Oshikoto otashi enditha nawa elongo

0
172
Vilho Natangwe Shipuata

ONAYENA – Ombelewa yOshikondo shElongo mOshitopolwa Oshikoto oyali ya unganeke oshituthi oshinene shoka sha li ta shi lalakanene oku ikunda elongo moshitopolwa nepatululo lyiilonga yokomumvo.

Oshituthi shino oshali sha ningwa pehulilo lya Januali sha ningilwa pOsekondele Uukule mOshikandjohogololo Onyaanya.

Oshituthi shino oshali sha kalwa kaantu yoondondo dha yoolokathana yaza kiikondo yi ili noyi ili.

Pethimbo ta popitha  aakwashituthi  Ngoloneya gOshitopolwa Oshikoto Penda ya Ndakolo okwa ti oku uuvite etumba nokwanyanyukwa molwepito ewanawa moshitopolwa she, na okwa pandula omukuluntu gwElongo mOshitopolwa Oshikoto sho ta longo nuudhiginini yo ya adhe onkatu ombwanawa melongo.

Ya Ndakolo okwa indile aalongi ya longe nuudhiginini no neitulemo ngaashi haya longo shito.

Omupevikuluntu gwElongo mOshikoto, Vilho Shipuata  naye okwali a mono ompito okupopya sha nokwa ulike nkene ye shipondola melongo. Shipwata ta ti mo2013 uunona wuli 3298 owali wa shanga ekonakono lyondondo onti 10 na wuli 2220 owe shi pondola okuya kondondo onti 11.

Oosikola ndho dheshipondola oku pititha noopelesenda 100 odho Heroes Combined School, Rev Juuso Secondary Sschool, Onathinge South Combined School, Uukule Senior Secondary School na Amunime Combined School.

Shipuata okwa tsikileko nokugandja omwaalu gwaanaskola mbo ya shanga ondondo onti 12 mbono yali 2082 na 431 oye shi pondola okuya koUniversity.

Konyala oosikola adhihe mOshikoto otadhi shi enditha nawa ngele tashiya kelongo, aalongi otaya longo nawa naanaskola oyi itulamo miilongwa yawo oshoka oya hala ya kale yena oonkalamwenyo dha yela.

Okwa indile opo ando konyala oomvula dhili komeho osikola kehe mOshitopolwa yi pitithe nawa noopelesenda 100 nenge ando okuza ngaa poopelesenda 75 oku uka pombanda.

Esiku ndyoka omahangano ga yooloka oga li ga gandya omagano koshikondo shelongo, sho shi tale kutya omakwatho ota shi ga longitha ngiini.

Old Mutual okwa gandja oN$1000 koosikola ntano ndhoka dha longa nawa oshowo ekopi lina ongushu yithike poN$1200. Metropolitan okwa gandja oN$5000 omanga J&P Group agandja N$10 000.

Shipuata tati oyena okulonga nuudhiginini opo ya adhe esindano melongo na oyena ehalo opo okanona kehe ka kale ka mona elongo oshoka olyo oshipatululo shonkalamwenyo.

 

Ku Maria Namupala 

LEAVE A REPLY

Please enter your comment!
Please enter your name here