Hitman oku li popepi noku kwata koshishani shuuyuni ishewe

0
219

KuOtniel Hembapu

 

OUTAPI – Enyakwa lya Namibia lyondjundo yo World Boxing Organization (WBO) International Lightweight Paulus ‘The Hitman’ Moses okwa katuka onkatu yimwe oku uka popepi noku adha oshishani shuuyuni mokudhenga oongonyo.

Hitman onkatu ndjika okwe yi katuka konima sho a sindana olugodhi ndoka a kondjo kongulohi yOlyomakaya ga yi pOlufuko Centre modoolopa yOutapi moshitopolwa Omusati.

Nonando Hitman ka li ta umbu oongonyo ngaashika eshiwikile shito noshowo ka li ta ulike olugodhi lwa yaga kegonga ngaashi sha tseyika nawa, okwa longo nomukumo okukondjitha omukondjithi gwe, na ngeyi okwa si oshimpwiyu kutya okwa gamena epapa lye lyo WBO International Lightweight komukondjithi gwe omuArgentina  Cristian Rafael Coria.

Konima yomadhingoloko gahamano gopetameko ngoka ga li geende kashona naamoka oongonyo dha li itaadhi topa naanaa, Hitman okwa ka, tulamo ongela yopombanda okuza medhingoloko eti 7 ne 8 sho a kala ta dhenge omukondjithi gwe konyala mpoka a hala, emu dhenge uuhandja komutse noshowo moombati, nomadhengo ngaka oga kala taga shunitha omuArgentina nguka monima omathimbo gamwe.

Nonando pomathimbo gamwe olugodhi nduka olwa yonwa ku Coria sho olundji a kala noku papatela  Hitman nenge nookuli a kala ta fadhukapo Hitman, enyakwa lya Namibia natango olye shi pondola  oku dhenga oongonyo dhu ukilila ndhoka dha ehameke Coria  shampa ngaa Hitman emu monene ompito.

Hitman okwa kala woo eshi kutya Coria oha dhenge oongonyo dha kindja onkene okwa longitha omukalo gwe gwoku dhenga ta yakele nuuna ewete tashi lulu ye ta shuna kashona monima opo a yande oongonyo dha Coria dhaa he mu kwate naanaa. Mokuumba kwe Hitman okwa kala ta longitha iikaha ye ayihe ndele uuna a hala oku inyengitha Coria okwa longitha ongonyo ndjoka yokolulyo konyala hayi dhenge yi vule pohamala.

Olugodhi lwaHitman lweendelelo ngolwaadhi lwo ishewe olwo muntu ta dhenge yimwe mbali ye ta nukile mpeya olwa  fa lwa ngwangwaneke Coria momadhingoloko gahugunina nompito ndjika oya ningile Hitman uupu opo a gandje uuhandja ngaashi a hala, shika osha thiminike Coria a kale ashike ta tondoka noku yanda oku ehamekwa noonkondo ku Hitman.

Molugodhi nduka Hitman okwa gwanitha euvaneko lye kutya Coria ota ka shuna ashike oonyala dhowala kakele kokofa ye ndjoka a li eetelele oku za ko Argentina.

Momalugodhi galwe ngoka ga tetekele olugodhi olunene enyakwa lyaNamibia mondjundo yo WBO Africa Lightweight, Martin Haikali ina vula nando okuza okayemele komazigudhe oshoka olugodhi lwe okwe lu sindana nokudhenga yimwe nopevi omukondjithi gwe Tekeshe Kabwe gwoDRC medhingoloko lyotango, sha ningwa owala meni lyomunute gumwe noosekonde  omilongo ntano na yimwe.

Olugodhi olukwawo omuhikihiya omuSouth Africa, Jaap van Nieuwenhuizen okwa thiminikwa opo a mweneke olugodhi pokati ka Julius Indongo’s na Joel Mwelwa medhingoloko lyotango opo a yande nguka kaa sithwohoni miipathi yaantu sho konyala a nyanyagulwepo ku Indongo noongonyo dholugodhi itaalu nu wa meya.

Molugodhi lwomadhingoloko gahamano, Sakaria Lukas okwa dhengemo Iilunga Kabwe gwokoDRC niitsa mondjundo yo featherweight, omanga  Jafet Utoni Kapapu okwa dhengemo omumati omuNamibia omukwawo Lukas Kashindi yimwe nopevi medhingoloko lyotango mondjundo  yo Flyweight yomadhingoloko gahamano.

Mondjundo yo Bantamweight, Johannes Simon okwe endepo owala pomumati omuNamibia omukwawo  Abner Mwafangeyo niitsa omanga  Jeremia Nakathila okwa dhenge Manfred Haimbanga niitsa woo mondjundo yoJunior Lightweight momadhingoloko gane, ye Kapena Hamunyela ta sindana niitsa oyindji sho a dhenge Emmanuel Mungandjela molugodhi lwawo lwomadhingoloko ge li gane.

LEAVE A REPLY

Please enter your comment!
Please enter your name here