Ronny a pititha oalubuma yotango

0
209

EENHANA – Leonard Iindongo a tseyika wo nedhina Ronny moshitopolwa shokuhika oongalo muumbangalantu woshilongo, okwa za momukunda Oikango moshikandjohogololo Ongwediva mOshitopolwa shaShana. Ronny oku li omwiimbi gwoongalo dhokwaito noshowo omudaanisi.

Okwa adha ondjodhi ye ndjika nontseyo yokuhika oongalo noshowo okudanisa sho a li ha nyola omawi goongalo ndhoka a dhiladhila kombanda yembo lye lyokushanga iilongwa yosikola manga a li posikola yopevi pOshawapala Combined School. Okuza mpoka okwa ka tameka okushanga oondjimbo omumvo 2010 omanga eli moseko. Ohole ye yokuhola iiyimbo nomusika oye mu tokolitha opo a hogolole oku ka tsikila eilongo lye pOkolege  yontseyo yoArts nenge COTA moVenduka, na okwa tegelela oku ka taamba onzapo ye meilongo lyo ku kondolola omawi ngoka haga kwatwa pethimbo lyokwiimbwa kwoongalo nenge wo omawi ngoka haga taambwa komashina pethimbo lyetumo lyomawi mombepo okupitila mOradio noshowo moTiivii.

Oshiwike shayi Ronny okwa tseyitha oalubuma ye yotango kohi yoshipalanyolo Ohole. Omumlumentu nguka omugundjuka noku udha oonkondo nohokwe mokuhika oongalo okwi ilongekidha oku ya komeho noku kwatako uuyuni waa hiki yoongalo noshowo wokudanisa.

Oalubuma ndjoka a tseyitha poshiithanene sha li sha ningilwa pEenhana Gardens, oyi na oongalo dhili omulongi 13, naandjika otaku hokololwa ya li ya landwa nawa pethimbo ndyoka ya li  ya tseiyithilwa oshigwana shomondoolopa onene mOhangwena.

Oalubuma oyi na wo uungalo ngaashi hoka ka The Big 3, Music is my Life noshowo Time is Up auhe mbuka ouli moalbuma ndjoka tayi ithanwa Ohole. Ndjika oya li ya hokiwa kaapulakeni yomusika ye unene tuu mboka ya li ye ya petseyitho lyoAlubuma ndjika.

Okwa ti uunongo mboka ena otewu pandulile Kalunga ngoka emu kwatha sho a ningi oshilyo shongundu yolwiimbo lwosikola, naashika oshe mu pe uunongo nontseyo momusika. Okwa ti omanga inaa ya moshitopolwa shomusika okwa tameke manga oku pititha uungalo woku ulika kutya ye ota vulu noku shi  okwiimba. Okwa tokola ihe opo a tseyithe oalubuma ye ndjoka  mekwathelo lyomahewa ge ngaashi, Brother Edit, Omatuu, Lil Mix naambaka okwa ti oyo ongundu  ya kola mokunyanyudha aatali naapulakeni yomusika. Omadhengo agehe gomaimbilo geli moalubuma ndjika oga kwatwa mostudio ya MMT  mOndangwa.

Ronny omugundjuka okwa ti okwa nwethwamo noku kumikwa kaahikingalo yeshiwike nawa, ngaashi Killa B, Nakale ya Nakale, oshowo Brother Edit moNamibia. Omanga moSouht Africa omadhengo niiyimbo ya Sello Twala nenge Chiko oye mu kumike opo ye  a tsikile okukwata omawi ge molupe lwoondjimbo. Okwa ti elalakano oku etapo omikallo dha yooloka noshowo okugwedhamo omusika yoludhi lwo Kizomba moAngola. Iiyimbo yi na omikwelengendjo ngaandhika otayi ka tulwa moalubuma ontiyali.

Ronny ngoka a valwa momasiku  Maalitsa 3, 1984, okwa ti okwa hala wo okutala omaludhi gamwe gomusiki monakuyiwa opo oongalo dhe dhi kale tadhi pulakenwa kaapulakeni oyendji moshilongo noshowo puushiinda.

Ronny okwe shi pondola opo a ulike  uunongo we noshowo uunyakwa we pethimbo a li a hiwa opo a ka hike nokudhana oongalo dhe poshiithanena sha li tashi gongele iimaliwa sha kwatelwa komeho kaanasikola yopUnivesiti  ya Namibia, poKampusa ya Hifikepunye Pohamba mOngwediva  omumvo gwa yi. Okwa li woo a ithanwa kaalongekidhi yomauliko gOlufuko festival mOutapi. Okuna etegameno kutya ota ka ithanwa ishewe piituthi yi ili no yi ili oku ka imba nokudanisa, naashika otashi mu pe ompito opo a tseyike koshigwana kehe shoka tashi pulakene omaimbilo ge.

Okwa pandula Kalunga noshowo aakuluntu ye sho ye mu pe oshitalendi  shika ngashingeyi tashi ningitha opo ondjodhi ye yoku kala omuhikingalo yi ninge yoshili. Okwa ti otayi komeho nonando aakuluntu ye kaye po, opo ya vule okumona nkene ye ta imbi nawa, oohe na yina ayehe oya hulithila miita yekondjelomanguluko moAngola.

Omaimbilo gamwe taga adhika moalubuma ndjika ongaashi, Aanangeshefa, Remember, Ondemupandula, What is this, GRN, nOngwediva.

Oongalo ndatu dhomoalubuma ndjika odha kala tadhi hikwa noonkondo poompito odhindji moRadio yOshiwambo miilonga yokutuma Omawimombepo yaNamibia nenge NBC, oongalo ndhika ohadhi uvika wo tadhi dhana mOradio yoshigwana yaHangwena. Omuniilonga gwomoradio yoshigwana pOhangwena na ye okwa li wo a kala petseyitho lyoalubuma ndjika Olyomakaya.

Sho a popi na Kundana, omuwiliki gwa , Brother Edit okwa ti yo oyu uvite nawa molwa eyambidhidho ndyoka enene lya ulikwa kaakalimo moshitopolwa shika sho ya kala petseyitho lyoalubuma ndjika.

“Ongo omulongekidhi nomukwati gwoongalo gwe noshowo omuwiliki gwiilonga ye, ngame ondi uvite etumba sho oongalo ndhika  tadhi dhanwa mooradio dhomoshilongo, shika otashi ulike kutya ye okwa longo sha shasimana,”Brother Edit a ti.

“Oshayela kutya ndika endhindhiliko lyiinima iiwanawa tayi ya  monakuyiwa, na onda hala oku ya shilipaleka kutya tse otatu ka tsikila okulonga nawa,” osho a ti.

KuClemence Tashaya

LEAVE A REPLY

Please enter your comment!
Please enter your name here