Omahupilo goshilongo ota ga yakwapo manga twa kotha

0
195

Ku Mathias Haufiku

 

WINDHOEK-Omahupilo goshilongo ota ga yakwapo kaapunguli yoshimaliwa ya za pondje yoshilongo omanga aatoti yooveta ya kotha.

Olundji mbaka aniwa oye na ko ashike nomutungilo omunene gwomahupilo na oya dhimbwa oku tala oshitopolwa shomutungilo omushona gwomahupilo, ano oku tala oongeshefa , oofabulika noshowo iilongadhalwa yilwe mbyoka oyo ha yi etapo iimaliwa noshowo hayi gandja oompito dhiilonga kaakwashigwana moshilongo.

Omutotiveta mEgumbo lyopashigwana Kazenambo Kazenambo okwa popi ndhika pethimbo lyosheetwapo she moonkundathana noompata kombinga yomutengenekothaneko oshiwike shika.

Kazenambo ngoka opo a joina Opolitburo yoSwapo omasiku ga ziko okwa lundile aatotiveta ooyakwawo kutya oye li moomposi omanga omahupilo goshilongo taga yiwa nago kaapunguli ya za pondje ya Namibia.

Okwa ti ye ita popi shika molwaashoka ando etonde aakwiilongo ndele ota ulike ashike uumbangi mboka ewete esiku kehe ngele ta ende momapandaanda goshilandopangelo nenge palwe miilando ya Namibia.

Okwa ti ”Omahupilo getu ota ga yiwa nago molwashoka tse otwa tala ashike kethano enene lyomahupilo , kokutya otwa tala ashike komilandu ndhoka tadhi wilike einyengo lyiimaliwa, engushuluko, elongitho nawa lyiiyemo , nonkalo nawa yi li po ndjoka ta yi pitike opo kehe gumwe a vule oku pungula moshilongo shika, ndele otwa dhimbwa kutya omahupilo ogena oombinga mbali.’

Okwa  londodha kutya epangelo ota li ka longa nuudhigu oku humitha komeho omahupilo ga kola ngele itali tala woo kombinga yoshitopolwa shomahupilo shoka sha thikamapo moongeshefa noshowo momaipyakidhilo agehe gopamahupilo esiku kehe.

‘Omahupilo gopaipindi moshilongo shika ogeli kohi unene  yomahangano omanene ga za kiilongo yopondje noshowo omahangano ngoka gena oongeshefa miilongo oyindji muuyuni.Ngele oto dhiladhila kutya otandi popi dha nakalindi, katuka ashike mepandaanda lyEmanguluko moshilandopangelo u tale kutya oositola ngapi dhili momake gaaNamibia,’Kazenambo a ti.

Okwa ti omwaalu omunene gwiimaliwa mbyoka epangelo ha li longitha moku landa omayakulo oha yi hulile miikaha yaakwiilongo.

“Uuna tatu ndjandjukununa omutengenekothaneko gwiimaliwa mbyoka oholomende ya  tengeneka oku longitha, iha tu pula kutya iimaliwa mbika oha yi yi peni, nenge oha yi ende ngiini momahupilo,’Kazenambo ta ti nomaipulo.

Kazenambo okwa pandula Ominista Yiimaliwa, Saara Kuugongelwa Amadhila sho a ningi oonkambadhala oku tala woo kombinga yiikwangweshefa momutengenekothaneko ngoka a gandja mOshigongi shopashigwana, ndele okwa dhimbulutha aatotimpango ooyakwawo kutya oshilongo itashi yi ashike komeho ngele okwaako kumwe kwomahupilo oko akuke taku humithwa komeho omanga oku kwawo kwa ethiwa kwafa kwaana oshilonga.

‘Oto vulu oku kala noshitopolwa shomahupilo shi li nawa kombinga yomilandu  dhoku wilika einyengo nelongitho lyiimaliwa, oku talela nawa omahupilo ndele ngele oongeshefa inadhi silwa oshimpwiyu nena dhimbwa oku dhikapo omahupilo ga kolelela,”Kazenambo a ti.

Okwa zimine kutya epangelo ina li longa sha gwana oku nkondopeka aaNamibia opo ya kuthe ombinga unene moshitopolwa shuutalelipo shoka ngashingeyi tashi wilikwa noshi li momake gaakwiilongo.

“Oohotela odhindji noshowo omahangano ngoka haga enditha aatalelipo oge li nodhili miikaha yaapunguli yopondje ya Namibia, nepangelo ita li talele noku kondolola oshitopolwa shika oku tala kutya aantu yetu ota ya mono tuu uuwanawa musho,’ Kazenambo a ti.

Okwa londodha kutya ngele omahangano geli kohi yaakwiilongo oga indjipala nena opena ompito opo epangelo li kale lyaana oonzo odhindji moka ta li kutha iifendela.

LEAVE A REPLY

Please enter your comment!
Please enter your name here