Euliko lyiizalomwa lya ende nawa poProtea

0
206

WINDHEOK – Omauliko yoonguwo kaahondji yopetameko ngoka ga ningilwe Ongulohi yOlyomakaya, oshikando oshititatu moHotela yaProtea moshilando shaVenduka oga endele nawa.

Euliko ndika okwali lya kwatelemo omahangano gaahondji yethike puyatano, ngaashi Elly’s Investment, moka muna aahondji yaali, Ndapewa naMenesia, MCreation yaMathew Erastus, Proud Clothing Line yaMetha Uushona, H Couture yaHanna Hangula noLeni Clothing Line yaHendrina Shikalepo.

Euliko ndika olyali lya egululwa koAmbassada yoRepubilika yaTurkey, Deniz Cakar, ngoka ali a gandja oshipopiwa she oshihupi, nokwa kumagidha woo aaNamibia ya hulithepo omashongo nomadhipago ngoka taga ningilwa aakiintu mongashingeyi.

Muusiku mboka wOlyomakaya omo moka woo mwa li mwa holoka omainyanyudho ogendji unene tuu kaandaanisi Aanamibia yo Morango Crew, noFTS Dancing Group. Kakele  kaandanisi, opwali puna woo aahikingalo aashona mboka ya li noku ulika uunongo wawo ngaashi Komesho naYoung T. Komesho okwali a imbi mo muungalo we uyali, Beautiful In My Eyes naFeeling This Game. Young T okwe ya pemo manga mOshiwambo nuungalo utatu.

Pe uliko ndika opwali wo pwa gandjwa omakopi kaahondji opo ta yeya. Hanna Nangula okwapewa ekopi onga omuhondji omushona, omanga Metha Uushona ali a pewa ekopi onga omuhondji gwolweetho olo tuu ndoka. Esther Ashipala okwa pewa ombandi yokakadhona hoka kali taka ende nawa uusiku mboka, omanga Justus Jost a li a pewa ombandi yomumati dhingi peuliko ndika.

KuPinehas Nakaziko

LEAVE A REPLY

Please enter your comment!
Please enter your name here