilometa omilongo 20 okuza pomweelo gwopoongamba.

Onda ende koompadhi okuza mpoka sigo nda adha ondhalate ndjoka yopoongamba na onda piti kohi yondhalate nokuya moBritish Bechuanaland Protectorate.

Mesiku 01 Maalitsa 1960, ondi iyadha lwotango ndili kokule nokukwatwa kaathiminiki yepangelo lya South Africa. Nokomeho gandje okwa li iilongo oyindji mbyoka ya li kohi yuukoloni wa Britania, moka ndali ndina okupitila  omanga inaandi thika ko Dar es Salaam koTanganyika, oshilongo shoka sha li shina ko natango ashike omumvo gumwe opo shi mone emanguluko.

Pethimbo ndyoka iilongo mbyoka ya li ya manguluka mwAfrika yi li popepi oyo Egipiti, Libya, Morocco, Ethiopia na Liberia, naambyoka opo ya adhika ashike ya manguluka omwa li mwa kwatelwa Sudan, Guinea Conakry, Mali na Ghana.

Nonando oshilongo shandje kasha li shi shiwike nawa, molwashoka kasha li sha kolonyekwa kiilongo iinene yokuuninginino, ihe osha li momake ga South Africa, einyengo lyomOld Location nedhipago lyaakalimo yamo moVenduka konima yoomwedhi ndatu olya li onkundana onene ya nyolwa kiikundaneki opendji. Oshikwawo oshipala shandje noshowo edhina lyandje olya li li shiwike nawa unene tuu miikundaneki yomoshilongo South West Africa nopondje yoongamba.

Ishewe aaleli yopapolitika miilongo moka tandi pitile oku ya koUN onda li nda tegamena kutya oya uva kombinga yomishangwa nyenyeto ndhoka dha shangwa kOmusitagongalo, Michael Scott, Kozonguizi na Kerina dha tuminwa kIigwana Hangano.

Opwa li aantu yokombinga yoshigwana shetu yaaHerero mboka ya kala pOmakunda okuza tuu nkene ooyinakulu ya fadhukilepo okudhipagwa kaaNdowishi pethimbo lyiita pokati kaaNdowishi aaHerero naaNama pokati ko 1904-1907. Oya li ye shi ndje, onkene opwa li pwa longekidhwa okupitila mOmukwaniilwa, Hosea Kutako kutya otaya ka kwathela ndje konima ngele ndeya meni  lyaBechuanaland. Tango onda yi kOmamuno handiyaka yoongamba moBechuanaland. Osha li mokati kuusiku, onkene inandi mona nando omuntu, onkene onda ende koompadhi sigo opOmakunda. Osha li konyala koongulasha naantu oya li ya kotha natango sho nda thiki pomukunda ngoka. Onda yi pondunda yimwe eta ndi konkola pomweelo. Mondunda omwazi omukiintu, ngame nonde mu popitha moshi Herero.

Okwa li a dhiladhila ngiika kutya ngame ogumwe gwaantu yopomukunda gwawo na okwa ithana ndje ndi ye meni lyondunda ye. Okwa li kuna uutalala pethimbo lya Maalitsa na okwa li taku loko. Okwa pula ndje ngele kandi uvite uutalala. Onda ti aawe ondina ondjatha, onkene onda hala oku kala pondje. Onde mu pula kombinga yaantu mboka ndishi, naamboka ndali ndapewa omadhina gawo. Okwa lombwele ndje kutya oya ya kohango pomukunda gwopopepi na otaya galuka ongula ngele kwa shi. Okwa pendje omahini. Onde mu pandula no nda ti  onda humbata ekende lyotee na onda adhika ashike opo nda nu otee ndjoka. Okwa li omuntu ena omwenyo omwaanawa nontalanteni ye ndjika oya uvitha ndje nawa.

Pethimbo lyomutenya onda tsakanene naamboka ndali nda tegelela. Onda li unene popepi noongamba, onkene esiku olyo tuu ndyoka onda longekidha kutya ondina oku huma komeho okuya kokule kashona noongamba onkene onda ende pamwe naathindikili yandje twa kayila oonkambe oku uka meni lya Bechuanaland. Otwa yi pehala limwe naampoka onda landa oshikombo etatu shi yothapo. Esiku lya landula ololi yimwe yomunafaalama gwoshilumbu oye ya pehala mpoka. Onda li nda zala ombulukweya yandje okugulu kumwe okuhupi kokukwawo opo kutiwe ngame ogumwe ashike gwaakwashigwana yaampoka. Opamwe naathindikili yandje aaHerero otwa londo mololi ndjoka yomunafaalama, nokofa yandje ya holekwa kohi yooshako. Otwa li tuna oku futa iithilinga iyali nomapeni gahamano omolwa oku faalelwa huka.

Mwene gweloli okwa li ashike mondjila okuya kofaalama ye naasho a thiki mpoka tse otwa helukamo opo tu tegelele ishewe ehauto limwe. Ndika olye tu faalele sigo opehala hali ithanwa Kai mpoka omunafaalama a li ena ositola.

Okwa li woo ko South West Africa ongo omunafaalama popepi nOshaanda. Yamwe yomaaniilonga ye yaza koshitopolwa shaKavango okwa zimo nayo moSouth West Africa noku ya nayo koBechuanaland. Sho oshitenya shamwene gwositola sha mono ndje osha mono oontya koompanda nosha dhimbulula kutya ngame Omuwambo . Osha ti “ondishishi kutya omulumentu nguka Omuwambo” osha matukile pondje yositola noku ithana  omuniilonga gumwe omuKavango. Pethimbo ndyoka onda li nda tila. Sho omulumentu omuKavango eya okwa tala ndje, ngame onda popi mbala ndati kandishi Omuwambo, meme omuHerero natate Omuwambo, ndele kandi endeleko nando olumwe kOwambo. Onkene omulumentu nguka omuKavango okwa si uunye  okupula ndje nokwa thigi ndje po. Onda li nda manguluka nuutile owa thigi ndje po, unene tuu sho nda li nda dhiladhila kutya aantu mbaka otashi vulika ya kale nomaipulo kombinga yandje no tashi vulika ya kwate ndje eta ya shuna ndje koSouth West Africa.

Onda landa uubisikiti positola mboka twa li nomuthindikili gwandje okuza kOmakunda sigo opehala mpoka. Otwa kala mpoka twa tegelela olefa, ndele aakalimo yaampoka oye tu lombwele yati oolefa mpoka odha pumba noonkondo tashi vulika pu pite nookuli oshiwike shimwe okuza mpoka oku ya koSehitua. Omunafaalama okwa li ena ondhila, ndjoka a kala ha longitha oku fala aatalelipo. Otwa li twa tseya kutya ngele otwa ti ne tu fale nondhila ote ke tu futitha ondilo onkene otwe mu pula etu fale noshihauto. Oshinano okuza poKai okuya koSehitua oomaila 100 onkene okwe tu pula oponda yimwe momaila kehe. Kandali ndina ehogololo limwe onda futu ashike oshoka kandali nda hala oku kala pehala ndyoka ethimbo ele molwa omukiintu nguka a dhimbulula ndje ongo Omuwambo.

Omunafaalama okwe tu helula po Sehitua, mpoka nda kwatathana na nakusa, Daniel Munamava, ngoka nda tseya pethimbo a li ha ende nOmukwaniilwa Munjuku Nguvauva gwaaMbanderu pomathimbo ya li ya talelepo koVenduka. Ezimo lyawo olya kwatathana naandyoka lyomukulukadhi gwandje, onkene okwa li ha talele ndje po  moVenduka na okwa li eshi ndje nawa.

Okuza koSehitua, tse na Munamava otwa yi koMaun, hoka etu monene ehala meloli ndyoka hali humbata aaniilonga unene tuu aAngola okupitila moRundu moSouth West Africa moka ya zalekwa okaholo ku WENALA okuza moka oha li yi ko Francistown hoka aaniilonga mbaka taya ka londa oku ya kiilonga koomina koSouth Africa.

Pethimbo ndyoka omuthindikili gwandje okuza kOmakunda okwa li ena okushuna kegumbo oshoka okwa li ta ka hokana meni lyomasiku omashona. Onda futile olweendo lwe okushuna.

LEAVE A REPLY

Please enter your comment!
Please enter your name here