Ovanafaalama nava longife endiki loitalaleki Hamutenya

0
197
Minista wOipindi nOikwafaabulika Calle Schlettwein, pefimbo letalelepo kOngwediva Fresh Produce Business Hub, mefano otamu monika yoo, omukulunhu wendiki, Jacob Hamutenya, Gavena waShana Clemens Kashuupulwa noshoyo Omupeduwiliki wOpolifi mOshana Komufala wopedu, Rauha Amwele

KuHelvy Shaanika 

 

ONGWEDIVA – Omukulunhu wendiki loihape noitalaleki mOngwediva hano oFresh Produce Hub , oyo i li koshi yehangano hali ifanwa Agro-Marketing and Trading Agency (AMTA), Jacob Hamutenya okwa ti opena omhumbwe okuudifa ko ovanafaalama opo va longife endiki loFresh Produce olo va tulilwa po kepangelo.

Manga a li ta tambulako osheendo shaMinista wOipindi nOikwafaabulika, Calle Schlettwein pOngwediva Fresh Produce Business Hub, Hamutenya okwa ti nonande oipindi yovanafaalama voihape, okupitila momandiki oo moshilongo ota ve shi endifa nawa, natango ope na omhumbwe okutwa omukumo ovanafaalama ovo ina va tameka natango okulongifa omandiki aa, veshininge.

Moshilongo omuna omandiki ava li limwe oli li koRundu naali nee lomOngwediva.

Hamutenya ta ti fiyo opapa, endiki laNgwediva ola landifa oilandifomwa yongushu ifike hanga poN$1milion, okuputila movanangeshefa ovo va hoololwa kehangano okuningila ovanafaalama omalandifilo tava pitile mo AMTA.

Mokulandifila oilongomwa mendiki, omunafaalama kena eshi ta kanifa, ndele ota mono ashike osho a nuna ile nokuli shihapu momalandifilo, shaashi ovalandi vahapu oha va talele po endiki olo, navali, oilandifomwa oina omhito inini yokwoola shaashi endiki olina oitalaleki, oyo yoku kaleka oiimati noihape, noikwambelela monghalo ili nawa efimbo lile.

Mokufatulula kutya omalandifilo ohaa ende ngahelipi kendiki, Hamutenya okwa ti omunafaalama oye ha tula ko ondado koilandifomwa yaye, voo ovanangeshefa ile ovo va tulwapo kendiki, nove lilepo oku landifila ovanafaalama tava wedako oshimaliwa shi nini koilandifomwa oko hava ku fa po onga ofuto yavo.

Sha hala kutya, mokutwala oilandifomwa kendiki laAMTA omunangeshefa ita kanifa sha nande, shapo ota hapupaleke ashike omalandifilo aye. Mongaha, ovo hava longifa unene omandiki ongaashi ovanafaalama vomomahangano ngaashi Etunda Irrigation Projects, Olushandja Farmers’ Association, Karst hano eefaalama domapungu domeenhele ngaashi oTsumeb-Otavi-Grootfontein, Kavango Regions Green Scheme Irrigation Projects, noshoyo ovanafaalama vopondingandinga nokoumbuwanhu woshilongo

Hamutenya ta yeleke kutya, omandiki, ohaa tambula ko ashike oilandifomwa ta i di kondje yoshilongo ngeenge oilikololomwa oyo kaimo moshilongo. Ta yandje oshihopaenewa shoihakautu oyo tati kaimo efimbo eli moNamibia.

LEAVE A REPLY

Please enter your comment!
Please enter your name here