Oshihakanwa shomahapeko ovakainhu moutile

0
216

KuKakunawe Shinana

 

ONAMAHOKA – Omukainhu weedula 29, womomukunda Onamahoka mOshitukulwa shaHangwena oku li moutile eshi vati omulumenhu oo a li emutetaula nomakatana nokumutwa neembele eedula mbali dapita, ta ende a manguluka ye ta twikile nokumuningila omatilifo.

Asser Stefanus Fudila (35) okwa yuululwa modolongo meni leehani nhatu, omo e li futila mo ashike noN$800 sha landula onghedabala yedipao oyo  a ningila ina yokaana kaye, weedula 29.

Fudila ohanga, a dipae Rosalia Shakala Ndiitu, muApilili 2012, eshi e mu twa neembele olutu alishe nokumuteta eenyala. Okwa li yoo hanga a teteko omutwe waye nekatana shalongo ovashiinda shaNdiitu va lotokele diva noku mu popila ngeno oo ina tumwa va li.

Fudila, omukalimo womOnamahoka moshitukulwa sha Hangwena natango ota ende a manguluka nokwa lopotwa kutya okwa tameka va li ta ningile Ndiitu omatilifo no kutya ote mu mane ile ote mu dipaa nee filu filu vati ngeenge okwa mono omhito oku shininga.

Onghalo ei oya handukifa oshiwana shomOnamahoka osho shi uditile oshikondo shouyuki nayi molwasho sha dopa oku amena omwenyo womuhepekwa oo. Omatilifo edipao aa okwa lopotelwa opolifi yopOngha, ndele pa hokololo lofamili, ovapolifi ina va patulula epeko moshibofa osho.

Mokuholola eudo nai laye, Omukuluntu wopolifi ya Namibia Leitenanda Ndjai, Sebastian Ndeitunga okwa ti Mengestrata okwa longa nai eshi a yadja obeila yeedola N$800 komufekelwa oo a fekelwa a longa oilonga i nanyanyalifa.

“Oinima ei ina shi pumbiwa va li i talikeko noupu ngaho, ovanhu ava hava longo oikulumuna yoludi olo, ngeenge ta va pewa obeila ka ve na oku pewa ve li futilemo nomuvalu omunini. Eifutilemo oli na oku tulwa poule pa mu valu oo opo  va, ha dule oku li futilamo modolongo.

“Ndele paife oto lombwele nge kutya omufekelwa natango ota tilifa va li oshihakanwa shaye ndele opolifi ina i mu kwata? Omunhu oo okwa pumbwa oku kwatwapo nokupatululilwa oshipofa shomatilifo,” Ndeitunga  osho a ti nenyeme.

Neitunga okwa udaneka kutya ota ka shikula oshinima osho nopolifi yomoshitukulwa shaHangwena. Okomanda yopolifi mOhangwena,Tylvass Kampolo okwa ti olopota yo shiima eshi oya fika mombelewa ya ye. Ngaashi naana Ndeitunga, Kampolo naye okwa ti opolifi oya li i na okupatulula epeko lipe.

“Ngeenge ofamili oi wete inai kwafelwa nawa pefimbo ya lopota eshi kovapolifi, ota i dulu okulopota komukulunhu wosasiona yopolifi oyo, ile okupopya naame meyukililo.

“Ovanhu vet uovena oupyakadi shaashi ka ve na ouyelele wa pumbiwa, na oha tu kendabala oku popya na vo ta shi pitile mokushiivifa moradio. Shikwawo ka tu shi kutya omolwashike ohofa ya  mengestrata ya pitika opo omufekelwa oo eli mbeelemo. Onghee eshi oshi na okupulwa Mengestrata oo a yadja etokolo olo,” Kampolo ta ti.

Ndiitu oo a hupa shikumwifa nokwa veluka koiveta oyo a ningilwa ku Fudila, okwa lombwela Kundana kutya oku li moutile efimbo alishe, naalushe oku na oku enda meameno lovanhu keshe apa ta i.

Omaoko, omutwe, nombuda ya ye oyi na oivadi inene, oyo ta i ulike kutya ye okwa xupa moshiponga shinene.

Paife oha tuvike omutwe waye nembale ile newiga shaashi eexwiki daye ihadi mene peenhele dimwe momutwe. Oha holeke yoo omaoko aye meenghwapa shaashi ke na va li eenyala.

Okamonamati keedula hamano oko pefimbo loshiponhokela osho ka li ashike kena eedula nhee, oha ka kala ashike ke likalela, no ngeenge ta ka pulwa kombinga ya xe  oha ka tameke ashike ta ka kwena.

“Fye otu udite na i neenghono, otashi dulika ngahelipi va mangulule omunhu oo kwa li ta kendabala oku dipaa nomukalo u nyanyalifa? Omulumenhu oo omunyasha, oo ha eta omaudjuu momudingonoko ou okwa mangululwa fimbo Ndiitu a li moshipangelo ina veluka, Josefina Patema a ti.

“Ihatu dulu oku mu fiya oye aeke meumbo ile tu mu efe oye aeke poima, shaashi oha tu hange eemhadi  ile eenghaku da Fudila da enda momudingonoko weumbo ongula inene.Omulumenhu oo oha mbandameke noku tilifa ovanhu pomukunda ou, oha kala poundingosho  ta nu omalodu, nokonima yo ku nwa  omalodu oha hovele oku piyaaneka ombili yovanhu. Fye ina tu hafela oohofa. Otwa twala oshiima eshi oikando ihapu kopolifi, ndele vo ovadopa oku kwafela.

Fudila ota ku hokololwa a ponokela Ndiitu nomakatana neembele omudo 2012 pefimbo lOpaasa shalandula eshi omukainhu ou emu shivifila kutya ita va twikile we noku kala mekwatafano lopaihole naye.

LEAVE A REPLY

Please enter your comment!
Please enter your name here