Ounona va pila monduda

0
264

KuHelvy Shaanika 

 

ONGWEDIVA – Ounona vavali vomomukunda Uukuuvu mOshikandjohoololo Okahao, mOshitukulwa shaMusati, ova fya efyo linyayalifa eshi va pila mondunda.

Otaku hokololwa kutya ounona ava, ovo aveshe ve na eedula mbali, ova pila meumbo Osoondaxa ya djako lwopo 21h00.

Ounona vati ova li va fiwa meumbo ku inagona, oo ena okandingosho poushiinda.

Oufiku oo, omukainhu ou vati okwa fiya po okandingosho noku uya keumbo opo a telekela ounona mwakwatelwa kamwe ka dalwa komumwainamati, na kakwao ka dalwa komunwaina kadona.

Konima eshi e va telekela noku va pa okulya omukainhu vati okwa twala ounona monduda vaka nangale, ye ta shuna ngeno opo a ka pate ko.

Ashike mokutala konima eshi a fika kokandingosho, okwa dimbulula omundilo munene wa tema keumbo laye.

Eshi ye pamwe no va shiinda va ka lotokela keumbo, ova hanga nale eenduda dili mbali, mwa kwatelwa omo kwali mwa nangala ounona, tadi ongotele.

Omupopiliko wOpolifi kOmusati, Lineekela Shikongo okwa ti  ounona ovo va xulifa ovo Loide Julius na Magdalena Nason, aveshe ve na eedula mbali.

Shikongo ta hokolola kutya meumbo omwa li yoo muna ounona vavali kamwe oke na eedula 16 omanga kamwe kena eedula hetatu.

Ounona ovo vakula vo ina va mona nande oshiponga, shaashi vo ova li va nangala monduda i lili, oyo ina i kwatwa komundilo.

“Ova ka duduluka mo ashike meemhofi eshi ve udite ovanhu, ovo va tondoka onghuo tava dimi omundilo.

“Oshietifi shomundilo ina shi shivika, shaashi omukainhu okwa ti ye iha minikile noulexita, ovo kwali ta ku fekelwa kutya pamwe ovo va eta omundilo, okwa kala ha longifa otoshe,” Shikongo ta wedapo.

Omakonaakono opolifi moshiningwanima eshi, otaa twikile.

LEAVE A REPLY

Please enter your comment!
Please enter your name here