Ehangano lyaNamibia lyuudhano wo Rugby mompumbwe yoshimaliwa

0
218
Omunambelewa pitithi gwo Namibia Rugby Union (NRU), Sybrand De Beer. (Ethano: Otniel Hembapu).

Ku Otniel Hembapu

 

WINDHOEK – Nonando Ehangano lyUudhano wo Rugby moNamibia oli li kohi yewiliko ewanawa nelelo itaa li pewathanwa, onkene tuu natango ta li shongola mokunana aayambidhidhi pashimaliwa.

Omuwiliki omukuluntu gwehangano ndika, Sybrand de Beer okwa ti nonando oye li monkalo yompumbwe yoshimaliwa, yo ita ya shuna monima oku eta po omalunduluko omawanawa muudhano mbuka moshilongo.

Na oku na etegameno kutya ospana yopashigwana ya Namibia ota yi ka kutha ombinga muudhano wekopi lyuuyuni omumvo 2015.

De Beer, okwa ti ospana yopashigwana yoRugby yedhina  Welwitschias ota yi ka dhana nospana ya South Africa yaadhani mboka yeli kohi yomimvo 20 mu Mai nuumvo, po ope na oonkundathana tadhi tsikile pokati ka Namibia noospana mbali dha South Africa, ndhoka hadhi dhana mekopi lyo Currie Cup opo dhi dhane no Welwitschias ongo eilongekidho lyayo omanga inaa yi ka dhana uudhano mboka tawu pitike opo yi pite oku ya kuudhano wekopi lyuuyuni omumvo ta gu ya.

Namibia okwa tegelelwa e ke u dhane oku tameka mu Juni nuumvo.

Okwa ti nomalalakano agehe ngaka omanene ge na sha nuudhano mbuka, eshongo enene ndyoka lya taalela ospana ndjika olyo oshimaliwa.

Ihe De Beers oku na omukumo kutya aakwatheli naa yambidhidhi pashimaliwa ota ya ka joina NRU mo  ku mu kwatha opo omalalakano ge ga ninge goshili. Okwa popi einekelo ndika unene tuu sho a kundathana nomahangano gamwe naangaka oga ulike  ge na ehalo oku longela kumwe na NRU. “Onda ninga ekwatathano nomahangano gontumba, gamwe oga ti ita ga kwatha ndje omanga gamwe oga ulike ge na ehalo oku kwatha, onkene ondi na etegameno monakuyiwa.

“Uudhano pokati koWelwitschias nospana ya South Africa yaadhani kohi yomimvo 20 owa manithwa oku longekidhwa naambuka otau ka dhanwa momwedhi Mai.

Kombinga yuudhano noospana mbali dhomekopi lya Currie Cup otwi ipyakidhila natango  oku kundathana, ihe elalakano lyetu oku dhana omaudhano ngoka omanga Juni inaa gu sa,” De Beer a ti.

Kombinga ye kutho mbinga lyaWelwitschias muudhano wekopi lyuuyuni, De Beers okwa ti ehangano oli itulila iimaliwa molwashika  mbyoka ta yi ka longithwa opo ospana yi vule oku kutha ombinga, eshongo ndyoka li li po oondyoka ashike lyekwatho kombinga yoompunda omizalo  dhospana noshowo omakwatho miitopolwa yilwe yi na ekwatathano nuudhano.

Omumvo gwa yi , Namibia okwa tulwa moshitopolwa sha A muudhano woConfederation of African Rugby (CAR) konima yo ku sindanapo ekopi lya CAR African Cup, naashika oshe mu tula  mongundu yoospana ngaashi ndjoka ya Zimbabwe, Ivory Coast, Uganda na Madagascar methigathano lyoku kondjela ehala oku ka dhana mekopi lyuuyuni  mo 2015.

NRU okwa ti oku na etegameno natango kutya oonkambadhala dhe  oku hila aakwathi yopashimaliwa ota dhi ka ninga dho shili, omanga ospana yo Welwitschia ,ina yi ka kutha ombinga muudhano mboka tau yi pititha oku ka dhana mekopi lyuuyuni lyo Rugby omumvo tuuka.

Uudhano mbuka otau ka tameka oku dhanwa mu Juni nuumvo.

LEAVE A REPLY

Please enter your comment!
Please enter your name here