Ongundu yaamboka yeethapo osikola tayi yugu aantu

0
242

ONGWEDIVA – Opolisi moshitopolwa shaShana oya londodha oshigwana opo shi kale sha kotoka molwashoka opena ongundu yaagundjuka aamati ndjoka tayi yugu aantu iinima yawo.

Omukuluntu gwopolisi mOshana, Komishina Ndahangwapo Kashihakumwa okwa ti ongundu ndjika oya thikama maalumentu aagundjuka mboka ye ethapo osikola nongashingeyi oyi ininga ookalyamupombo monkambadhala yawo oku ihupitha.

Kashihakumwa okwa ningi elondodho ndika sha landula sho ongundu yaambaka ya tameke oku tilitha aakalimo moshitopolwa moku ya yuga iinima yawo unene iikwangodhi, niikwakompiuta, ngaashi olaptopa noshowo oongodhi dhopeke, ndhoka mbaka haya ka landitha kOshikango. Okwa ti osha fa pondoolopa ndjoka iinima mbika ya pumbiwa unene kaakwashigwana yAngola mboka haya talelepo ehala ndyoka oku landa iipumbiwa yawo.

Ongundu ndjika oyo woo tayi fekelelwa oshiningwanima sheyako lyookompiuta konyala 30 ndhoka dha yakelwe moseko yaShakati omasiku ga ziko, ihe sigo oompaka ndhika ka dha li dha monika.

Kashihakumwa okwa ti opolisi oya itaala kutya ‘ongenga’ ndjika oyo tayi  yaka noku yuga aantu konima sho etiyali oshiwike shika aafekelwa yatatu ya kwatwa po kopolisi. Mbaka oya kwatwa konima sho ya yugu omumati omugundjuka olaptopa ye omanga nguka a li mondjila ta zi kosikola uuka kegumbo.Aafekelwa mbaka yatatu oya kwatelwa pehala lyawo lyuuholameno molukanda lUupindi mOshakati. Ota ku hokololwa kutya mbaka yatatu aniwa oya li ya ende taya popi nomumati omugundjuka ngoka a li uuka kegumbo oku za kosikola. Gumwe  gwaambaka aniwa okwa tameke ta ikunditha omumati nguka omanga  yakwawo yaali ya nukile omumatyona  ngoka ye mu kutha ondjato ye  noku fadhukapo nayo.Omupya gwawo oongoka kutya omumati gumwe gwawo oku shiwike koshihakanwa shawo mpoka ha zi, na ku yugwa okwa fala opolisi pegumbo lyaangoka.

“Otwa kala tu shishi kutya okathimbo ashike okashona omanga inaatu tseya  kutya ookalyamupombo mbaka oyo oolye na ohaya zi peni. Unene tuu sho twa kala noku taamba oolopota tadhi zi moshigwana, tashi ti opena aagundjuka mboka taya ende taa konkola pomagumbo gaantu, taya ti oya hala okwoopaleka moohofa dhomagumbo nenge ta ya ti ota ya landitha  sha nenge kutya oha ya pangele oongaku nosho tuu,” Kashihakumwa ta ti.

Kashihakumwa okwa londodha oshigwana  shi takamithe aantu mbaka oshoka omathimbo gamwe ota ye ya pegumbo taya hokitha omunegumbo ohapu omanga yalwe yomungundu ndjika taya iyakele megumbo noku yakamo  kehe shoka ye wete shina ongushu oku landitha. Okwa ti  pomathimbo gamwe oombudhi ndhika otadhi ku adha to ende, nongele odha ndhindhilike kutya owuna ondjato yolaptopa  nenge kehe ngaa ondjato, otaya holoka inaashi tegelelwa  noku ku yuga ondjato yoye.   “Otwa ndhindhilike kutya oyendji yomwaambaka oya ethapo osikola na oya ninga ookalyongo  moku yuga aantu omaliko gawo opo yo ya hupe. Kashuhakumwa okwa ti ongundu yaambaka oyindji otayi adhika momalukanda  Uupindi, Evululuko nOshoopala mOshakati. Aantu naya kale woo ya londodhwa opo ya a lande iinima ya yakwa. Na oya pumbwa oku pula aluhe ombapila dhomalandelo goshinima shoka taya landithwa komuntu yaa he mushi,” Kashihakumwa a londodha.

 

KuKakunawe Shinana

LEAVE A REPLY

Please enter your comment!
Please enter your name here