Aina Shipindo a xulifa

0
423
Aina Kristi Shipindo

ONGWEDIVA – Odalele yaNgwediva Aina Kristi Shipindo, weedula 53, okwa xulifa mouvela wokafimbo kaxupi.

Shipindo okwa xulifila moshipangelo shaMedipark mOngwediva konima yomafiku manini eshi a li a lekelwa moshipangelo omo.

Pauyelele ou wa yandjwa kovakwapata, nakufya Shipindo okwa tandwa petameko laFebruari neudo, nokwa lekelwa opo a ye keumbo.

Keumbo okwa kala ko ashike omafiku manini nokwa alukila moshipangelo shaMedipark omo a xulifila komatango  oSoondaxa Febuluali 16, 2012.

Shipindo okwa tamekele oilonga moSWABC mo1989 omo kwali ha longo onga omuwapaleki. Modula 1993 eshi oNBC ya lekela  ovanailonga vamwe po, naye oumwe waavo vali va kanifa eemhito doilonga. Eshi pa ka holoka omhumbwe yomunailonga omuwapaleki, kexulilo lomudo oo, Shipindo okwa alulilwa moilonga yokuwapaleka.

Molwa oupenda waye mefimbo a kala ko NBC, oilonga okwe i shiiva nawa, ta yelwa a ninge omunailonga melimba leengalo mOshakati. Eshi osha weda ongushu keshiivo loilonga nokoitukulwa ikwao moNBC, onghee peemhito dimwe okwa yakula apa naapenya moNBC.

Omukulunhuwiliki wOraadio yOshiwambo mOshakati Helen Shiimbi, okwa hokolola Shipindo a kala omulituli moilonga a kala ehena, olungwenye ile omhelo nomunhu.

“Ohaku tiwa omunhu ngee afi oha ningi muwa, ashike ame ita ndi popile Aina mouwa shaashi a fya, mepeko laye olo li li mombelewa yange kamu na nande omushangwa ta u ulike a lwa ile a tanguna nomunhu nande efiku limwe.

“Aina oye omunhu umwe a kala iha anye nande oshilonga e shi pewa. Nokuli otwa kala hatu mu monifa oixuna omolwa omwenyo waye muwa. Otwa kanifa ependa,” Shiimbi ta ti.

Efyo laAina  Kristi Shipindo inali fiya ashike omwaka moNBC noko va yakulwa oshoyo kookaume  no va shiivikile , ndee eli ekanifo linene kounona vaye vane oumati, ovatekulu vatatu okamati noukadona vavali. Okwa fiya po yoo oundenge vatano osho yo ina meekulu Julia Shilombwelwa.

Oshivilodimbulo shaye osha tengenekwa shi kale ko komatango onena poshuumbo shaye pOngwediva, nepako omongula okudilila mOngeleki yaELCIN mOngwediva.

 

 

Komutoolinghundana

 

LEAVE A REPLY

Please enter your comment!
Please enter your name here