Oovene veebaa vamwe moumbangalanhu ina va hafela eedilo

0
178

ONGWEDIVA- Oshiwana shovanangeshefa unene tuu odo hadi landifa oikolwifa ile omalodu moumbangalanhu woshilongo ova ulika oku uda na i kwavo, kombinga ye igido kutya kapena odunda nando o imwe yomalodu ta i patuluka efiku leilikano olo la liko onghela oshilongo ashishe.

Efiku leilikano lopashiwana ola igidilwe kOmupresidende Hifikepunye Pohamba nelalakano opo oshiwana ashishe sha Namibia shi mone omhito oku uya pamwe noku ilikanena oiningwanima yelongifo lekuni oyo ya hapupala moshilongo eshi, unene tuu oyo yovalumenhu tava dipaa ovakainhu moinima yaafele.

Okabinete oka ufa kutya, ovawiliki aveshe vopapolitika, ovanafikola, ovanailonga mepangelo, ovanailonga, ovanyasha , ovanamapya, ovawiliki vopamufyuululwakalo , vopamhepo ,ovawiliki veengeshefa noshoyo vomahangano opashiwana moshilongo ashishe va unganekwe oku kufombinga mefiku lopashiwana leilikano.

Okabinete oka ufa yoo opo eengedjo pomaongalo aeshe ndi denge pefimbo limwe oshilongo ashishe potundi 13h00.

Omolwa efiku leilikano omukulunhu wopolifi , Leitenanda Ndjai Sebastian Ndeitunga okwa yadja yoo elombwelo kovapolifi oshilongo ashishe opo va tale kutya eefitola adishe doikunwa nomalodu, mwa kwatelwa eebaa, eeshabina, noodingosho woucuca ina va patuluka efiku olo.

“Opolisi oya pewa elombwelo la kwata moiti oku kwashilipaleka kutya eefitola adishe domalodu neebaa moshilongo ashishe oda edila efiku olo. Omukwashiwana keshe okwa teelelwa eli humbate nawa nomomhepo iwa, noku yandja efimaneko kwaa vo va tetekela nale, okupitila momadipao. Otwa teelela yoo opo pa ha kale nando oilonga yomiyonena ta i longwa mefiku le ilikano.

Omolwa elombwelo eli ovanangeshefa vamwe konooli yoshilongo ovo hava landifa oikolwifa ova nyenyeta kombinga yoshinima eshi shoku edila eengeshefa davo oule wefiku alishe. Vamwe ova pula kutya omolwashike efiku le ilikano inaa li ufwa li ningwe Osoondaxa olo li shivike ongo efiku liyapuki.Ou kwa ti vo otava kanifa shihapu, nokwa faneke ngeno opo eefitola davo di patuluke oule wetata lefiku olo.

“Fye otwa piyaana paife , osheshi ova shiivifile moradio nokutya eefitola otadi patulula okudja po 14h00 paife ota tu lombwelwa nokutya itandi yuuluka nando.

Fye nafye otwa kumwa koilonga oyo yelongifo lekuni, neenghono na otuna yoo omaipulo kombinga yoshinima eshi, ndele fye otuna eengeshefa oku wilika nokulandifa, paama ekanifo olo ta li tu hange molwashi inaatu longa efiku eli olye te keli futa. Osha fa fye ongo ovanangeshefa inaa tu valulwa, osheshi etokolo ola ningwa ashike no ina tu kundafanwa nafye,” Omunangeshefa umwe womOshakati a ti.

 

KuKakunawe Shinana

LEAVE A REPLY

Please enter your comment!
Please enter your name here