Ovakulupe vavali mOmulonga va pumbwa ekwafo

0
237

OMULONGA  – Ovakulupe vavali ovo ve li ovo aveke momaumbo avo pefimbo eli moshikandjohoololo Omulonga ota va indile ekwafo moshiwana  nosho yo kepangelo.

Justina Simon, oye umwe womovakulupe ava, a dile koAngola ndele nee okwa kala moNamibia omido dihapu okudja tuu eshi e uyile mo efimbo a li okakadona kanini. Okwa hokolola nokutya okwa kala monghalamwenyo ili nawa fiyo osheshi ovana vaheyali nomushamane waye va xulifa.

Fiyo onena eli meekulu Simon oku li aeke meumbo, omutekulu waye oo vali na ye meumbo okwe mu fiya po a ya ku xe oo a kala kOshakati.

“Omutekulu wange ota kala apa ta ningi shike meumbo eli lo luhepo? Okwa ya a ka konge ouxupilo uli nawa koshilando,” meekulu ou ta ti.

WaSimon ota ti ita dimbuluka kutya oku na omido difike peni, ndele nee oku shishi nokutya okwa hanga oku tambula openzela yovakulupe, oudjuu ouli ashike opo eshi okamutwe koshilongo okapya po.

“Odocumende oyo aike ndina ta i dulu oku ulika kutya aame lye lye, okakalata komahoololo akeke,” WaSimon ta ti.

Omukulupe ou ta hokolola kutya pefimbo eli, oha kwafelwa kovashiinda apa naapenya, ngeenge ava ina ve mu kwafa ye oha xupu moikulya yoshikukuta oyo ha havala okudja kepangelo, shaashi kena po vali odjo imwe yoyuuyemo oku mu vatela opo eli xupife.

“Ame ihandi li efiku keshe, ondina okuxupifa po oufila wange u fikife nge kefimbo loku tambula eendja doshikukuta. Oshikukuta fimbo limwe ohashi yandjiwa konima yeemwedi mbali ile nhatu,” ta hokolola.

Kakele ka meekulu WaSimon, meekulu Penexupifo Kaudinwa womomukunda Okaonya na ye oku li monghalo youdjuu eshi ta xupu shokadila. Omukulupe ou na ye iha tambula openzela yovakulupe ngaashi vakwawo, na oha xupu moku landifa oimbale oyo ha tungu yeemwene opo ashike a dule okulanda oikulya .

Kaudinwa okwa ti eshongo eli ole mu hanga konima yefyo la ina oo a xulifa omido nhatu da pitipo. Okwa ti efyo la ina ole mu etele oudjuu  shaashi paife oku li monghalamwenyo oye aeke, no pehena oo te mu yambidida. Eumbo laye ola hanaunwapo koimuna fimbo a li a tambulilwa moshipangelo momudo 2012.

“Onda li ndina eumbo lakula, ashike paife eumbo lange olina ashike onduda imwe aike. Shikwawo ovamwange  ova fiya ngepo va ka konga ouxupilo uli xwepo keenhele dokokule. Omutekulu wange umwe oo kwa li va fiila nge na ye okwa djapo pwaame aka konga yoo opo ta xupu nawa.”

Ovakulupe ava, va vali otava indile koshiwana shi va kwafele, eendja, oikutu, noikumbafa unene tuu eshi efimbo loutalala lili popepi, vo kavena oikumbafa ya wana.

Ovasamaria ovanamutimanghenda ovo ta va dulu oku kwafa ovakulupe ava ota va dulu oku tumina omakwafo ku kansela woshikandjohoololo Omulonga omushamane, Erickson Ndawanifa.

 

 

KuNuusita Ashipala

LEAVE A REPLY

Please enter your comment!
Please enter your name here