Aayugi momudhingoloko gwa Karibib ya kwatwa kopolisi

0
266

Ku Kakunawe Shinana

 

ONGWEDIVA –Ongundu yaa yugi ya thikama maantu yane oya kwatwa kopolisi yomoshitopolwa shErongo oshiwike shika. Ongenga ndjika oya thikama momuniilonga nale gwombaanga ya Venduka moshitayi sha Shakati, Albert “Alu” Kahembe  gwoomvula 31 opamwe na  Julius Iipinge gwoomvula 30, Elias Amos gwoomvula 29 na David Oiva mboka ya holokele komeho gohofa yamangestrata moKaribib oshiwike shika taya lundilwa ya yuga no yi iningi ya fa aapolisi.

Ota ku tiwa momasiku 13 ga Febuluali  2014, Kahembe netanga lye oyi izaleke ya fa aanambelewa yopolisi noku yuga iihakanwa yawo miineya ya kaandje ye shi ningi mondoolopa ya Karibib pegumbo lyonomola 100 mepandaanda lyoSchool noshowo pofaalama ya Kanona  yili ookilometa omilongo 33 pokati koKaribib nOmaruru. Omahala ngaka oga P W. Vollprecht ngoka ha kala moka oye na efolo lye.

Muusiku weti 13 Febuluali , ongundu ndjika yi izaleka omizalo omibulau dhopolisi noshowo uundjatha mboka hawu adhima momilema, aniwa oye ya pegumbo lyo Vollprecht mpoka yaadha omukulukadhi gwe oye awike. Aniwa oye mu ulukile ombapila ndjoka yi na uuthemba wo ku hadha egumbo lye oku za koshitopolwa shoondjembo shopolisi. Oya ti oye ya oku konga iilwitho mbyoka yaa na oombapila  ta ku hokololwa aniwa yi li megumbo ndyoka. Oya li taya hingi ohauto yolwaala lwoshisiliveli  yoToyota Hilux2,7  yi na onomola yopolisi POL 7796.

Omukulukadhi gwa Vollprecht okwa dhengele omusamane gwe ngoka a li kee li megumbo ethimbo ndyoka aapolisi yiikengelela mbaka ya thiki mpoka omanga mboka ya tegelela. Sho Vollprecht a thiki mbaka oya hadha egumbo lye naashoka, ina ya adha mo shoka ta ya kongo oya lombwele mbaka ye ya fale kofaalama ko Kanona.

Hoka oya tsikile oku hadha egumbo moka ya kutha ombistoli yimwe, ondjembo yimwe yo automatika, oondjembo mbali dhuukongo dhonomola 270 oombistoli mbali dho 9mm, yimwe yorevolver, iikwamalyenge, oolaptopa mbali, oocellphona mbali . Oya kutha po woo oodola omayovi 2 800 koomuma nomamanya guuyamba.  Oya galukile ishewe pegumbo moKaribib no ku hadhulula ishewe egumbo ndyoka moka ya yaka ishewe omwaalu gwiimaliwa gwaashiwike. Oya manga aahokanathani mbaka ya ti otaya yi kombelewa yopolisi opo ya ka tale ngele iinima mbika oyaantu mboka.

LEAVE A REPLY

Please enter your comment!
Please enter your name here