Frans Indongo a kumagidha aanangeshefa aashona ya longe

0
729

WINDHOEK – Omukokoli omunangeshefa gwoIndongo Group, Omundohotola  Frans Indongo okwa li a kunkilile nokudhenga omuthindo kaanangeshefa aashona opo ya longe nuudhiginini no neitulomo opo ya yambule po noku tula Namibia ponkantu yopombanda. 

Shika okwa li eshi popi mompito yegandjo lyoonzapo dhoproyeka yaSam Nujoma, Yomapendulopo gIikwangeshefa Iipe moshilongo (SNIEDA), oshiwike shika pu yimwe yomoohotela dhomoVenduka.

Poshituthi shika opwa li Omukokoliperesidende gwaNamibia, Omundohotola Sam Nujoma, Omuperesidende gwoNdjugo yIipindi nIikwafabulika muNamibia, Martha Namundjebo Tilahun, Omunambelewa omukuluntupitithi  gwoNdjugo yIipindi nIikwafabulika, Tarah Shaanika, Omukuluntu nOmugandjimayele mOoprograma dhomakwathelo gIikwangeshefa iipe muAfrika lyokUumbugantu omusamane Juha Miettinen naawiliki yoongeshefa oompe moNamibia.

“Ngame ondi li omwiitaali a kola kutya, oongeshefa dhingi, odho emanya lyokolonela yonakuyiwa ombwanawa yoshilongo shetu netegameno lyaayehe lya kola. Ihe oongeshefa ndhoka tadhi humu nawa komeho, odhi li miikaha yaanangeshefa mboka ye li aatungi yonomola yotango melago lyadho,” Indongo ta ti.

Okwa gwedha po ishewe ta ti, ota saluta aanangeshefa mboka ihaaya ipe ashike omukumo oku holola po ashike shoka haya yaguma, ihe oye na onyati yoku shi pititha, nongeyi ohaya kutha ombinga metungalo lyeliko lyopashigwana.

“Etameko lyongeshefa ohashi vulika li kale ngaa epu, ihe nando ongawo, iiyimbi yolela ohayi holoka mekoko nomekalelopo lyayo omolw’iinima mbyoka hayi holoka po ombaadhilila inaashi tegelelwa.

Onkalo yuuwindji wiinima mbyoka inaayi tegelelwa ya ka katela maanangeshefa, oya pumbwa uunongo washewa, eiyuvo lya kola lyomuule metsikilo,” Indongo ta gwedha po.

Indongo okwa indile aanangeshefa ya kale noku tala noku konga oompito dhelago, ye dhi longithe opo dhi ya etele elago, noya kale nonkalo yuukwatya hau vulu okulundululwa monkalamwenyo, yo kaa ya se uunye, yo yi igameke konkalo yomalunduluko meendelelo ngaashi tashi vulika.

Omukokoliperesidende Sam Nujoma okwa ti aakwashigwana na ya kambadhale opo ya yambidhidhe aanangeshefa aashona opo woo nawo ya vule okuyambula po eliko lyoshigwana tashi pitile muunongo wawo.

 

Ku Pinehas Nakaziko

LEAVE A REPLY

Please enter your comment!
Please enter your name here