Onghalo yomaumbo moshiwana ya nghundipala

0
237
Omufitiongalo Lukas Katenda

KuHelvy Shaanika 

 

OSHAKATI – Umwe womovafita vOngerki yaAnglican Lukas Katenda, okwa ti omadipao ma nyanyalifa oo taa ningwa kovalumenhu Ovanamibia, oo efano tali holola onghalo yomomaumbo moshilongo.

Manga a li ta popifa ovo va li pedimbuluko laavo va ninga oihakanwa yoboma yomombaanga yaShakati Katenda okwa ti, oshiwana ina shi teelela omalihumbato nawa mounona, ngeenge ovasamane ovo veli omitwe domaumbo ita ve li humbata nawa.

“Ovalumenhu Ovanamibia, nande omu mone va djala nawa, veli meeshuta neetaye, tava monika vafa ve na eendunge, ova kolokoshi.

“Ohatu twikile noku popya kutya ounona ita va uduko. Ounona otava kala tava uduko ngahelipi ngeenge oshilongo oshiyadi ovadipai ndoondoo? Ounona otava udoko ngahelipi nge ohava mono ooxe tava tuku ooina, otava kala ta va udoko ngahelipi ngeenge ohava mono ooxe tava denge ooina? Owa teelela okaana ka kale nawa ngahelipi ngeenge oha ka mono xe te li vake meumbo a ka nangale kokaumbo? Nda hala naana okaumbo oko hoka nangala ka pye po ndee to diko to lotoka uli hamunghele,” Katenda ta ti.

Omufita ou okwa yandja ombedi keefamili domoshilongo, ta ti oda dundakana, kadi na elandulafano, nomolwaasho ovanyasha havadi momaumbo tava ka ninga omapuko.

“Eenghalamwenyo detu oda fikama koipupulu. Eengeshefa oda fikama po koipupulu, eehombo oda fikama po koipupulu, omaumbo okwa fikama po koipupulu, ounona twa dala oveli po koipupulu, keshe shimwe, oipupulu yongaho,” Katenda ta ti.

Omufita ou ta hokolola kutya omaumbo moNamibia okwa kanifa outeku, elelo, ka ena ondjila, na omolwaasho ounona hava dimo tava ka dipaa ile tava ka itavela oipupulu yovalumenhu ovo ha ve ke va dipaa nokuli.

Tati, eshi osha etifwa unene konghalo yokunwa nokulongifa nai omalodu.

“Omunamibia ota piti tanu omalodu, ota uhala ta nu omalodu, ota tokelwa ta nu omalodu, ndee ta nangala ta nu omalodu, vati okwa manguluka nee. Otwa taataa mo omutilyane moshilongo fye hatu etamo venya veuye etu humbateke eendova davo, oshinima eshi sha kondemwa noku Presidende [Hifikepunye] Pohamba. Nghee tuli, no taye omunhu wa djala owe i landa kovadjai djai… utya katu na nghee,” Katenda ta twikile.

Katenda ta yeleke kutya opo oshilongo shi xume komesho, omaumbo oo omo hamu di omunhu, oo ena oku tulwa melandulafano, shaashi omunhu ito teelele omuleli a kale ita longo oulingilingi wokulunga teli tapula ngeenge keumbo oku a dja kaku na elandulafano.

Ta ti epangelo oli na oshinakuwanifwa sho ku kaleka po ombili nelandulafano, omanga ongerki ina oshinakuwanifwa oku ilikanena oshilongo novakalimo.

“Ashike kapena ou ha tonatele oshiwana, ovafita voovene nee ava veekola pofingo -ne ku ongelele ashike oshimaliwa, otwa pumbwa oku ilikanena ovanhu,” Katenda ta ti.

LEAVE A REPLY

Please enter your comment!
Please enter your name here