WHERE OTHERS WAVERED – Olweendo oku za moFrancistown oku ya koSalisbury

0
208

Munamava na ngame otwa ende naaniilonga yokondalaka oku ya ko Francistown, okandoolopa kotango okashona, nda thiki mu ko konima yo ku thiga  po oshilongo. Mokadoolopa haka nosho wo mo Bechuanaland alihe ka mwa li nando ongundu yopolitika, onkene inandi vula oku ninga ekwatathano nando mokalando hoka. Oshiwike ashihe shoka twa kala moka, aantu mboka twa tsakanene na yo, ye na euveko lyopapolitika oomboka ya za koNyasaland[oshilongo shoka hashi ithanwa Malawi nena]. Oya li taya zi kiilonga moomina dhomo South Africa konima yo ku manitha okondalaka yawo na oya li ya tegelela oku shuna kegumbo nondhila ya WENALA oku za mo Francistown okupitila mo Broken Hill moRhodesia lyokuumbangalantu ndyoka ha li ithanwa Zambia nena.Ondoolopa ndjoka Broken Hill nena oha yi ithanwa Kabwe.

Otwa li twa kundathana kombinga yopolitika, molwashoka pethimbo ndyoka omundohotola, Hasting Banda okwa li mondholongo ngaashi ashike omundohotola Kenneth Kaunda oshoka oya li wo ya hala oku mangulula iilongo yawo, oFederation ya Rhodesia na Nyasaland.

Esiku aaniilonga mbaka aaNyasa, ya li ye na oku shuna kaandjawo onde ya pula kombinga yomadhina ngoka ga simana mo Nyasaland na oya lombwele ndje kutya omuna omadhina ngaashi, Chipinga olyo limwe li shiwike nawa. Onda tokola oku iluka, David Chipinga. Onda nyola ondelekelama no nde ya pe oshimaliwa sha gwana noku ya lombwela kutya ngele ya thiki koBroken Hill na ya tume ondelekelama ndjoka ku ngame ko Francistown.

Mondelekelama onda nyola mo “Hokulu Chipinga ota ehama, unene no ka pe na etegameno lya sha, ila mbala”. Onda taamba ondelekelama ndjoka esiku olyo tuu ndyoka, no komatango gesiku ndyoka ondi ilandele okatekete keshina lyokulutenda lya li ta li zi ko Johannesburg lyu uka koBulawayo mo Rhodesia lyokuumbugantu[ngashingeyi Zimbabwe]. Onda longitha ondelekelama ndjoka oku pita poongamba dha Bechuanaland na Rhodesia po PlumTree nongeyi onda tameke olweendo lwandje lwa landulako. Onda ningi po oonkambadhala, sho ndi ilande oonguwo dhoku lala oombwaanawa ondjatha yomegumbo ombwanawa noshowo iitsakaya yi li nawa ngame tandi landa ishewe iifonkundana, sha Cape Times, Cape Argus, the Star noshifo sho Rand Daily Mail. Iifo onde yi tula poshitaafula moshikoto shandje shongundu yotango shomupashioni gumwe awike, ondi ipatelemo. Sho twa thiki poongamba dha Rhodesia lyokuumbugantu shilumbu gumwe omuRhodesia omupuli gwoopaasa okwa konkola pomweelo gwandje no nde mu egulula konima yethimbo onda mono kutya okwa dhiladhila kutya ngame onda li omuhumi, onde mu lombwele kutya okwa piyaganeke oomposi dhandje. Okwa yamukula ndje kutya eeno , ihe okwa li ashike a hala oku tala ngele ondi na tuu opassporta nenge ovisa oku ya mo Rhodesia lyokuumbugantu. Ngame onde mu lombwele kutya ngame omulongisikola moBechuanalanda, nda li ashike ndu uka ko Broken Hill ku na tatekulu ta ehama noonkondo, opo ndi ke mu tale ngame ndi galuke ko ishewe mbala.

Okwa lesha ondelekelama ndjoka nda shangelwa kaaniilonga yoko Nyasaland nokwa ti ota pitika ndje ndi ende ndaana ovisa nenge opasporta oshikando shika ndele mo nakuyiwa ina ndi  shi yelekela we. Sho a yi onda li ashike tandi nyata evi oshoka onda mono kutya onkambadhala yandje ota yi longo. Otwa li twe ende na Daniel Munamava ihe ye okwa li moshikoto she oye awike opo tu kanithe iinkoti, mukwetu okwa li ena opasporta ya Britania okwa li ta thindikile ndje molwashoka oku shi nawa oshitasi shomashina sho mo Bulawayo. Sho nda thigipo oVenduka, omunashipundi gwopashigwana , hailwa David Meroro okwa li a pendje ondjato yolweendo noshowo oohema hamano oombwanawa.  Sho twa thiki moBulawayo otwa pulwa tu popye kutya otwa etelele shike kaafendelithi, ngame onda yi pehala mpoka omolwa oohema ndhoka oompe. Ihe aaniilonga yo ku taamba iifendela oya li nale ya zimbuka. Okwa ti, wa nandi galuke esiku lya landula. Inandi shu na ko esiku lya landula oshoka onda li nda tila pamwe mbaka ota ya dhimbulula ndje eta ya kwata ndje no ku shuna ndje ko South West Africa. Oshoka pethimbo ndyoka onkalo yopolitika  moRhodesia lyokuumbugantu oya li ya piyagana.

Ongula sho kwashi onda yi kokapale ka Bulawayo eta ndi iilandele okateke oku ya nondhila koMbeya okupitila moSalisbury, Ndola nokoMbeya mo Tanganyika. Ongula ndjoka onda tuka oku ya ko Salisbury shoka nena hashi ithanwa Harare.

Mo Salisbury onda li ongame andike  moshilongo shoka sha li monkalo yopolitika ya piyagana. Pokapale onda uvu aakiintu aa Africa ta ya popi elaka lya fa Oshifanakalo ha li ithanwa Lapalapa. Ndika olyo elaka lya li ha li popiwa kaaniilonga mboka ya li haya longele moomina mo South Africa. Onda li ndi ilongo iitya yalyo yimwe pethimbo nda li ha ndi longo posasiona yoku kwata oohi mOmbaye. Onda pula aakiintu mbaka ngele oye na ontseyo yo mu napolitika gumwe ngoka tandi vulu oku tsakaneka. Oya ti eeno oye shi gumwe oshilyo shoLiberal Party ya Rhodesia, ongundu ndjoka ya li ta yi yambidhidha ekalepo lyoFederation ya Rhodesia  mewiliko lya Sir Roy Welensky. Onde ya indile ya fale ndje komunapolitika ngoka ye shi. Omunapolitika nguka nda falwa kuye okwa li omulumentu ngoka woo a longa moSouth Africa ko Kapa na okwa li a hokana omukiintu omu South Africa. Edhina lye oye Muamuka. Okwa hokololele ndje kombinga yiilonga ye mo South Africa na okwa li ena eitulemo oku pulakena onkalo yopolitika yoshilongo shetu. Onde mu indile opo a fale ndje kaanapolitika yomoshilongo yalwe. Okwa longekidha opo ndi tsakaneke Omuperesidende gwongundu ha yi ithanwa, National Democratic Party ya Rhodesia lyokuumbugantu, ndjoka konima ya ka ninga Zapu, no nena oha yi ithanwa ZANU[PF].

Omuperesidende gwa NDP, okwa li Michael Mawema omanga omupeviperesidende okwa li Morton Marianga. Otwa popi no ku kundathana olule iikwapolitika nomathaneko getu nkene, monakuyiwa  tatu mangulula Africa miikaha yaa tiligane. Oonkundathana dhetu odha kwata ethimbo naashika osha fala sigo oompoka kutya onda thigwapo kondhila oku ya koNdola. Onda shuna kaandja Muamuka, ngoka a pendje uulalelo noshowo okwa pendje ehala lyoku lala uusiku mboka.

Esiku lya landula onda mono ondhila oku ya ko Ndola pehala hoka kwa li ha ku fulwa ongopolo, ihe moNdola onda thigwapo kondhila ndjoka ya li yu uka koMbeya moTanganyika. Onda ka enda enda momapandaanda ga Ndola.

Onda tsakanene naanona aaAfrica pokati komimvo 12 sigo 14. Onda popi na yo nde ya indile, ya fale ndje hoka kwa kala aalongisikola yawo, oya fala ndje kegumbo lyomulongi gumwe ngoka elago enene a enda koGhana koshigongi shehangano lyAalongi yomoCommonwealth sha li mo Accra shaGhana.

Pethimbo ndyoka omundohotola Kenneth Kaunda okwa li mondholongo moSalisbury omanga Hasting Banda okwa li eedhililwa mondjedhililo moGweru.

Omuwiliki guukoloni miilongo mbyoka ya li kohi yaashoka hashi ithanwa Federation ya Rhodesia, Sir Roy Welensky okwa li a hala oku kalekapo ewiliko lyiilumbu miilongo mbika ethimbo ele ngaashi tashi vulika. Epangelo lye olya li inaali pandika ku Kaunda na Banda mboka ya li ya hala li hanagukepo, onkene Kaunda okwa pewa edhina kutya ye oshikulo nontoka onduudhe.

Omulongi nguka okwa fala ndje kegumbo lyaayenda yongundu yo Liberal Party mboka aaluudhe, hoka, ngame no nda futile oku kala kwandje pegumbo ndyoka uule woshiwike. Omanga ndi li pegumbo ndyoka onda pula kombinga yiilyo yo ngundu yo UNIP. Konima onda ka tsakanena na yamwe. Gumwe gwawo okwa li Fines Bulawayo, ngoka a ka ninga ominista mepangelo lya Kaunda konima yemanguluko lya Zambia.

Okwa lombwele ndje kutya ondi li pehala lya puka, oshoka aapolisi yaSir Roy Welensky ota ya ka mona kutya opo ndi li mpoka e ta ya lopota ekalepo lyandje. Oya kutha ndje po pehala mpoka no ku fala ndje kolukanda, hoka nda ka kala megumbo lyomupeviperesidende gwewawa lyaagundjuka ya UNIP Daniel Chitunda. Otwa taagulukile moprovince ya Katanga moKongo ya Belgia pethimbo ndiyaka, ndjoka ha yi ithanwa DRC nena. Moka otwa tsakanene niilyo yongundu ya Conakat, ngaashi Moice Tshombe, nguka pamwe na Patrice Lumumba noshowo Josef Kasavubu oya li taya kondjitha uukoloni waBelgium. Otwa kundathana nkene tatu longele kumwe oku mangulula Africa alihe oku za muukoloni, no sho woo oku mangulula iilongo yetu koohandimwe. Etsakaneno ndika olya li etameko lyomidhi dhelongelokumwe mokati kAafrica. Otwa tsakaneke woo omugandjimayele kombinga yooveta gwa Tshombe, onda li inaandi mu inekela nawa molwashoka ka li e na ontseyo kutya South West Africa osha gama uuyuni peni. Omanga ngele ngame ondi iyeleke na ye onda li nda tseya kutya aantu ya Kongo oya li taya kondjele woo emangulo ngaashika ashike tse.

Konima yoonkundathana otwa galukile koNdola kongulohi. Esiku lya landula omuntu gumwe okwa yi kokapale nondjato yandje  noshowo ekende lyandje lyomeya gotee  nokatekete kandje. Okwa londeke oondjato dha ndje na okwa etele ndje okambapila ko ku londa mondhila. Onda yi kokapale na onda kala nda tegelela sigo oko minute dha hugunina sho ondhila ta yi hala oku tuka po, onda ende ndu uka ku yo naa sho iilumbu ya pula ndje kutya ondu uka peni onde yi lombwele kutya ngame omulongi tandi yi ko Mbeya na otandi ka galuka nohauto oku yako Broken Hill, omanga iilumbu ya kala no ku pula ndje ngame onda piti ashike puyo noku ya mondhila moka nda  adha mu udha ashike aa Ingilisa oyendji yendji.

LEAVE A REPLY

Please enter your comment!
Please enter your name here