Otamanzi ya mona Endiki lyaanyasha

0
231

Ku Maria Namupala

 

ONDANGWA – Momasiku 7 February omvula ndjino  mOshikandjohohololo Otamanzi omwa ningwa oshituthi oshinene sho mwa patululwa endiki lyaanyasha.

Pethimbo ta popitha aakwashituthi Minista gomaUyelele nomakwatathano, Joel Kaapanda okwa holola enyanyu enene moku egulula endiki ndika ndyono tali ka gandja omauwanawa kaagundjuka yopomudhingoloko oshowo yopuushiinda.

Kaapanda okwa tumbula kutya mEndiki muno omuna oComputer,eshina lyokutopatopa noku indjipaleka, omambako nayilwe woo, ta holola kutya endiki ndika olya fa owala omakwawo nga geli moshilongo muka nokonyala iilongitho ayihe yili mo oya faathana owala. Kaapanda okwa indile aakuluntu ya putudhe aanona yawo pamukalo ngoka gwa pumbiwa yo naya silwe oshimpwiyu.

Okwa indile aanyasha ya simaneke aakuluntu yawo noku iyutha koompango dhomomagumbo yo naya ikaleke kokule niinima iiwinayi, naya kambadhale okulwitha iimbuluma. Ta tsikileko noku indila aanyasha oshowo aakuluntu ya angale okukala puukamba unene tuu pethimbo  lyoondima.

Minista Kaapanda okwa holola euvonayi lye sho Oshitopolwa shaMusati shili pombanda miimbuluma nande hasho shotango. Okwa ti oku kala puukamba otaku eta omashongo omawinayi moshigwana noku teyapo ashike ombili moshilongo oshoka ngele omuntu oho kala puukamba nena ito ulike nande ethano ewanawa kuunona woye. Iikolitha otayi piyaganeke omadhiladhilo gomuntu onkee elongelokumwe momikunda olya pumbiwa lyo eputudho nali tameke megumbo.

Okwa indile aantu ya longe momapya neitulomo opo tu kale oshigwana shina elandulathano nonakuyiwa yoopala , yo aanyasha ina ya kanithila ongushu momalovu , ta tsikileko noku indila aakulupe ya kwate nawa iimaliwa yawo yopenzela yo ina ye yi halakanithapo momalovu. Ta indile okakomitee ha ka tulwapo okukalekapo endiki ndika ka longe nuudhiginini opo ehala lya tya ngeyi kaali hanagulwepo ano li kale lina ongushu li adhike komapipi nomapipi.

Kansela gOshikandjohogololo Otamanzi  John Iyambo naye okwali a mono ompito opo a tye sha, okwa ulike enyanyu lye ta pandula Epangelo sho tali hedhitha omauwanawa koshigwana. Okwa ti mongashingeyi mOshikandjohogololo she omuna oombelewa dhuuministry wa yoolokathana ngaashi Elongo, Uunamapya, Uukwashike kookantu, Uuhaku oshowo uuministry wUuyelele.

LEAVE A REPLY

Please enter your comment!
Please enter your name here