Omukulukadhi e li metegelelo a tsuwa noombele komulume

0
253

KuKakunawe Shinana

 

ONGWEDIVA –Lucia Shikongo  gwomimvo 29, ngoka a li  tsuwa na yi nomwele komusamane gwe, Ananias Shikongo, okwa mono omunona gwomukadhona  e li nawa mOsoondaha konima sho a tandwa.

Shikongo okwa li metegelelo lyoomwedhi omugoyi sho omusamane gwe ngoka oye he yaanona ye emu ponokele noku mu tsa nombele  iikando oyindji pegumbo lyawo moVenduka.

Metitano lyoshiwike sha yi Shikongo okwa tsuwa nombele iikando oyindji  ku Ananias pokati kotundi onti 16h00 notundi 15h00. Okwa tsuwa kombunda  nomontulo na okwa ningwa woo iishaho ya ya muule woontumba dhomaako sho a kala ta kandeke oombele ndhoka dha li dha ukithwa mepunda ndyoka li inaa li valwa.

Ananias okwe mu ponokelele megumbo lyawo, aniwa tango sho emu dhenge nongonyo, omukulukadhi okwa zimo megumbo noku tondokela puushiinda, hoka aniwa emu landulileko a tya  ombele noku undulapo omweelo omanga omushiinda a li ta kambadhala oku edhilapo.

“Okwa tameke okuponokela ndje naasho nda matukile kegumbo lya mu shiinda, okwa landula ndje noku tsa ndje shaampoka.

Okwa li a hala oku tsa ndje mepunda, ngame onde mu ikanyuna na onda kandeke opo ombele yaatse mela. Sho nda mono kutya itashi kwatha sha onda matukile kopolisi. Oku za mpoka inandi mu mona nenge ndi uve kutya oku li peni sigo oompaka.

“Onda piyagana unene na kandi shiwo kutya nandi ninge ngiini, onda pumbwa ekwatho nomayele,” Shikongo a indile ye ta lili.

Shikongo ngoka a hupu moshiponga shika shinyanyalitha mokati kiiningwanima yi nyanyalitha ta yi ningilwa aakiintu ota ti po hwepo moshipangelo shepangelo sha Windhoek Central

Nonado onkalo ye yokolutu oyi li hwepo Shikongo okwa ehamekwa koshiningwanima komwenyo, shoka sha ningilwe Etitano lya yi, konyala shaale shi faalele omwenyo gwe noshowo gwomunona gwe ngoka a li inaa valwa natango. Okwa lombwele Kundana ngaaka ye ta lili.

“Kandi shi shoka ndina oku ninga okuza mpaka oshoka egumbo lyandje moka nda li twa kala na Ananias aniwa olya yakwa, iinima ayihe mwa kwatelwa iimaliwa mbyoka nda li nda pungula mokaketha  kiimaliwa, omanga nda tegelela oku mona omunona ayihe oya yi wa na yo koombudhi ndhoka dhi iteyele megumbo manga ngame ndili moshipangelo. Iinima ayihe mbyoka twa li twa gongele ongo omusamane nomukulukadhi oya ya. Kandi shi kutya olye eyi kuthapo, Ananias ina monika we sigo oompaka na ngame inandi vula oku ke mu ningila oshipotha kopolisi opo andola aapolisi ye mu konge, molwaashoka ondi li natango moshipangelo,” osho Shikongo a popi ye ta lili.

Shikongo ngoka a li ha longo mo ku landitha okapana okwa ti oya kondjo nomusamane gwe Ananias molwa okwa ihumbata kwe nawa noshowo okwaa ha longitha nawa iimaliwa. Ananias aniwa oha nu na yi omalovu ye ishewe iimaliwa mbyoka ya longwa nuudhigu ohe yi hanagulapo nokudhana omashina ngoka gomajackpot.

Shikongo aniwa okwa li a landele omusamane gwe oshihauto opo eshi longithe ongo otaxi okweeta iiyemo megumbo, ndele aniwa megumbo iha eta mo sha, oku za mopate moka ha kala ta hingi.

Okwa ti Ananias ngoka okwa kala noku mu hepeka olundji kolutu, naasho oshiwike shoka e mu pula kombinga yoku kwata nawa iimaliwa, nguka aniwa okwa gee noonkondo eta kutha ombele nokumbothagule omukiintu gwe noombele ngaaka.

“Okwa kala aluhe ha hepeke ndje no ku dhenga ndje kolutu, ndele shika inandi shi lopota kopolisi oshoka onda li nda dhiladhila kutya pamwe ota lundulula. Oha zi megumbo ta ka longa nohauto ando eete iimaliwa, ndele oha galuka ishewe a pule iimaliwa yoku nwetha omahooli. Uuna nde mu pula kutya iimaliwa mbyoka a longo oyi li peni ye oha yamukula noku longitha ekuni, naashika osho sheetapo opo a tse ndje sho nde mu pula kombinga yiimaliwa mbyoka a longo esiku ndyoka,” Shikongo ta ti . “Ofamili ye noya ndje aluhe ohadhi tala ndje nda fa ongame handi hindi Ananias, na oha ya ti ongame ndina epuko lye eta opo a dhenge ndje, naaluhe oha ya kala ye mu gama, nopethimbo ndika ondi shishi kutya oye mu holeka,” Shikongo a tsikile natango ta lili.

LEAVE A REPLY

Please enter your comment!
Please enter your name here