Olweendo okuya ko New York

0
229

Okuza moLiberia otwa tuka nondhila sigo oko New York hoka oko kuna oombelewa oonene dhIigwana Hangano. Molweendo nduka lwootundi omu 16 otwa endemo nomusimanekwa Angie Brooks, ngoka a li amushanga gwopevi gwominista yIikwapondje ya Liberia, James Grimes. Brookes okwa ka ninga omupeviperesidende gwa Liberia konima. Brookes okwa ka ninga oshipopiwa momutumba gwaayehe gwIigwana Hangano kombinga yaSouth West Africa eshi ningi pehala lyetu. Olweendo lwandje oku ya koNew York noshowo oku galukako okuya kuAfrica olwa li lwa futilwa kepangelo lyaLiberia. Ondhila yandje oya tuka okuza moshilandopangelo sha Liberia, Monrovia, okuya koNew York. Olweendo lwandje okugaluka koNew York onda pitile natango mo Monrovia, Accra, na Lagos sigo nee nda thiki mo Dar es Salaam shaTanganyika. Onda li nda ende nondhila yomalweendo gomombepo gaPan American, ndjoka ya li hayi tuka okuza ko New York, tayi piti moMonrovia, tayi lambele ishewe moLeopoldville, ngashingeyi hashi ithanwa Kinshasa opo hugunina oha yi lambele moJohannesburg mo South Africa, yo ondhila ndjoka tayi galukako ishewe koshilando hoka tayi ende tayi lambele miilando mbyoka ya tumbulwa metetekelo.

Molweendo lwetu nondhila ndjika omwa li aatiligane yamwe aaSouth Africa mboka ya dhimbulula Angie Brooks, ngame onde ya koneke unene shono ya li taya popi Oshiafrikaansa, omupya omunene mboka kaya li ye shi kutya ongame lye, nonando edhina lyandje olya li tali ka kala lyaaholike kuyo mbala.

Molweendo lwetu lwoowili 16 okuza moMonrovia okuya ko New York omuntu owa ndhindhilike shili kutya owuli molweendo okuza kenenevi limwe oku ya kekwawo oshoka ngele wa talele pekende lyondhila yoludhi lwo DC-6 yomashina geli gane, shoka omuntu wa mono osho owala  egulu nefuta , agehe gabulaula ootundi nootundi, omanga inaatu thika moNew York.

Pethimbo nda thiki moNew York osha li mu Juni 1960 na onda indile opo ndi holoke komeho gokommittee ontine yOshigongi Shaayehe shIigwana Hangano lwotango, noshowo komeho gokommittee yoSouth West Africa momasiku 5 Juli 1960, nonda hokolola kombinga yedhipago lyaantu oyendji moVenduka omasiku 10 Desemba 1959. Onda ka holoka ishewe olutiyali momasiku 8- 11 Juli 1960 oku yamukula omapulo okuza kokommittee, na onda gandja wo olopota kombinga yonkalo mOwambo momasiku ga 7 Juli. Pamwe na Kerina otwa shanga ombapila kombinga yeinyengo moVenduka, ndjika otwe yi shanga mesiku 2 August 1960 noshowo twa indile oshigongi momasiku 8 Auguste, na otwa holoka ishewe esiku lya landula tu yamukule omapulo. Iilonga mbika oya pula eitulomo lyandje noshowo okwi ilonga meendelelo, unene tuu sho nda li ndaana owino wa gwana komalandulathano go UN.

Pethimbo lyandje moNew York onda mono kutya ombelewa onkaleliposhilongo ya Ghana oya li tayi kwathele noonkondo unene moku gandja omayele. Onda kala moNew York pu Kerina ngoka a li a kala moshilando shika  konima ashike yoku mana eilongo lye omanga inaa ka longa moombelewa dhuukaleliposhilongo shaLiberia moNew York. Onda li woo nda kala paandja Herbert Whiteman, omuAfrican-American ngoka a li ena ontseyo yambwalangandja yopapolitika, molwashoka ye okwa li gumwe gwomaalanduli yomukokoli gwo Pan African, W.E.B Du Bois.

Pethimbo Kwame Nkrumah ali omwiilongi moUnivesiti ya Lincoln okwa li wo ha zi maandja Whiteman, oshowo Ako Adjei, ngoka a li ominista Yiikwapondje yotango mepangelo lya Nkrumah. Herbert Whiteman okwa mana oondjenda dhe omumvo Namibia a manguluka mo 1990. Nguka okwa li omulumentu gwomwenyo omwaanawa, nangame ondi ilonga oshindji kuye. Unene tuu sho nda kala maandjawo nomekwatathano naye na onda li nda uvithwa uugumbo oku tulwa mongundu yomuthigululwakalo gwaawiliki mboka ya kondjele uuthemba waantu yoludhi lwaAfrica.

Onda li ishewe nda indile opo ndi holoke komeho gOshigongi shAayehe shIigwana Hangano, onkene onda kala moNew York sigo omu Desemba 1960. Otwa li tatu pula kutya South West Africa a tulwe kohi yewiliko lyIigwana Hangano molutu lwi inekelelwa iipangelwalongo mbyoka ya li inaayi manguluka natango naambyoka ya li iikolonyekwalongo yaNdowishi konima sho mbika ya li ya yugwako pethimbo lyiita Yotango yUuyuni. Otwa li twa pula shika oshoka olutu nduka olwa li lwa gandja South West Africa miikaha yaBritania ngoka oye a li ta wilike nonando kashishi meukililo oUniona ya South Africa. Nguka okwa li ena oshinakugwanithwa shoku longekidha South West Africa opo a ye mondjila yemanguluko, natse mokupopya nIigwana Hangano otwa li tuna einekelo kutya otatu vulu okumona emanguluko lyoshilongo shetu omumvo 1963. Iilyolongo yimwe yomUN oya pula omapulo kutya otuna aantu yethike peni yalongwa, na ishewe ngele otatu vulu tuu oku ipangela tse yene. Onda yamukula nda ti omuntu okwa valwa a manguluka na ina pumbwa elongo opo a pule eithikameno nemanguluko.

Potango sho nda kalele momutumba gwOshigongi shAayehe shIigwana Hangano, mo1960, iilyolongo yaza moAfrica oya li ashike yili 10 mbyoka ya manguluka, yo mbika oyo, Ethiopia, Sudan, Egipiti, Libia, Tunisia, Mali, Morocco, Guinea-Conakry, Liberia, na Ghana. Lwopehulilo lyomumvo ngoka gwasimana, Belgian Congo ndjoka yaka lukululwa nokuninga Zaire, noshowo nee DRC mo 1999 oya manguluka wo mo 30 June 1960, ye Nigeria ta manguluka muKotoba 1961. Iilongo oyindji yAfrica oya landula mbika okuninga iilyolongo yIigwana Hangano, naashika osha fala mpoka kutya omahangano omakondjelimanguluko oga kala nokumona eyambidhidho enene mekondjo lyago okukondjitha uukoloni nethindilo kongudhi moAfrica.

Otwa li twa hiwa oku holoka komeho gokomitie ontine yoUN, ndele molwashoka tse ka twali tuna omuthika gwaa tali nawa, otwa li aluhe tuna okuza mo moshigongi shampa ashike twa gandja osheetwapo shetu noshowo okuyamukula omapulo. Katwa li wo twa pitikwa opo tu pitile momweelo moka hamu endele aakalelipo ndele otwa indilwa tu pitile momiyelo hoka haku endele aakalelipo yomahangano gaashi gopapangelo. Oshikwawo tse mboka twa li hatu gandja omaindilo getu ga pulakenwe, ka twali twa pitikwa oku ya moshinyanga shaakalelipo, kakele shila ngele otwa hiwa tu shi ninge ku gumwe gwomaakalelipo mboka.

Otwa kala tuna oku palamena oonkambadhala dhepangelo lyokatongo lyaSouth Africa ndhoka dha li tali kambadhala okuhulithapo iilonga yetu yoku gandja omahokololo getu kombinga yonkalo moSouth West Africa nonkene epangelo ndyoka itaali longekidha opo oshilongo shetu shi manguluke. Momasiku 5 Juli 1960 onda li nda mono ompito opo ndi popye komeho goUN nda lesha ombapila ya nyolwa oku za koshitayi shoSwapo mOmbaye, oshitayi shika oshali sha nyolelwa ombapila ya za kuamushanga gwepangelo lya South West Africa, ta yi tindi opo tse twaa pewe ompito oku popya uupyakadhi wetu komeho goUN. Ombapila ndjoka oya ti shoka twali tuna okuninga osho oku nyola uudhigu wetu noku wu tumina kepangelo lyoUniona ya South Africa, nonando mbaka kaya li shili taya ka tumina omukanda ngoka kIigwana Hangano.

Omukalo ngoka epangelo lyaSouth Africa lya ihumbatele oohailwa, Ya Toivo, Hamutumbangela, na Hans Beukes ogwa koleke ehokololo lyetu komeho gIigwana Hangano.

Pethimbo olyo tuu ndyoka Liberia na Ethiopia oya li ya tulilemo epangelo lyokatongo lya South Africa oshipotha komeho gompangu yOpaigwana yUuyuki. Otwa li tuna einekelo kutya shika otashi ka sindana unene tuu sho nda li nda kundathana nomunaveta ngoka a li ta wilike ospana ndjoka ya li tayi fala iihokolola mbika kOmpangu Yuuyuki yopaigwana koHague. Iilongo mbika iyali oya li tayi fala South Africa kompangu ndjoka molwashoka nguka okwa li andopa oku gwanithapo iinakugwanithwa ngaashi ya uthwa kOlutu Lwiigwana ndoka lwali halu ithanwa League of Nations. Mbika oya li okulongekidha aavalelwamo nooyene ya South West Africa opo ya vule okwiipangela yoyene memanguluko.

Uule womimvo sho twa kala noku tuma omakemo getu koUN otwe keshipondola opo tu pewe omuthika gwokukala mOshigongi shAayehe shIigwana Hangano ongo Swapo. Shika oshe tu pe wo uuthemba opo tu popithe Oshigongi shAayehe sho UN shuukilila itaatu pitile ngaashi mokakommittee okatine. Omanga inaatu shipondola oku kala nomukalelipo gwetu yene moUN otwali twa kwathelwa noonkondo kehangano lyedhina Marcus Garvey’s African Pioneer Movement noshowo kuGeorge Houser gwokakommittee kAmerica kombinga yAfrica, mbaka oya kala ookuume ketu ethimbo alihe lyekondjelomanguluko lyetu.

Ongamboka hatu gandja iiyetwapo yetu kokommittee ontine otwa li twa talika nomeho gondhino ku Britania nooyakwawo ayehe mboka yali taya yambidhidha epangelo lyokatongo lyaSouth Africa. Oya li ye tu tala inaatu simana okuyeleka naanambelewa yawo.

Nando ongawo Africa okwa li a kwatela komeho iinyangadhalwa yetu oku kondjela emanguluko  onkene tse otwa tsikile na otwali tatu vulu oku tseyithila uuyuni shoka tashi longwa kepangelo lyokatongotongo moshilongo shetu. Otwa li twa mono omayambidhidho omawanawa okuza koombinga noombinga dhuuyuni auhe taye tu kwatha mekondjo lyetu. Omwaalu gwetu mboka tatu popi komeho goUN okupula emanguluko ogwa indjipala sho twa joinwa ku Kuhangwa ngoka a li a tidhilwa kOwambo konima yoshiningwanima shomasiku 10 Desemba 1959. Okwetu joina sho a thigipo oshilongo  a pitile moAngola ta ende moZambia sigo a thiki moTanzania. MuAuguste 1960 okwe shipondola oku ya koAddis Ababa sigo a thiki koNew York, hoka etu joina ,tse na Kerina, Kozonguizi noshowo omusitagongalo Michael Scott.

Yalwe mboka wo ya li ya tumine iiyetwapo nyenyeto yawo koUN ongaashi omusitagongalo Markus Koopers omusita gwaantu yopoHoachanas mboka kwa li ya tidhwa pehala lyawo omumvo 1958, Hans Beukes noshowo nee Ismail Fortune. Moses Garoeb na Zedekia Ngavirue nayo oye ya koUN omumvo gwa landula naatuhe mbaka otwa longele kumwe  muukumwe ndele ha ngaamboka twa za koongundu dhopolitika dha yoolokathana. Shika osha sithohoni omupopyo gwa South Africa kutya tse otwa thikama notwa topoka pamihoko.

Epangelo lyokatongotongo lyaSouth Africa olyali li tonde oUN nolye yi pe ombedhi kutya oya tonatitha aAfrica opo ya sindane mokukondjela emanguluko, ndyoka lya monika kiilongo oyindji pomimvo dhomilongo 1960. Omumvo 1954 Omuprima Minista gwotango gwongundu yo Nationalist Party, Malan okwa lundile oUN kutya oya itaalitha aantu yaAfrica oyendji yomuyo inaa ya koka natango noshowo yeli konima nenge eya ula abalambali kutya yo oya thindilwa kongudhi nenge ota ya thindilwa kongudhi, onkene ngele yo oya thindilwa kongudhi nena oyena okulongitha shaashoka opo ya yiimangulule. Okwa ti moAfrica omuna omakuyunguto gokwaanambili molwashoka mbaka oya ulukilwa kutya yo otaya thindilwa kongudhi.

Epangelo lyokatongotongo lyaSouth Africa olya kambadhala oku lombwela oUN kutya aniwa Aawambo yo oyu uvite ombili naashoka tashi longwa kulyo. Shika olye shi ningi mokutuma Blignaut koUN opo a kale omugandjimayele gwomukalelipo gwa South Africa ko UN omusamane Eric Louw, nonando tse otwa li inaatu panda euliko lye. Nguka okwa tumwa opo a hokolole iifundja kutya aavalelwamo unene tuu Aawambo oya li ya panda epangelo lyaSouth Africa, kakele ashike kaaHerero naaNama mboka ya lukwa kutya oyo aayeti yiikolokosha. Moonkambadhala ndhika epangelo lyokatongotongo lya South Africa olya tula aantu yalyo melelo lyomavigumbo noku ya yambidhidha nawa, oshiholelwa ongaashi shoka sha Peter Kalangula ngoka a aniwa Ominista Onene yepangelo lyAawambo, nguka okwa li wo ta yambidhidhwa kaaNdowishi.

Mo New York onda kalamo oomwedhi hamano na onda tsakaneke aawiliki oyendji yomahangano omakondjelimanguluko, noshowo aakalelipo yiilongo mbyoka opo yamanguluka, na otwa li twa kundathana opolitika yopaigwana unene tuu kombinga yoku mangulula aantu miilongo ya kolonyekwa moAfrica, Asia na Latin America. Onde shipondola wo manga ndili moNew York oku tsakanena naawiliki  yehangano lyAfrican-American lya li tali kondjele uuthemba  wuthike pamwe waantu mboka moAmerica. Onda tseya nawa oshilando sha New York, sho nda kala nokweenda momashina kohi yevi, miitopolwa ngaashi Long Island, Queens noshowo omahala galwe moNew York.

LEAVE A REPLY

Please enter your comment!
Please enter your name here