Omukainhu umwe a dipawa va li

0
297
Nakufya Helena Shivute

Ku Helvi Shaanika

 

OTAMANZI – Ovaleli vopashiwana moikondo ya yooloka ova pangula elongifo leenghono nomadipao a keen a nghenda oo taa ningilwa ovakainhu moshilongo.

Eshi vahapu ove shi ningi konima eshi omukainhu umwe womOtamanzi a dipawa komulumenhu waye oshivike sha piti. Na ku dipaa Helena Shivute fiyo osheshi oshifo eshi sha nyanyangidua okwa li natango ta kongwa kopolifi.

Ota ku hokololwa kutya edipao eli ola ningwa momesho yomunona wa nakufya Shivute nomulumenhu waye . Omunona ou oye a lotokele keumbo lovashiinda eke va shivifile kutya ina ota ponokelwa kuxe.

Oshiningwanima eshi osha ningilwa momukunda Etilyasa moshikandjohoololo Otamanzi moshitukulwa Omusati. Omufekelwa oo itaa tumbulwa kedina fiyo opapa molwashi ina kwatwa noku holoka komhangu okwa itavelwa oye omumati womukainhu oo. Omufekelwa okwa dja komukunda Iikango ya Namwandi.

Pahokololo olo la yandjwa kuMathews Amunime  xe ya nakufya Shivute, ota li ti nakufya okwa ponokelwa nekatana nosho yo nekuva, naashi osha ningilwa mooyina mokati koufiku.

Okwa itavelwa kutya ovanhu ava ova li mondunda ya nakufya Shivute opamwe nomona wavo wokaadona eshi pa tukuka eenhangu, osho sha twala fiyo opo omulumenhu oo a tewe mo mondunda.

Omulumenhu ou okwa ka aluka konima noku fininika oku uya mondunda keenghono nokwa ponhokele nakufya Shivute.

Konima yo ku longa oilonga oo vati okwa tumu etumwalaka lixupi mongodi ko mu kwanedimo umwe wa nakufya a ti”Inda u ka fudike omunhu woye, okwa hadukifa nge efimbo lile, ame ohandi ke li dipaa,’.

Omitoto oda ka udika konima nokutya omufekelwa okwe li mangeleke pomukunda Evululuko moshikandjohoololo osho tuu osho, ndele nee opolifi moshitukulwa Omusati paendjovo domupopiliko wa lyo , Lineekela Shikongo oya ti oya ka mona olopota tai  ti  kutya omufekelwa oo ine li dipaa shili. Okwa ti opolifi onghee oya twikila olukongo oku mu konga opo a hondama.

Fimbo inaa fya Shivute okwa li ena okafitola kanini pomukunda wavo, na okwa li a lombwele ovakwanedimo laye nokutya omulumenhu waye otashi dulika e mu dipae osheshi okwa  lombwelwa oipupulu nokutya vati ye ohe mu endulula eshi ha nangala novalumenhu vamwe. Oshinima osho ota ku tiwa osho sha handukifa omulumentu waye. Naashi okwa li sha etele nakufya Helena Shivute outile.

Omuprima Minista Hage Geingob okwa ti ovalumenhu ovo tava dipaa ovakainhu  ovo omavaya ongaho.”Ota shi dulika ngahelipi mounyuni ou to denge nokudipaa ovakainhu vaa hena eenghono oku li popila.” Okwa pula oshiwana ashihe opo shi fye oshisho nokutya ovalumenhu ovo hava nyenyepeke ovakainhu  ove li kalekelwa ndele ta va pewa ehandukilo le va henena.

Omuwiliki wehangano lo Women Action for Development [WAD], Veronika de Klerk okwa indila opo pu tulwe oopolohalama oku honga ovalumenhu va kale ve na efimaneko lovakainhu . Okwa ti osha fimana yoo opo ovamatyona va hongwe yoo efimaneko eli okudja  keumbo no sho yoo mofikola.

Omukwatelikomesho woSwapo mOshoongalele shopashiwana Peter Katjavivi okwa ti okwa kunkwa kwaa shi no ke na oitya opo ngeno a tye omadipao aa naa xulifwepo. Okwa ti opwa pumbiwa elongelokumwe opo paa ha kale onhele opo ovafekelwa voilonga ei ta va hondama. Ongundu yovakainhu meumbo etivali lOparliamende ya Namibia oya indila Omuperesidende Hifikepunye Pohamba opo a ingide onghalo yoshiponga  opo pu kondjifwe oilonga yoludi eli.

LEAVE A REPLY

Please enter your comment!
Please enter your name here