Nujoma ta yambidhidha ‘The Hitman’

0
337

KuNuusita Ashipala 

 

OUTAPI – Omukokoliperesidende Sam Nujoma ota yambidhidha uudhano wombokisa mboka wu li ko Olyomakaya ndjika pOlufuko Festival Centre modoolopa yOutapi. Uudhano tawu kondjele epapa lyo World Boxing Organization (WBO) owa kala wa tegelelwa koyendji.

Omukokoliperesidende okwa ti uudhano woongonyo owo wumwe waa mboka wa ningitha Namibia oshigwana shu uvite uugumbo molwashoka owa eta omanyakwa guuyuni. Nujoma okwa gandja oodola omayovi 10 mokuyambidhidhi elongekidho lyuudhano mbuka. Olugodhi olunene ongulohi yongula oondoka talu kala pokati kenyakwa moongonyo lyaNamibia, Paulus “The Hitman” Moses ta ka kondja nomuArgentina, Rafael Cario molugodhi lwomadhingoloko 12.

Omukokoliperesidende okwa gandja iimaliwa mbyoka piitelekela  ya ningilwe ehuliloshiwike lya piti pOutapi, kohi yelongekidho lyOngoloneya yoshitopolwa Omusati, Sophia Shaningwa.

Iitelekela mbika oya li ya kalwa koohashike oyendji ya za mongundu yaanangeshefa, aawiliki yoshigwana, naakalelipo yomahangano omanene goongeshefa noshowo kaawiliki yopamuthigululwakalo. Pethimbo lyuulalelo mboka wa li, noondya dha dhoga aanamake oya uvaneke no ya tilehi oondjato dhawo ya manamo , moku gongela oshipandi shoodola omayovi omathele gatatu.

Iimaliwa mbika ota yi ka longithwa melongekidho  lyuudhano mbuka oshowo oku futila omalongitho galwe pethimbo lyuudhano mbuka tawu dhanwa Olyomakaya ndjika. Aalongekidhi yuudhano mbuka oya uvaneke tawu ka kala wumwe wa dhenga mbanda moku longekidhwa moshilongo sigo oompaka.

Moshipopiwa she Nujoma okwa kumike aaNamibia ayehe ya ye kuudhano oku ka yambidhidha Moses, ngoka eli ependafule lyopashigwana.

“Uudhano wombokisa owo wumwe mboka wa etele Namibia etumbalo, onkene owuna oku pewa eyambidhidho ndyoka lya gwana,” Nujoma a ti omanga aapulakeni ye, taya ha kele omake no taa umbilemo oondigolo.

Fysal Fresh Produce omulandithi gwiikulya okwa uvaneke ta gandja N$26 000, a landulwa ku Kanu Amadhila gwehangano AMA Engineering ngoka uuvaneke oN$25 000. Poshiithanene mpoka opwa li woo Oominista Joel Kaapanda gwOmauyelele nOmakwatathano gOpautechnologi, Minista Pendukeni Ivula Ithana gwIikwameni noshowo nee Ngavena gwOmusati, Sophia Shaningwa. Mbaka ya tatu na yo oya ningi omauvaneko gawo goku gandja oshimaliwa omolwa omalongekidho guudhano mbuka.

Oodola omayovi omathele gatatu ngoka ga gongelwa inaga kwatelamo iiyemo mbyoka tayi zi melanditho lyuutekete wokuya kuudhano noshowo welanditho lyiitaafula. Iimaliwa ayihe mbyoka ya pumbiwa opo uudhano mbuka wu pite pwaana nando othina ya sha oyo oodola omiliona yimwe oshinkwanu heyali.

Omukondjithi gwa Moses okwa thikile nale moVenduka mOsoondaha ya ziko na okwa thikile mOutapi metine oshiwike shika. Cario okwa thiki moVenduka moka a tameke oku inoma  kutya ota ka dhenga omukondjithi gwe pwaana omalimbililo.

Cario okwa lwa omalugodhi 23 moka a sindana omilongo 21 moshimpungu shuudhengingonyo paithano, na okwa dhana shi thike pamwe lumwe aluke. Okwa uvaneke kutya ota ka nyanyagula Moses eta fe onyama ya kwewa.

Aatseyinawa yombokisa oya ti omukondjithi gwa Moses  oku na uuthemba oku popya ngaashi uuvite unene tuu sho ena ondjokonona yomalugodhi 23 a kanitha mo ashike limwe alike.

Ihe Moses ina tilithwa komipopyo dhomukondjithi gwe. “Ngame ondi shishi nawa kutya olugodhi nduka ota lu kala lumwe lwomwaangoka nda kondja ga kukuta nkene tuu nda tamekele oku dhenga oongonyo paithano unene tu sho Cario ena ondjokonona ombwanawa mokukondja kwe. Ino ninga epuko omukwaita okwa kanitha ashike olugodhi lumwe momalugodhi ge agehe onkene kena oku talika omupu, ndele omupya omunene konima yolugodhi ondjokonona ye otayi ka kala yi na okantongo oshoka ota ka thiminikwa a yalule omalugodhi 24 moka gaali ega kanitha,” osho Moses ngoka a ndjena a yamukula eishapo lya Cario.

“Aadheuli yandje oya longekidha ndje nawa molwolugodhi nduka, molwashoka nduka olugodhi ndina okusindana kutya otashi pula ombinzi nomazigudhe, ngele ondi na oku tulwa mongundu yaamboka taya dhiladhilwa oku pewa natango ompito yoku kondjela epaya lyuunyakwa muuyuni. Oshoka ondjodhi yandje oyo oku, ka kondjela oshishani shuuyuni oshoka ngame onda li ndi shina na onda hala oku shi galula, oshoka poshishani shuuyuni opo pehala mpoka ndina oku kala,’ Moses a ti.

Cario nomuwiliki gwe oya thikile mOutapi ohela oku iyigililika kombepo ompyu yomoshitopolwa shika noku tseyitha wo olugodhi nduka.

“Ashihe osha longekidhwa nawa poMTC Nestor Sunshine Boxing and Fitness Academy. Otwa longa ashihe shoka tatu vulu oku tseyitha olugodhi nduka, ngashingeyi otwa tegelela ashike oshigwana opo shi holoke momwaalu omunene oku ya shi yambidhidhe uudhano mboka ongula mOlyomakaya. Otwa hala osaala yuudha opo Cario a mone kutya ota kondjele moshilongo shomapenda dhoshili,” Tobias a ti.

Aadhengingonyo ya za ko (DRC) no Zambia oya thikile moWindhoek mbaka otaya ka mbokisa momalugodhi gotango kohi yuudhano mbuka wa Hitman, sho taya kondjitha aadhengingonyo ya Namibia mu mboka mu na Julius Indongo ta ka gamena epapa lye lyo  WBO Africa welterweight.

Uutekete otawu landithwa poComputicket poositola dhoShoprite noCheckers oshilongo ashihe tawu gu N$50. Uutikete waasimani otawu landwa koodola omathele gatatu, mboka wuunona owo oodola omilongo mbali. Oto vulu woo oku landa uutikete pOkalongo Hafeni Ketu 2000, Oshakati Tafel Bar nopOutapi Dinhero Pub. Kwatathana na : Jason Petrus kongodhi yo 0812443223 nenge Peter Kanu  konomola 0811221753.

LEAVE A REPLY

Please enter your comment!
Please enter your name here