NFA a tula aahikihiya yatatu pevi manga

0
204

WINDHOEK – Olutu talu wilike etanga lyokoompadhi lyaNamibia NFA olwa katuka onkatu ndjoka yapumba sho lwa lombwele aanambelewa yatatu ya ka vululukwepo manga uule womwedhi gumwe inaa ya wilika uudhano wetanga, molwashoka mbaka oya tula edhina lyuudhano mbuka methano ewinayi.

Aanambelewa mbaka yatatu oyo  Dankie Shinana, Andreas Helmut nomunambelewa ngoka ha kalele nokutala kutya uudhano otawu dhanwa pamautho nenge ha ithanwa Kommishina yuudhano, Alex Kapenaina. Mbaka yatatu oya tulwa pevi uule wethimbo lyomwedhi gumwe inaa ya wilika uudhano konima yokumonika ondjo kokommittee yevulikitho, omolwa okutula omutalelo nedhina lyuudhano wetanga lyokoompadhi methano ewinayi.

Aahikihiya yoohiya, olundji oya tyapula ompito okugandja omageelo kaadhani uuna mbaka ya taaguluka oompango dhuudhano wetanga lyokoompadhi, ihe moshiningwanima inaashi tegelelwa aanambelewa mbaka oyi iyadha mompito ndjoka oyo taya pewa egeelo molwashoka inaa ya landula oompango dhuudhano, nongeyi ohayiike koshiya yi ya londako.

Aanambelewa yatatu oya lombwelwa kutya itaya ka kala nando omewiliko lyuudhano wetanga lyokoompadhi uule womwedhi gumwe, molwashoka oya longele kumwe ayehe moku taaguluka oveta yuudhano sho ya pitika opo ospana yimwe yi tule mo aadhani yane mokapale okupingenapo yalwe. Oveta yoku lundulula aadhani muudhano woliha pambelewa otayi utha ashike aadhani yatatu oyo ayeke yena oku tulwa mokapale.

Omuhikihiya Dankie Shinana ngoka a pewa uuthemba wokuhika ohiya palongo lyoFIFA okwa li a yolitha ongundu yaa yambidhidhi yetanga lyokoompadhi pokapale koIndependence Stadium, sho a tindi enyenyeto lyospana yoTura Magic sho ya ulike kutya okwa pitike ospana yoPCBlue Boys opo yi tule mo omudhani omutine mokapale konima sho ya adhika nale ya lundulula aadhani yawo ye li ya tatu ngaashi oveta yuudhano tayi shi utha.

Nonando Tura Magic a nyenyeta ngaaka kombinga yoshinima shika, omuhikihiya ine ya pulakena na okwa tsikile noku pitika omudhani ngoka opo a ye mokapale. Ospana ndjoka ya pitikwa yi tule mo omudhani omutine mokapale nando oya kanitha uudhano mboka  sho ya dhengwamo kwaandjoka yoTura Magic, oshiningwanima shika kasha li sha ulike ethano ewanawa unene tuu mokati kaadhani, kaatali yuudhano, noshowo kaanambelewa mboka ya li taya wilike noshowo taya kwathele opo uudhano wu ende nawa. Onkene shika osha thiminike opo  NFA a tule po ongundu ndjoka ya konakona shika. Oshiningwanima shika osha li sha ningwa pethimbo lyuudhano  pokati ka Tura Magic na PC Blue Boys momasiku 22 gaFebuluwali.

Omuhikihiya omukuluntu Boy Boy Ndjadila okwa koleke oshinima shika  a ti egeelo lyaawiliki mbaka olya tamekele nale momasiku 24 Febuluali nuumvo. Okwa ti Shinana pamwe na Andreas Helmuth oshowo na Alex Kapenaina oyo ya li ya tokola opo omudhani omutine a ye muudhano kombinga ya PC Blue Boys, onkene aahikihiya aayakuli ya Shinana ina ya kwatelwamo megeelo ndika.

Aanambelewa yaali mbaka oya li ye na oshinakugwanithwa oku tala kutya pethimbo lyuudhano omilandu adhihe odha landulwa. Omanga aahikihiya taya kwathele oya li taya kwatha omuhikihiya opo a vule okuninga omatokolo geli nawa mokapale.

KuCarlos Kambaekwa

LEAVE A REPLY

Please enter your comment!
Please enter your name here