Ya pewa ongombe sho ya longa nuudhiginini

0
224

Ku Maria Namupala

 

ONDANGWA – Minista gwElongo, David Namwandi okwa gandja ongombe kOshikandjolongo Onathinge molwaashoka sha longo nuudhiginini melongo, omvula ya ziko.

Minista Namwandi  okwa tokola opo a kuthe ongombe ndjika moshigunda she ye a gandje kOshikandjolongo shika oshoka osha longa nuudhiginini, sho sha dhenge ayehe mOshikoto.

Omukuluntu gwelongo mOshikandjolongo Onathinge Naemi Amuthenu okwa tseyithile oshifo shika kutya ye pamwe nombelewa ye oyuu vite etumba oku kala ya longa nawa mekonakono lyomvula ya ziko.

Ongombe ndjino oyali yeyi pewa oshali kuminista na ina ye mupa nande osha. Amuthenu okwa holola kutya Oshikandjolongo she osho sha dhengemo iikandjolongo ayihe sho sheya shotango mOshitopolwa shaShikoto naashino oshili oshikando oshititano nokuli.

Okwa tsikileko ta ti omvula ya ziko uunona awuhe kumwe mbono wa shanga ekonakono lyondondo onti-10 owa li 500, naambono weshipondola okuya kondondo onti 11 owu li 426 sha hala kutya muunona mbono uushonashona owala owo inaa wu shipondola ano wu li owala 75. Oya pititha oopelesenda dhi vulithe po 85.

Oshikondo shElongo osho oshuunganeka oshituthi  she gandjo lyomapapa, noonzapo omolwa epito nawa lyuunona nomolwa iizemo iiwanawa mbyono Onathinge ya adha. Amuthenu okwati egandjo lyomapapa ndika otali ka kalako momasiku 14 ga Maalitsa  2014, tashi ka ningilwa pOsikola Amunime yili mOshikandjohogololo Olukonda. Ta indile aavali, aanaskola ayehe koombinga noombinga, ookuume niikandjolongo mOshikoto oshowo puushiinda yi ye yi ka ninge oonzapo sho taku gandjwa omapapa.

Okwa ti kuye oshili etumba enene oku kala ta lele aantu taya etasha moshigwana unene tuu sho ye na elongelokumwe yo ya taambathane elongo lyuunona wayo. “Shino oshafa onga ondjodhi oku taambako ongombe ndjika tweyi pewa omagano tse tu wape tu tyapule oshituthi shetu nenyanyu ngaashi tweshi ilongela’’ ta gwedhako.

LEAVE A REPLY

Please enter your comment!
Please enter your name here