Aanasikola yopOluwaya Combined School ya shuna kosikola

0
327

Ku  Clemence Tashaya

 

EENHANA –Aanasikola  pOluwaya Combined School mboka ya li ya shunithwa komagumbo konyala iwike iyali ya piti molwaashoka ka ya li ya zala omuzalo gwosikola oya galukila ngashingeyi mootundi.

Kundana okwa kundanekele omathimbo ga piti kutya aalongwa mbaka oya li ya tuminwa komagumbo  molwashoka ka ya li ya zala omuzalo gwosikola. Ihe ngashingeyi  omukuluntu gwoshitopolwa penongelo mpoka, Fillemon Namwandi ota ti ayihe oyi li nawa naanasikola ayehe oya galukila mootundi ngaashi shito.

“Oshi li ngeyi kutya tse inatu tidhila nenge tu shunithe aanona mbaka komagumbo ihe nguka ogwa li omukalo oku ithana aakuluntu yawo  opo ye, ye tu kundathane kombinga yomuzalo gwosikola. Eeno otwe ya shunitha komagumbo ihe oya galukile kootundi esiku lya landula konima yo ku etelela aavali yawo. Ayehe ngashingeyi oyi ilandela omuzalo gwosikola onkene sho tatu popi ngeyi ka pe na omunasikola eli kegumbo omolwashoka kena omuzalo gwosikola.Oshikwawo yamwe yomaanasikola mbaka oya hokolola iifundja kutya oya tumwa komagumbo ,’ osho a ti.

Moonkundathana ndhoka Kundana a ningile nomukuluntusikola, Loina Shinana, okwa pelwe efatululo kutya, aanasikola oya tuminwe komagumbo ongo omukalo gwo ku thiminika aavali yaanona mbaka opo ya holoke kenongelo, unene tuu shoka yamwe yomuyo iha ya holoka kiigongi nando mbika oyi kale ya longekidhwa yo aakuluntu oya ithanwa.

Oyendji yo maavali oya li ya nyenyeta noku fala omakemo gawo kewilikongundu lyenongelo konima sho ehokololo ndika lya kundanekwa ku Kundana.

Omulongwa ngoka a li a ithanwa oye Lukas Petrus e li mo grade 10 posikola ndjoka okwa li a pewa edhina lya puka.

Edhina lye lyomondjila olyo Joseph Nandenga eli mograde 8 posikola oyo tuu ndjika. Okwa li kwa tiwa okwa shunithwa kegumbo shono keena omuzalo gwe nongelo.

Ndele pahapu dha Fillemon Namwandi, Joseph Nandenga okwa thigipo osikola ye mwene opo a ka lande omuzalo gwe gwosikola inaa thiminikwa nando oke wiliko lyosikola ndjoka ngaashi sha li sha lopotwa konzo ndjoka ku Kundana.

LEAVE A REPLY

Please enter your comment!
Please enter your name here