Mwene womokunda moumbudi woimuna

0
257

KuHelvy Shaanika 

 

ONGWEDIVA – Ovakalimo vamwe moshikandjohoololo Onyaanya, ove li hanga moikolokosha na mwene womukunda Engoyi eshi vati a kala a patela eengobe deenghani mekove laye efimbo lile ndele te di shangifa vati kedina laye.

Tomas Amateta okwa li a fininikwa oshivike shadjako opo a alule oimuna yovanhu oyo vati a kala a patela mekove laye oule wodula neemwedi donhumba.

Nonande Amateta yemwene a hokolola kutya ye kali a vaka po eengobe, no kali ena elalakano ile nokuli okudi nyolela kedina laye, omukalimo womomukunda Onandjaba, Alina Akwaake, omukulikadi waPetrus Kashile Akwaake, mwene weengobe ota hokolola kutya Amateta petameko okwa li ta kondjele eengobe davo.

Akwaake ta ti, nonande Amateta a kala neengobe odo efimbo lile, ina ninga onghendabala yokukonga mwene wado nande ngoo okushivifa nande omoraadio.

Akwaake ta holola kutya mo 2012 ova landale eengobe  deenghadi mbali, odo da kana konima ashike yomafiku manini eshi da landwa.

Pahokololo laye, Akwaake ota ti ova ninga nee eemwedi tava kongo eengobe davo, vo hava pula ngaho moraadio, nge pamwe opena ou edimona, ashike eshi ina shi pondola sha.

Omafiku aa, vamwe vomovaneumbo va Akwaake ove ke li twa nee meengobe odo dili mbali vedi hanga mekove laAmateta, tava hokololele oovene veumbo ovo va ka ya pamwe navo vaka pule Amateta.

Akwaake ta ti, petameko Amateta ina holola nande owii, okwati ashike nava ka tale eedokumende odo ta di holola kutya eengobe odavo shili.

“Eshi twe mu etela eedokumende okwa tameka tati eengobe kadi shi detu vati odaye,” Akwaake ta ti.

Oku ha twa kumwe oku okwa ka etifa opo pa ifanwe omalenga amwe, nokuya keembelewa dounaimuna oko konima kwa ka monika kutya Amateta okwa hangwa nale a shangifa eengobe odo medina laye.

Konima yefimbo, okwa ka ifanwa omalenga oo a ka kwafela oku potokonona omukundu, na Amateta okwa shunifa oimuna yovanhu.

“Fye otwa kumwa shaashi, oomwene vomikunda ovo ngeno hava lwifa oulingilingi, nokupangula ovo tava longo oilonga youlingilingi, ndee mwene womukanda ou oye vali eli moshinima shekengelelo,” Alina Akwaake ta ti.

Nonande oovene voimuna ve udite kutya Amateta okwa li a hala oku kengelela nokuluvilila po oimuna yavo, Amateta pauyemwene ota hokolola kutya, ye ka li a hala oku vaka po eengobe, nomolwaasho a hangwa edi lopota kouhamba.

Ta ti okwe di ingidile  moraadio ashike kapa li pena ou edi ila ko.

“Paife ngaha onda hangwa nokuli nda hala oku di twala kouhamba, shaashi omulandu osho tau ti,” Amateta ta ti.

Amateta ta fatulula kutya eengobe odo mbali kedina laye oda nyolelwako pa puko kovanambelewa vounamapya nounaimuna ovo va li veuya oku tunhila eengombe pomukunda wavo.

“Eshi eengobe da ya momhanga, oda ya mo pamwe nodange, ovanambelewa, eshi va shangela eenomola mokombiuta, ove di nyolela mo ashike kedina lange,” Amateta ta fatulula.

Amateta ta wedapo yoo kutya onghalo oyo ooAkwaake ve li humbata ota i limbilike shaashi, kava li va hala a konaakone nawa eenomola odo di li meembapila odo ve mu etela.

“Ngeenge eengobe odavo, odavo, nge kadi fi davo, kadifi davo, shaashi ame eshi nda tala eenomola odo dili pombapila oyo va etela nge ita di tu kumwe naado dili keengobe. Ame eshi nda li ha i va pula nawa okwa li ndi li momulandu woveta, nomolwaasho nda ka ifana omalenga amwe opo a tale eshi handi vape eengobe odo, shaashi omulandu woveta yopamifyuululwakalo osho tau ti,” Amateta ta yelifa.

LEAVE A REPLY

Please enter your comment!
Please enter your name here