Ondjodhi yoTigers oku sindana oliha ya yiwa moshipala

0
178

WINDHOEK – Ondjodhi yospana yoTigers okusindanapo ando ekopi lyoliha nuumvo oya yiwa moshipala shono omukwateli gwospana ndjika, Lloydt Kazapua a ehamekwa unene pethimbo yali taya idheulile uudhano.

Omukwati nguka gwokashendjelutu okwa li mokoola yo Brave Warriors sho ya dhanene nospana yopashigwana ya Tanzania.

Omukwati nguka hanuka shokambishi okwa li eli nawa moku kwata omatanga okuza nkene tuu a joinine ospana yoTigers okuza kwaandjoka yo African Stars, pethimbo lyoshikako shongashingeyi shuudhano wetanga lyokoompadhi.

Omuthika gwe omule mokati kokoola ogwa ngungumaneke aagameni yokoola yospana yoTigers mboka olundji haya etha omatanga taga piti noku ya mokoola yawo. Oyendji yomaatalinawa yuudhano wetanga lyokoompadhi oya ti oku kala kwospana ndjika pombanda mologo yoliha okwa etwa molwashoka oyena omukwati eli nawa.

Omukwati nguka okwa keelele opo ospana yawo yaa tulwe nando okoola momaudhano geli gatano, naashika osho sha li sha ulumike omudheuli gwo Brave Warrior Ricardo Manneti opo a pe omukwati nguka ompito oku kwatela ospana yoshigwana pethimbo lyuudhano wopambili pokati kaTanzania na Namibia oshiwike shayi.

Omukwati nguka okwa li ishewe a ithanwa a kale oshilyo shospana yo Brave Warriors ndjoka ya li ya dhana naGhana mu Desemba omumvo gwayi.

Okuza tuu nkene a joinine ospana yo Tigers, Kazapua okwa kala oye omukwati gwotango momaudhano agehe ngoka ga dhanwa kakele kwaamboka sho ospana ye ya li ya dhana shithike pamwe naandjoka yo United Stars naamboka nee sho ospana ye yadhengwa ookola ndatu mumbali Olyomakaya gapiti.

Omukwati nguka okwa li tango mospana yokuunona we yo African Stars ndjoka a ningile oshilyo omanga ena omimvo 16 mo 2007 na okwa kala ta longele ongo omukwati omutiyali gwomukwati gwotango gwospana ndjoka Max ‘Slimkat’ Mbaeva.

Nonando okwa li eshi pondola oku kuthapo Mbaeva pehala lyotango pethimbo lyuudhano  2012/2013 kohi yewiliko lya Ali Akan, omugundjuka nguka okwa li uuvite nayi  sho ihaa dhana we iikando oyindji , onkene sho omudheuli gwe nale Bobby Samaria emu ithana opo aka kwatele ospana yo Tigers nguka ina kwatakwata okwa zimine mbala noku tembukila kospana ndjoka hoka a kala tadhana kehe uudhano woliha nuumvo mospana ndjoka ya hala okusindana ekopi lyoliha.

KuCarlos Kambaekwa

LEAVE A REPLY

Please enter your comment!
Please enter your name here