Komushangi woshifo Kundana

0
265

OVALUMENHU OVA NINGA OMITWE DOUNDINGOSHO

Ohandi shange oshinyolwa eshi nde shi talela mefano lovalumenhu nena. Inandi hala unene ndi kale ndili omhinge novalumenhu, ashike pitikeinge ndi etepo efano laashi nda mona movalumenhu ovaNamibia.

Okudja mounyuni wotete, ovalumenhu okwa li va fimanekwa ongo mutwe weumbo moshiwana. Ovalumenhu okwa li hava ifanwa va tondoke onghuwo ngeenge pena oshiponga sha hanga omeme nounona. Ovalumenhu okwa li va talwa onga ovaameni, ovahongi, ovanyangi, novena oukwatya weenghedimhango, elandulafano, oshoyo ovatekuli vounona meduliko.

Oshiwana osha kala noku tala komaumbo Ovalumenhu ava veshi holola pauyelele oku ulika ewiliko liwa lishi okuholelwa. Ashike nena hasho vali shili ngaha, ovalumenhu kave wetike vali ongo vananghedimhango, omaumbo okwa dundakana nokwa shalakanapo. Oshike sha puka mufye ovalumenhu?

Ponhele younona va lifwe kovalumenhu, ounona nena ovo tava lifa ovakulunhu. Omanga ounona tava tyapula eenghono dokulifa ovakulunhu, ounona vamwe otava ingida kutya “tate alukila keumbo”, manga vamwe vaya momapandavanda, navamwe va twalwa keehambo dovakengeli vaka life oimuna yavo manga ounona vavo ve va tuma keefikola diwa vaka longwa.

Manga inandi twikila, onda hala ndi fikame apa kutya, ovalumenhu omwa kanifa oukwatya weni (oshinge), omwa kanifa ekanghameno nomwakanifa oinakuwanifa yeni moshiwana. Nongenge ne ino kanifa oshinge shoye natu shimone keumbo loye, momukunda woye oshoyo moshiwana shoye.

Ovalumenhu kavena eenghono dasha, omavaya, nokavena omanyamukulo asha okulipopila. Ehapupalo lomakwatonghonga omeme nounona vashona, omahepeko omeme nounona, omadipao, ekupuleshi lounona oyo oinima ei tai ulike kutya ovalumenhu ova kanifa oukwatya wavo.

Nonande hava djala oikutu iwa, hava shingi omatuwa onhapo, veli momaumbo a kula mawa. Ohava djala oikutu iwa va udife okuhenakonasha, ohava shingi omatuwa onhapo va ulike oku endelela kwavo mokudipaa, omaumbo avo a kula ehena ovanhu oo omalimba oku hena ouyuki noumbudi.

Ova fiyapo ounona vavo vene, ova pumba eenghedimhango dopanhu nodokuninga omatokolo oku lifa nawa eenghalamwenyo dounona vavo.

Nonande omhango yoshilongo oya teelela ounona va yukifwe nokuyambididwa opo va kule mouyadi nokudimbuluka kutya ovo olyelye shama va kulu, ovalumenhu ova ninga ovatangalali moshinima eshi.

Ovadali vounona itave va file oshisho, ounona itava lifwa monghalamwenyo yavo yakeshe efiku, itava longwa ouwa nowii, itava hanyenwa, itava pukululwa, no kavena omaumbo omu veli meameno.

Ovalumenhu novakulukadi ove shi ninga omukalo ndjikilile woku etapo ounona nope hena edimbuluko kutya ovena oku tekulwa; ounona ove yapo pe hena ohole, tava kulu pe hena ohole yovakulunhu, tava kala ve hena ohole, tava kala mokati kovanhu ve hena ohole, tava i kongeleka ve hena ohole ndele tava tungupo oshiwana shi hena ohole – oshinima ashishe kashina ohole ashike. Oshike nee sha puka ngenge okaana oka endulula osho ovakulunhu vako va ninga? Ngenge ovakulunhu vako kava li neliudo lohole, okaana otake li hange peni?

Ngenge twa mona okaana kena omaliumbato maii, ohatu endelele tu popye “ounona voikumbu tuu ovo” nonande paushili woveene okaana ka keshi oshikumbu. Ovalumenhu vonena kavena ohole vo kavena onghenda ponhele yokutunga omaumbo otava tungu eembaa, otava nangala meembaa, tava longo meembaa, tava yukifa eembaa, tava amene eembaa, tava putuda eembaa, nakeshe shimwe tava ningi osha uka keembaa neendunge davo oda uka keembaa.

Efimbo ola fika opo ovalumenhu va kufepo oukwatya vavo natango, va tule omaumbo avo melandulafano. Natu fiileni ounona vetu efyuululo liwa lohole, elineekelo neitavelo lapama.

Ku:   Lasarus Nghifindwako Hakwaake

Omulihongi woikwaKalunga muAnglican

Ohangwena

LEAVE A REPLY

Please enter your comment!
Please enter your name here