Oipongolo yomunhu tai konakonwa

0
174

ONGWEDIVA – Opolifi mOshitukulwa shaMusati oya tokola opo i ninge omakonaakono oDNA, oku koleka oupambele womulumenhu oo oipongolo yaye ya hangelwe keehambo dokombinga yokOmugulugwombashe.

Oshivike sha djako ovanahambo ova hanga omakipa omunhu mofuka, oo paife taku fekelwa kutya o omulumenhu omunamido 34, oo a kanene momafiku Febuluali 3, neudo, novakwapata ova li va lopotela opolifi ekano lomulumenhu ou konima yomafiku atano eshi vemulixula.

Eshi ovanahambo vamona oipongolo oshivike shadjako, ova lopotela opolifi oyo ya ingida moraadio, nelalakano lokukonga ovakwapata ile ovapambele vomunhu oo.

Pauyelele oo wa yandjwa komupopiliko wopolifi mOmusati Sergeant, Heskiel Hamalwa ofamili imwe momukunda Onawa mOmusati, oya dimbulula oipongolo yomulumenhu, onga oshilyo shofamili yavo. Ofamili oyo tuu oyo ya li ya lopota omunhu a kana, oya lopotela opolifi kutya omulumenhu oo ove mu lixula a djala ombulukweva nokambidja kafa eimbi.

“Vamwe vomovanhu ovo vati ovakwapata, ova dimbulula oikutu oyo ya li ya djalwa kunakufya ta va ti ovo ve i mu landela. Paife eshi opolifi ina oku ninga po, oku ninga ashike omakonaakono oDNA opo tu kwashilipaleke kutya eshi ta shi popiwa kofamili oyo oshi li tuu mondjila, onghee omakonaakono opolifi natango otaa twikile,” Hamalwa ta ti.

Hamalwa ta weda po kutya, ofamili oya lombwela opolifi kutya, kai shi kutya oshike omulumenhu oo kwa li ta kongo keehambo dokOmugulugwombashe shaashi vo kave na ko ohambo, vo vali kaveshi ko.

KuHelvy Shaanika

LEAVE A REPLY

Please enter your comment!
Please enter your name here