Seibeb a sindana uudhano woombasikela ishewe

0
193

Ku Carlos Kambaekwa na Otniel Hembapu 

 

WINDHOEK – Omuhingi gwombasikela dhingi moNamibia , Costa Seibeb okwa sindanapo uudhano woombasikela mboka wa dhanenwe moVenduka Osoondaha ya ziko. Seibeb gwomimvo 22 okwa fa keena ngoka te mu yi we moshipala moku dhana noku hinga nawa okathanguthangu moshilongo.

Oshoka omugundjuka nguka okwa thigipo ongundu onene ndjoka ya kwatelamo nomanyakwa ge shiwike moku londa uumbasikela sho a manitha uudhano mboka woshinano shookilometa 106 methimbo lyoowili 2 ominute 28 noosekonde nola hamano, oku ya pehala lyotango muudhano uutimilongo 29 wokomumvo woMbaanga ya Nedbank.

Uudhano mbuka owa ningilwa momapandaanda ga Venduka noshowo momudhingoloko gwoshilandopangelo.
Seibeb okwa tameke oku kayila nawa okafalata ke  mokati kaathigathani yeli 188, naashika oshe mu pe ompito ombwaanawa oku endela pamwe naa kayili omanyakwa , itaa thigwapo ye itaa thigipo mboka ya li mongundu yokomeho.

Seibeb ngoka ta hwepopeke uunongo we moku kayila ombasikela okwa yalula nawa oonkatu dhe dhoku kayila , komukalo nguka kutya ongundu ndjoka ya li komeho muudhano ina yi mu thigapo noshowo ye ine  yi thigapo.

Konima yo ku adha poshinano shopokati koshinano shoka shookilometa 106 ongundu moka ye a li thigathanapo, Seibeb okwa hilulukamo no ku kwata komeho, naathigathani mbaka ya li naye okwe ya thigile ontsi inaa ye mu adha wee sigo oosho ye ke mu mona sho ta pewa oshishani shesindano pehulilo lyuudhano.

Seibeb ka li ta ulike a vululwa konima yuudhano no kwa ti okwa tyapula nawa omunute kehe muudhano mbuka, a ti okwa tegamena nohokwe oku ka kutho mbinga  muudhano wopashigwana mboka tawu ka dhanwa momasiku 28 Febuluali. “Uudhano owa li wa kindja kashona ndele  nando ongawo owa li  uuwanawa unene tuu sho onkalo yombepo ya li ya talala nawa, ishewe otandi pandula iilyo yoteama noshowo aathigathanipo ooyakwetu molwa okuhinga nawa nokutulapo ondapo ndjoka ya hingwa kutse noshowo ya kala neihumbato ewanawa pethimbo alihe lyuudhano,’Seibeb a ti.

Loto Petrus na Pascal Markgraaff oyo ye ya pehala etiyali netitatu sho ya thiki pehulilo pethimbo limwe lyoowili 2 ominute 28 noosekonde 3,2.

Muudhano waakiintu omudhani a lokelwamo moku kayila oombasikela ,Irene Steyn, oye a thiki tango kesindano moku mana oku hinga oshinano shoka shookilometa 106 komeho yengungo lyaathigathani aakiintu. Omunamimvo 36 Steyn okwa li omutiyali muudhano mbuka omumvo gwa yi.

Uudhano mbuka wu holike koyendji owa li wa kuthwo mbinga kaa kayili yuufalata ye li kumwe ayehe  1 080 ya thigathanapo miinano shookilometa106 ye li(188), ookilometa  75 ye li(319), ookilometa 35 ye li (341) nookilometa 20 ye li (231).

LEAVE A REPLY

Please enter your comment!
Please enter your name here