Otaka ethapo ewiliko lyetanga

0
199

WINDHOEK – Omunashipundi gwoMTC Premiership Johnny ‘JJD’ Doeseb okwa halutha oshitopolwa shuudhano wetanga lyokoompadhi sho a tseyitha kutya otaka thigapo iilonga yuunashipundi woNPL uuna oshikako she shiilonga sha hulu mu Juli nuumvo.

Omuwiliki gwetanga nguka omwaanawa noha longo nawa mewiliko lye okwa li a taamba ewiliko ndika lyoliha yoshigwana omumvo 2008. Konima ashike yokutaamba ewiliko ndyoka, Doeseb okwa etapo omalunduluko giiwetikile muudhano wetanga lyokoompadhi moshilongo, sho oliha eyi koleke no ya ningi ehala lyuudhano tawu etitha olwiho. Doeseb ngoka a li omuwiliki gwospana yo Eleven Arrows yokomunkulofuta okuhole uudhano wetanga lyokoompadhi.

Oye ishewe awike konyala a kundathana nehangano lyoongodhi dhopeke lyaMTC opo li kale olyo omuyambidhidhi omunene gwetanga lyokoompadhi moNamibia pethimbo ndika. Ontseyo ye melelo  noshowo uunongo we wongeshefa  owa itaalitha ehangano enene lyoongodhi opo li pungule muudhano konyala oomiliona N$40, uule womimvo ndatu. Oomwaalu nguka ogwo omunene inaagu gandjwa nando onale kehangano lyongeshefa koshitopolwa shimwe shuudhano moNamibia.

Doeseb oye awike a pewa iitsa  molwa ehalo lye okulundulula omulandu guudhano wetanga lyokoompadhi opo mbuka wu ye pomuthika omwaanawa, ngoka gwa halika ku shaangoka. Okwa lundulula wo omukalo gwokuwilika uudhano wetanga lyokoompadhi moku wutula pomuthika gwopaithano noshowo tawu lelwa paithano nopamulandu gwongeshefa.

Kepulo kutya omolwashike ta zile mo miilonga mbika omanga mbika yuuka nawa komeho, unene tuu sho oye a tameke oku etapo elunduluko. Doeseb okwa ti okwaa halonga paithano okuza tuu pomuthika gwoospana oku ya sigo opewiliko lyolyene lyuudhano moshilongo oyo yimwe yomiitsa yasimana tayi mu thigithapo oshilonga shika. Okwa ti ewiliko enene lyetanga  inali itulamo moku tungapo omutalelo nethano lyakola lyuudhano mbuka moshilongo.

Okwa ti ishewe oku uvite nayi oshoka kapena eyokomeho momutungilo guudhano meni lyoshilongo.

“Konyala oospana adhihe dhomoliha ya  MTC Premiership odhina omukalo oku tonya omaako gadho dho itadhi ningisha kudho dhene na ohadhi tegelele ashike omanna ga gwe megulu. Kokutya ngashingeyi odha ikwatelela ashike miimaliwa mbyoka hadhi pewa omagano ku MTC omwedhi kehe dho itaadhi ningi nando osha oku ikongela iiyemo palwe.

Uuna iimaliwa mbika ya gandjwa kudho omwedhi kehe, konima ashike yokathimbo oto uvu sho tadhi nyenyeta, pehala lyoku longapo sha opo dhi kale dhi ithikamena dhodhene,” Doeseb ati.

Omunangeshefa nguka okwa ti MTC okwa tulamo iimaliwa oyindji muudhano wetanga lyokoompadhi ndele shoka ye ta  kuthamo osho owala uupale waana aatali yetanga yomwaalu ogundji oshiwike kehe uuna  uudhano tawu dhanwa, shika kashili nawa.

“Ngele owa tula iimaliwa yoye oyindji ndele shoka to galulilwa osho owala okupopiwa nayi nokuhokolwa kwaamboka ye li mewiliko lyopombanda lyuudhano unene tuu shono mbaka oyo wa li wuna okutopola nayo elalakano lyokutunga oshitopolwa shuudhano shakola nena, shoka itashi kala shina omwiityo gwasha ngele oshili ngaaka okutsikila okupungula oshimaliwa ngaaka. Itatu vulu okutsikila nonkalo ngaashi yili pethimbo ndika, ngele otwi itulamo okuhumitha komeho uudhano mbuka uuwanawa okuwu fala pondondo yopombanda.

“Oshili itandi vulu oku kala omutumba noku ulika sha fa kehe oshinima shi li nawa, unene sho shoka shapuka nosha piyagana osho tashi longwa ngashingeyi. Uudhano wetu wetanga lyokoompadhi owa pumbwa iimaliwa oyindji newiliko ewanawa, ndele ngele ndika kalipo nena tse otatu manapo ashike ethimbo lyetu,” Doeseb ta ti.

Doeseb okwa pandula MTC noonkondo mwaashihe shoka  a longele uudhano awuhe moshilongo, a gwedha po wo ohapu kombinga yaamboka taya popi nayi MTC molwaashike ya hala ehangano li pungule eta li kala lya mwena.

“Ngele andola MTC, okwa li inaa pungula muudhano moshilongo andola oshitopolwa shuudhano osha sa nale nokufumvikwa woo. Okwa gwedha po woo kutya iikondo ayihe yomaudhano ina yi kala ashike ya tegamena oku yambidhidhwa kehangano  limwe pashimaliwa,” ta gwedha po.

KuCarlos Kambaekwa

LEAVE A REPLY

Please enter your comment!
Please enter your name here