Omvula ya piyaganeke uudhano wekopi lyo Bidvest

0
152

Komutoolinkundana

 

WINDHOEK – Omaudhano gaali muudhano wekopi lyo  Bidvest Namibia Cup woosipana dha hugunina dhi li 16 mboka wumwe wa li wu na oku dhanwa koospana oonene dhomoKatutura, kokutya African Stars na FNB Orlando Pirates pokapale ka Sam Nujoma Stadium oshiwike sha yi owa undulilwa komeho.

Shika osha ningwa molwashoka okapale oka li ka tuta noonkondo.

Osipana yomoshitopolwa shopevi vii muudhano Kaizen Football Academy oya li yi na oku tsakanena naandjoka yo Ramblers muudhano wotango wa li wuna oku dhanwa esiku ndyoka.

Omunashipundi gwokangundulongekidhi kuudhano mbuka, Roger Kambatuku, okwa ti yo oya tokola opo omaudhano agehe ngaka ga mwenekwe kaa ga dhanwe esiku ndyoka konima sho ya konakona okapale na oya mono kutya oke na unene omeya ogendji.

“Ongo olutu lu na oshinakugwanithwa, NFA okwa tala egameno lyaadhani noshowo iinima yilwe yina sha nonkalo yomvula ya tya ngaaka, onkene okwa tokolwa opo omaudhano ngaka gaali ga undulilwe komeho sigo okesiku lyaashiwike natango,” osho omwana gwa nakusa Ben Uanivi a ti.

Kambatuku okwa ti etokolo kutya uunake uudhano mbuka tawu ka dhanwa ota li ka kuthwa pethimbo lyoopala, konima sho aayehe ya gumwa kwaashika ya kundathanwa nayo.

“Otuna oku galukila noku kundathana naayehe ya gumwa kuudhano mbuka kokutya oosipana, ooliha, oshitopolwa shotango shuudhano, oshitiyali, aayambidhidhi yetu kokutya mboka taya gandja ekopi ndika, opo ihe ngele twa kundathana nayo nena ota pa gandjwa ihe omasiku omape moka omaudhano ngaka taga ka dhanwa.

Okwa ti mboka ya landa uutikete naya kale ashike nawo oshoka mbuka owu na natango ongushu, molwa uudhano mboka wa undulilwa komeho.

Omaudhano ngoka ga li gena oku dhanenwa poMalinda nopoGobabis oga yi komeho pwaana shoka tashi ga yi moshipala. Osipana yoTropical Heat (NDF – Grootfontein) oya dhengwamo muudhano mbuka kospana yomoLiha yopombanda ya Tura Magic nookoola 2-1 pokapale ka Legare Stadium moGobabis.

United Stars okwa dhengemo PC Blue Boys nookoola 3 mu 1 pokati koosipana mbali dhili moLiha yopombanda opo ndjika yi ye medhingoloko lyo kwotafinala. Black Africa okwa endepo sho kambiya po Blue Birds nookola ntano mu yimwe.

Po Malinda osipana yo, Tigers oya dhengemo osipana onkwawo yomoliha yopombanda yo LHU Blue Waters nookoola 2-1, omanga osipana yoMountain Rangers ya li ya dhana shi thike pamwe naandjoka yo Rundu Chiefs ookoola mbali mumbali omanga ina yi ka sindana koopenalti ookoola 4-1.

Ospana yoCitizens FC oya li ye edhile esiku lyuudhano poMalinda sho ya dhenge mo osipana yo Bee Bob Brothers nookoola 5-1.

LEAVE A REPLY

Please enter your comment!
Please enter your name here