Otwa yuka peni?

0
188

Omwedi Febuluali, oo umwe womeemwedi didjuu moshilongo. Omwedi omo oikundadaneki ya lopota omahokololo manyayalifa notaa tilifa a ningilwa ovakainhu.

Ovanhu tava dipawa vafa oinamwenyo ndele kape na kutya olyeye teva dipaa -ovalumenhu, ovanhu ovo va hoololwa ku Kalunga opo ngeno ve va amene, ovo vali tave va hepeke nokuva kufa eemwenyo.

Mu Kundana nena omuna ehokololo lomukainhu oo ali ena eeteelelo leemwedi omugoyi a tuwa neembele komusamane waye.

Vakwetu oixuna oifike peni? Omolwashike omulumenhu, neenghono doye dihapu to kufile ombele omukainhu e li meteelelo leemwedi omugoyi? Omunhu ehe na eengono dasha, omunhu ita dulu oku li aamena. Nomaxwilili oo ngaho uhena. Oshikwa shike hano vakwetu?

To tale nee kwaava tava kutula ova kainhu ominino, nokuva shashala nomakuva nomakatana. Ovalumenhu Ovanamibia mwa ninga oilikama. Ota shi tilifa.

Omalihumbato opaife otaa ulike ashike kutya ovalumenhu ovo hava denge nokudipaa ovakainhu, omavaya ongaho. Omavaya edulike okulitumba koinamwenyo.

Ku na nande efiku liwe tomono shikondobolo, ile ongobe yomhedi moshiunda ile ombwa yondume ta i li onghadi, kashiko! Vanhu onye ina mu lulilwa tuu kouvaya.

Tukululeni, lundululeni, xulifeipo okudipaa ovanhu vehena eenghono.

Omalihumbato ovalumenhu vomavaya, otaa ulike kutya novaleli voshilongo ova kanghwa nova nyengwa oku dilaadila omolwa omalihumbato makumwifa, nova yandja ashike oshinima eshi momake a Kalunga.

Moshiningwanima shikwao osheshi sha ningilwe kongeleka kOkahao oivike ya pita, omo ovakwaneongalo vomongeleka va taataa omubishofi mongeleka, ile va anya eva ningile Elongelokalunga. Oshiningwanima shi halula, noshi udifa nai.

Umwe ote li pula kutya oshike sha enda mongava? Oshike sha enda meemwenyo detu, fye ovaAfrika, fye ava twa tekulilwa efimaneko lovakulunhu, no mweemwenyo dovaKriste, ovo va longwa nova tekuliwa oshipango shitine? Mbela oshike sha enda kOkahao, nomOngerki ya ELCIN?

Ovanamibia, otu na oku kendabala oku yandja oshiholelwa shiwa koshiwana shokomongula, tu shi tekulile efimaneko. Ngeenge nee hatu lengaifa nokutumbulila ovakulunhu ile ovakomesho vetu oitya ii moipafi younona, ohatu yandja nee efano li li ngahelipi kounona?

Osho twa hala va kale tava kandula po omikundu ngaho monakuiwa?

Kakele kwaasho, ovaleli, dimbulukiweni Omuingilisha ou a tile, apa pena ovanhu vewete va findilwa kongudi, kapa kala ngoo ina pa holoka oikolokosha. Naku dimbulukiwe vali kutya Ongerki ya Elcin noya Anglican oda totelwe po shaashi Martin Luther nokonima King Henry VII novalanduli vavo, va li ina va twa kumwe noveta yaKatoolika. Ngeno mbela hasho, ngeno ongeleka yaKatoolika ka Rooma ngeno oifike peni?

Oveta oshinima shiwa, na i longifwe alushe ashike ongerki na i kendabale oku longifa oveta mokuhanganifa, okukalekapo ombili, etwokumwe nouyuki.

Ovaleli, nava pwilikine, ndele tava kandula po omikundu pefimbo. Nena omOkahao, mongula kushi apa vali ta shi ka ningwa, ohandje imwe va ti oya xwika ofuka, loo edina lokambwa oha li udikila kukamukweni.

Elineekelo oleli kutya Omubishofi mupe tatekulu Veikko Munyika oo opo a nangekwa ota ka kwafela mokuhanganifa noku alulila ombili mOkahao.

LEAVE A REPLY

Please enter your comment!
Please enter your name here