Elineekelo leteyo liwa

0
163

Shiyenga eshi ya ninga omafiku ta i loko, ota shi ulike kutya natango ope na elineekelo kutya ona tu ka mone ngaa eteyo liwa lidulife lomudo wadjako.

Odula oya loka ashike oule woshivike ndele eshito, mwa kwatelwa omapya, ola lunduluka hano tali monika nawa. Eshi ota shi yandje eteelelo liwa nelineekelo leteyo li li nawa momudo 2014.

Eshi nee twa mona omuloka muwa ngaha oilonga na i yemo. Omapya naa limwe tu shive tu keleleni onghalo yokuhena eendja da wana oyo yetu denga peemwenyo okudja odula ya djako.

Pakulonga ngaha noudiinini, ita tu li longele ashike oikulya, ashike oha tu kwafele yoo epangelo letu, oku li shakeneka ondjilakati opo li dule oku eta po sha vali shimwe, noku taalela eepoloyeka dikwao da fimana, odo tadi kwafele mokutwifa ondjodi yopashiwana yomo 2030.

Odula nee eshi ta i loko ngaha, natu kwateni nee nawa omeva.

Oha tu efa ashike odula tai loko, oyana tai yada, ndele omeva taa pwiinine po ashike, ndele nonghendabala yoku ongela omeva oyo ngaho iha tu ningi.

Kakele komahangu noilyavala oyo twa ikilila hatu limi moshikakomudo shimwe ashike kodula, momeva odula, omu na eengeshefa dakola, natu pashule ashike omesho etu. Imwe yo meengeshefa edi, ounafaalama weeshi.

Efimbo eli kOuministeli weeshi needjo domefuta, nakufya Abraham Iyambo okwa li etu palela ondjila, younafaalama weeshi.

Omolwashike mbela ita tu pendula po ondjodi oyo, pamukalo wokufa outale neendama odo ta di tu kwafele oku ongela omeva, ndele hatu tula mo eeshi, ndele hatu ningi ovanafaalama?

Ounafaalama weeshi oshinima shafimana, moku tu etela sha meendjato, moku xumifa komesho oundjolowele woshiwana, nokuxumifa yoo komesho omaxupilo oshilongo.

Omunhu oto tale ashike komikweyo odo hadi kala keengeshefa doFish Consumption, odo da etwa po kepangelo, oku landifa eeshi kombilixa.

Ovanhu ta va hakana eeshi, osho ta shi ulike kutya oshiwana shetu osha hala nosha pumbwa eedjo deeshi da wana.

Epulo oleli kutya ovanamebelewa veli neekelelwa eyambule po lounangeshefa weeshi, ota va longo tuu oilonga yavo? ota va xwaxwameke tuu oshiwana noku shi udifa ko oshinyangadalwa eshi sha fimana?

Epulo eli ole ya shaashi ounafaalama weeshi nghee ngoo twe u udile mudo lakanyeye iha tu u udu vali.

LEAVE A REPLY

Please enter your comment!
Please enter your name here